Nia Gulim 15

Jena chɛɛm taane

Nwoŋim 23:10-11; Chullu 25:1-7

1“Bena yarepɛ bene dem maama ná yeini de yi, se á kwei-na balo na jege á jena to á yage á chɛ-ba. 2Á na wó ke tei to mo tento: Wolo maama na kwei sabu o jene o pa o dwoŋi Isarele tu to jege se o yage jene dem o ma chɛ‑o mo. Kotu daa yé boŋe se o jwoŋi o sabu kom o choro kom tei ne, Baŋa Wɛ na bere we ko ye jena saarem bene to ŋwaane. 3Ko ná ye veiru, n wae n jwoŋi n jene dem o tei ne. Ko daare ko ná ye n tete nɔɔna bam jena yam mo, se n yage n chɛ-ba.

4Abam Tu Baŋa Wɛ wom wó swɛ abam swolim pa se á na ywoni tega kalo o na lage o pa abam se á ta‑á tei to wone. Konto ŋwaane, yiniga bá ja abam dedoa tete de, 5ne á ná sɛ o ni ye á toŋe á tɔge bera yalo maama amo na bere abam zem tento to. 6Chega to, Baŋa Wɛ wó swɛ abam swolim ne o na pwooli se o ke tei to. Konto to, á wo ta‑á jena á pae dwi-gɛ tiina dedɛ ye á ba jege se á di jena ba tei ne. Á wó ta‑á jege dam dwi-gɛ tiina baŋa ne. Teo kodwoŋi nam bá di dam abam baŋa ne.

7Á ná zo tega kalo á Tu Baŋa Wɛ wom na lage o pa abam to, ye yiniga ná jaane á dwoŋi Isarele tu wolo na zoore á teo wone to, yé ve-na se á woli‑o, á na jege wo-chɛɔ to ŋwaane. 8Á nam jege se á ke wo-ywoŋo mo ded‑o se á jene tei maama o na wó taa laga se o ma ji nɔɔno to.#Chullu 25:35 9Ta‑n yei se n yé pa se boboŋ-lɔŋɔ ba n kana ne ye n ta nenɛɛne: ‘Bena yarepɛ bene dem na ye jena saarem bene to bwola.’ Nmo ná boŋe konto dwoŋi ye n ve se n jene n pa n dwoŋi Isarele tu wolo yiniga na jaane‑o to, ko ye puseŋa keim mo n kea. Nɔɔno wom wó wane o keeri o jare Baŋa Wɛ nmo ŋwaane, ye Wɛ wó pa n to de n bora. 10N jege se n pa yiniga tu zɛɛra mo se n yé ke wo-chɛɔ ded‑o. N Tu Baŋa Wɛ wom laam wó swɛ nmo swolim pa se kolo maama n na jege n toŋe to ke lanyerane ko pa‑m. 11Maŋa maama yiniga na jaane balo to wó taa wo abam wone. Konto to amo pɛ abam ni se á ke wo-ywoŋo á pa Isarele tiina balo cham na jege-ba to.

Bena yarepɛ yarepɛ bene dem taane

Nwoŋim 21:1-11

12Hiburu tu ná kwei o tete o yeigi o pa nmo se o taa ye n kabaa, o ná ye baaro naa kaane, kotu wó toŋe o pa‑m bena yaredo mo. Bena yarepɛ bene dem ná yia, se n yage‑o se o taa tei o tete. 13N nam ná yage‑o, yé pa o viiri de je-yaara. 14Pwoli n wo se n le kolo maama n na jege to wone n pa‑o, ko ná maŋe ko ye n vara bam wone, de n wodiiru tem wone, de n sana bam wone. Nmo Tu Baŋa Wɛ na ke zaane n yuu ne o pa‑m wonnu telo to, se nmo de ke n kabaa kam lanyerane konto dwoŋi. 15Guli-na we abam de déem ye kabɛ mo Ejipti ne, ye á Tu Baŋa Wɛ wom laam ba o jwoŋi abam o yage. Mo kokuri a zem tage Wɛ ni dem konto a bere abam.

16N kabaa kam nam wó wane o ta de nmo we o ba lage se o viiri, o na swoi nmo de n sɔŋɔ tiina bam ye n ke‑o lanyerane to ŋwaane. 17O ná tage konto dwoŋi, ko jege se n ja‑o mo n vo n pa se o sale manchwo-peena bworo kom, se n daare n kwei silwei n puri o zwɛ dedoa. Konto bere we o wó taa ye nmo kabaa se ko taa nii o toone. N kabaa kam ná ye kaane, se n ke‑o de konto dwoŋi.

18Nmo ná yage n kabaa se o viiri, se n yé pa ko taa ye wo-chɛɔ ko pa‑m. Kokuri o toŋe o pa‑m bena yaredo mo ye o totoŋa yam daga ya dwoi wolo na toŋe o pa‑m ŋweero ŋwaane to totoŋa kuni belei. N Tu Baŋa Wɛ wom laam wó swɛ nmo swolim pa se kolo maama n na jege n toŋe to ke lanyerane ko pa‑m.

Sɔŋɔ-vara bu-kwe sem

19Le-na wo-bale selo á vara bam na dɛ yiga ba lo to se á kwei á pa á Tu Baŋa Wɛ wom. Yé ma-na naane dem konto á toŋe totoŋe, nam yé fane á pei sem konto koro. 20Bene maama wone abam de á sɔŋɔ tiina tiina bam jege se á vo jeiga kalo Baŋa Wɛ na wó kuri to ye á di wonnu tem konto o yiga ne. 21Varem wolo nam ná jege gɛɛ o yera ne, ne o ná ye vare-gwana, naa vare-lilwei, naa o jege tusim dwi delo, ko wo maŋe se á kwei wonto dwi á ma‑á ke kaanem á pa Baŋa Wɛ. 22Á nam jege se á kwei vara bam konto dwoŋi á di á sam ne mo. Ko nye de á na lage á di woŋa naa feira ye nɔɔna maama jege chwoŋa se ba di, ba ná maŋe ba kwɛ ba tete Wɛ ŋwaane naa ba wo kwɛ ba tete mo de. 23Ko nam chula se á di vara bam jana. Pa-na se jana bam lwo tega ne, ne á na wó lwo na á yage tei to.”

Currently Selected:

Nia Gulim 15: KBG

Highlight

Copy

Compare