Nia Gulim 17

1Yé kwei-na varem wolo na jege gɛɛ naa tusim o yera ne to á ma‑á kaane á pa á Tu Baŋa Wɛ wom, se o chuli konto.

2Abam ná tu á ba á zoore jei selo Baŋa Wɛ na lage o pa abam to ne, dɛ delo á wó na we baaro naa kaane zaŋe o ke lwarem á Tu Baŋa Wɛ wom yiga ne ye o lɔ Wɛ ni-gwonim dem kwaga ne. 3Wonto na chɔge Wɛ nia yam tei to ye nenɛɛne o ná kuni dwonna o zuli jwona naa o zuli wea kam, naa chana kam, naa chalechwe sem. 4Sawea kanto dwoŋi ná to á zwa ne, á jege se á tɔge ka nɛ se á lɔre chega kam. Nɔɔno wom nam ná seene o toŋe wo-lɔŋɔ kom konto Isarele teo kom ne, 5se á ja konto tu á nwoŋi á vo teo kom dáa ne á dole‑o de kandwa á go. 6Ko nam jege se nɔɔna balei naa batɔ mo pa maana ye ya lɔ o kwaga ne se ba laam go‑o. O ba jege se o te nɔɔno dedoa yerane maana baŋa ne. 7Maana-para bam mo jege se ba da yiga ba dole kandwa se nɔɔna bam maama pu ba kwaga ba dole kotu. Kanto chwoŋa kam mo á wó tɔge á ma‑á saare lwarem dem konto abam tetare ne.

Taana yalo na dana ya dwoi to taane

8Nɔɔna ná jege taana ye ya chamma ya dwoi á yiga tiina bam se ba bore bora, se á kwei taana yam konto dwoŋi á ja á vo jeiga kalo á Tu Baŋa Wɛ wom na wó kuri se nɔɔna zuli‑o da to.#Nwoŋim 18:22 Ne ko ná ye nɔn-gora taane, naa zonne keim taane, naa jejegero maŋem taane, ye á ware se á pɔɔre chega kam, 9ko maŋe se á vo á guli taane dem á bere Levi dwi tiina balo na ye Wɛ kaanem tiina to, de wolo na nii taana yam baŋa ne da yam konto ne to, se banto wó bore chega bora ba pa abam. 10Ba ná guri taane dem Baŋa Wɛ zula jeiga kam ne ye ba ta se á ke kolo maama, se á fɔge á ke-ko. 11Sɛ-na ba bora borem dem á daare á tɔge ba na wó bere abam ni delo se á ke to maama, se á yé tusi de fenfee de. 12Wolo maama nam ná zeiŋi o tete ye o ve wolo na di taane dem to ni, naa o ve Wɛ kaanem tu wolo na toŋe o pa Baŋa Wɛ to ni, kotu jege se o te mo. Kanto chwoŋa kam mo á wó tɔge á ma‑á saare lwarem dem konto Isarele teo kom ne. 13Ko kwaga ne Isarele tiina bam maama ná nigi kolo na ke to, foone wó ja-ba, pa se ba daa yé zeiŋi ba tete ba ve bora borem.

Isarele tiina bam Pɛ

14Abam ná tu á zo tega kalo á Tu Baŋa Wɛ wom na lage o pa abam to, á laam wó boŋe se á tiŋi pɛ se o taa tei abam, nenɛɛne teene delo na gilimi abam to na jege pwa tei to.#1 Samuwel 8:5 15Nam tiŋi-na wolo yerane á Tu Baŋa Wɛ wom na wó kuri to se o ji á pɛ. O jege se o taa ye abam tete dwi tu mo. Yé zaŋe á tiŋi-na veiru se o ji á pɛ. 16Pɛ wom ba jege se o sisein-nɔɔna tiini se puli se gaale. O nam ba jege se o toŋe nɔɔna se ba vo Ejipti ba yeigi sisein-nɔɔna ba pa‑o, kokuri Baŋa Wɛ pɛ abam ni we, á daa yé jwoori á vo dáane. 17Pɛ wom ba jege se o taa jege kaana dedɛ, banto na wae ba pae se o lɔ Wɛ kwaga ne to ŋwaane. O nam ba jege se o tiini o beeri dunni o pa o tete.#1 Pwa 11:1-6; 2 Tigisim 9:25-28

18O ná bobo se o di paare, ko jege se o vo Wɛ kaanem tiina bam tei mo o beeri Wɛ nia yam se ba lwoni ya dwonna ba tiŋi tɔnɔ wone ba pa‑o.#2 Pwa 23:2 19O ta ná ŋwe, tɔnɔ kom wó taa wo o tei ne se o taa wae o gare Wɛ nia yam konto dɛ maama. Konto wó pa se o taa kɔre Baŋa Wɛ ye o daare o toŋe o tɔge Wɛ nia yam de o chullu tem maama. 20Ko ta wó che pɛ wom se o yé zeiŋi o tete we o gare o chorro tem, se o yé ywori Wɛ nia chwoŋa kam wone o vo jazem naa jagwia seeni. Ko ná ke konto, o paare dem wó dáane, ye o dwi dem de wó taa jege paare Isarele teo kom wone ba di.”

Currently Selected:

Nia Gulim 17: KBG

Highlight

Copy

Compare