Nia Gulim 14

Wonnu telo na chula to

1“Abam ye á Tu Baŋa Wɛ nɔɔna mo. Konto to á ná lage a keeri twa, yé gwe-na á yera yam, nam yé cheeri-na á yuni te tira seeni. 2Abam seene á ye á Tu Baŋa Wɛ nyem mo. Logo baŋa nɔɔna maama wone mo o kuri abam se á ta‑á ye o tete nɔɔna o yi na su to.#Nwoŋim 19:5-6

Wonnu telo na maŋe de dim to

Chullu 11:1-47

3Yé zaŋe-na á di wo-yɔɔro telo Baŋa Wɛ na chuli te dim to.#14:3-21 Dé bá wane dé lɔre vara, de zuna, de wo-korro yera yam maama chekke, ba na ye faŋa faŋa nyena to ŋwaane. 4Á wae á di vara banto dwi:

Naao, naa pia, naa boŋo, 5naa woŋa, naa feira, naa siga, naa kagoa wo boŋo, naa nambworo, naa kagoa wo pia.

6Á ta wae á di varem wolo maama napɔɔna na lɔge belei ye ba yeini ba done gaao ba guli ba jwoori ba done to. 7Ko nam dae se á di kone, naa zwoni, naa pe-ware, se vara bam konto done gaao ba guli ye ba napɔɔna laam wo lɔge belei. Konto ŋwaane banto wo maŋe se á di-ba. 8Teira de nam wo maŋe se á di-ya. Ya napɔɔna lɔge belei ye ya laam ba done gaao ya gula ya jwoori ya dona. Konto ŋwaane ko chula se á di ya nɔna. Ya ná tega, bere á yé dwei-ya.

9Ko nam ná ye wonnu telo na zoore na wone to, á wae á di ywona yalo na jege nabili-pelwaro ye ya ta jege poro pa te kwoli ya yera to. 10Ko daare ko ná ye woŋo maama na wo na wone ye ko ba jege nabili-pelwaro dedaane poro na kwoli-ko to, ko chula se á di-ko. Ko wo maŋe de dim.

11Á wae á di zuna balo maama na maŋe de dim to. 12Ko daare á ba jege se á di zuna banto dwi:

Maaro, de duura dwi maama, 13de chilachi, de kalwonnu dwi maama, 14de bachangaaro, 15-17de kunkwooru dwi maama, de lenlane, de naneo zuna, de kawuli dwi maama, de nakelakɔro, de bugacheeni, 18de buga ni zuna, de kabakollo, de pɛbia, de jenjwaano.

19Wo-korro telo na jege vɔna ye te kare te vei tega ne to de chula. Á ba jege se á di-te. 20Á za wae á di wo-korro telo na maŋe de dim to.#Chullu 11:21-22

21Yé zaŋe-na á di varem wolo na tega o tete ne to. Á wae á kwei á pa veira balo na zoore abam teo kom ne to se ba di, naa á kwei á yeigi á pa sa-teena. Abam Tu Baŋa Wɛ wom kuri abam se á ta‑á ye o tete nɔɔna mo.

Nɔɔn-nɔɔno yé kwei bebala de ka nu nayela o saŋe mini wone.

Wɛ-teiri pɛɛra

22Bene maama wone ta‑á yei-na se á le á kare sem wodiiru popɔra dedoa fuga maama wone á pa Wɛ.#Chullu 27:30 23Laam ja-na Wɛ-teiri wodiiru tem konto á ja vo jeiga kalo Baŋa Wɛ na wó kuri se nɔɔna taa zuli o yere da to. Ko ná ye á mena yam, de á sa-doora bam, de á nuga kam, de á vara bam na dɛ yiga ba lo bia balo to, se á vo á di Wɛ-teiri dem á Tu Baŋa Wɛ yiga ne, se á ta‑á kɔre‑o taa wuu. 24Baŋa Wɛ nam ná yɔɔre o ke zaane abam yuu ne pa se á na wodiiru dedɛ, ye o wara-jei sem ná ye yiga yiga ka pa abam se á ja á wodiiru tem á yi da, se á ke tento: 25Kwei-na á Wɛ-teiri wodiiru tem á yeigi á jwoŋi sabu, se á daare á ja sabu kom á vo Baŋa Wɛ zula jeiga kam. 26Á ná yi da, se á laam ma á yeigi kolo maama á na lage to se á di. Ko ná ye naane, naa pei, naa sana, abam de á sɔŋɔ tiina bam wó di-te á Tu Baŋa Wɛ wom yiga ne de wopwolo.

27Za ta‑á yei-na se á yé swei-na Levi dwi tiina balo na zoore abam tei ne to ni ne, banto na ba jege ba tete tega se ba taa tei to ŋwaane. 28Bena yatɔ bene dem maama ná yeini de yi, se á kwei-na Wɛ-teiri wodiiru tem maama á la-te jeiga dedoa á teo maama wone. 29Wodiiru tem konto wó taa ye Levi dwi tiina bam nyem mo, banto na ba jege ba tete tega to ŋwaane. Abam ta jege se á kwei-te á pa veira, de botara, de kadeina balo na zoore abam wone to mo. Ba maama wó wane ba ba ba jwoŋi wodiu ba di ba su. Ke-na konto se ko pa á Tu Baŋa Wɛ zaane taa wo á baŋa ne de kolo maama á na lage á toŋe to.”

Currently Selected:

Nia Gulim 14: KBG

Highlight

Copy

Compare