Nia Gulim 18

Levi dwi tiina

1“Wɛ kaanem tiina bam de Levi dwi tiina bam maama ba jege se ba jwoŋi ba nyem tega kam pɔɔrem baŋa ne, ne ba dwonna Isarele tiina bam na wó na tei to. Ba nam wó na chwoŋa se ba jwoŋi ba teiri pɛɛra yalo nɔɔna na kaane ba pa Baŋa Wɛ to wone, nenɛɛne ko na maŋe se ba jwoŋi to. 2Ba ba jege se ba taa tei ba tete tega, ne ba chorro tem na nɛ tei to. Baŋa Wɛ tete mo ye ba nyem, nenɛɛne o na pwooli de-ba tei to.#Jeelim 18:20

3Nɔɔno ná tu o kaane naao naa pia o pa Wɛ, kaanem tiina bam jege chwoŋa se ba le vɔŋɔ, de peyaa, de puga ba pa ba tete. 4Ko ta ná ye Wɛ pɛɛra yalo na ye mena, de sa-doora, de nuga, de pei-koro, ye te lwoori yiga te ke to, wonnu tento de wó taa ye Wɛ kaanem tiina nyem mo. 5Kokuri to, abam Tu Baŋa Wɛ wom pɔɔre Levi dwi dem Isarele dwia yam maama wone se banto de ba bia taa toŋe ba pa‑o o wara-jei sem ne, se ko taa vei wuu.

6Levi tu ná boŋe se o nwoŋi á teo kolo maama o na zoore to ne se o vo jeiga kalo Baŋa Wɛ na wó kuri to, o jege chwoŋa se o ke konto, 7se o vo o toŋe o pa o Tu Baŋa Wɛ wom ne o dwonna Levi tiina bam de na toŋe ba pa‑o tei to. 8Wonto de jege chwoŋa se o taa jwoŋi o wodiu se ko taa mae de babam bam na jwoŋi tei to mo, de o ná maŋe o jwoŋi kolo o kwo jejegero tem baŋa ne de.

Wo-zɔɔna kikia

9Á ná tu á zo á Tu Baŋa Wɛ wom na lage o pa abam tega kalo to wone, se á yé lwoni totoŋ-zɔɔna yalo dwi-gɛ tiina balo na zoore da ye ba toŋe to. 10-11Ko chula se abam wolo zwɛ o bu mini wone o ma ke kaanem. Ko ta chula se yi-nara, de vora, de chera, de liri-mwa tiina taa wo abam tetare ne ba toŋe ba totoŋa. Baŋa Wɛ chuli balo na dole sabu-pwona ba ma beeri ba nii ba yiga to de, dedaane chichiri vora maama.#Nwoŋim 22:18 12O chuli balo maama na toŋe totoŋ-vɛɛsa yam konto dwoŋi to. Ko maa ye konto ŋwaane mo o lage o da á yiga o zeili dwi-gɛ tiina bam se abam wane á zo da. 13Abam nam jege se á yɔɔre á tɔge á Tu Baŋa Wɛ wom chwei sem, se á yé tusi de fenfee de.

Baŋa Wɛ ni-jwoŋinu

14 Dwi-gɛ tiina balo á na wó zeili to yeini ba cheigi vora de yi-nara veera yam mo. Abam Tu Baŋa Wɛ wom nam wo pɛ abam pwola se á ke konto. 15O za wó toŋe o ni-jwoŋinu á tei ne, ne amo na ye tei to. Wonto wó nwoŋi abam tete dwi dem wone mo. Nam cheigi-na o taane dem.#Kikia 3:22

16Abam déem na gilimi daane Sinayi peo kom teiŋa ne dɛ delo to, á lwoori á we, á daa ba lage se á ni Baŋa Wɛ kwora kam vekke, á nam ba lage se á na Wɛ min-vo-fɔrɔ kom, á na fona we á wó te to ŋwaane. 17Baŋa Wɛ ma ta de amo o we:

‘Nɔɔna bam na lwoori kolo to maama jege chega. 18Amo wó pa se amo ni-jwoŋinu nwoŋi ba dwi wone, ne nmo de na ye tei to, ye a toŋe‑o ba tei ne. Amo wó bere‑o a taane dem, se o lwoni o bere nɔɔna bam. 19O na wó taa ŋɔɔne amo yere ŋwaane to, wolo maama ná ve se o sɛ o ni, amo tete wó seene yia mo a bwei kotu. 20Sampwora kalo maama nam ná mɛ amo yere o ŋɔɔne taane ye ko dae amo mo pɛ‑o taane dem, konto tu jege se o te mo. Ko ta ye bedwe mo de sampwora kalo na wó ma wa yadwonna yere o pworisi to, wonto de jege se o te mo.’

21Á nam wae á bwei nenɛɛne, á wó ke tɛ mo á lɔre we sampwora kanto na ŋɔɔne kolo to seene ko ye Baŋa Wɛ taane naa ko dae. 22Ne sampwora ná mɛ Baŋa Wɛ yere o ŋɔɔne taane ye kolo o na tage to wo ke, ko bere we ko dae Baŋa Wɛ kwora mo o ŋɔɔne. Sampwora kam konto zeiŋi o tete mo o ŋɔɔna. Á ba jege se á ta‑á kɔre‑o.”

Currently Selected:

Nia Gulim 18: KBG

Highlight

Copy

Compare