Nia Gulim 13

1Sampwora naa yi-naro ná zaŋe abam wone ye o wuuri o ta o bere abam wo-kenkagela na lage ya ke tei to, 2ye wo-kenkagela yam ná seene ya ke ne o na tage tei to, o wó wane o soge abam se á zuli dwi-gɛ tiina wa-yɔɔro, ye o ta nenɛɛne: ‘Pa-na dé zaŋe dé tɔge wa yadwonna se dé zuli-ya.’ 3Sampwora naa yi-naro ná tage konto dwoŋi, yé cheigi-na o taane. Ko nam ye á Tu Baŋa Wɛ wom mo maane abam se o nii, á seene á swoi‑o de á bochare maama de á boboŋa maama naa á ba swoi. 4Ta‑á tɔge-na abam Tu Baŋa Wɛ wom se á ta‑á kɔre‑o. Sɛ-na o nia yam ye á cheigi o kwora kam, se á ta‑á toŋe á pa‑o ye á sale‑o.

5Ko nam ná ye sampwora naa yi-naro konto dwoŋi, ko jege se á go‑o mo, o na soge abam se á lɔ á Tu Baŋa Wɛ wom kwaga ne to ŋwaane. Baŋa Wɛ nam ye wolo na jaane abam o ja nwoŋi Ejipti teo kom ne pa se o vere abam á kabɛɛne dem ne o yage to mo. O ye nɔn-balɔrɔ mo ye o lage se o pa á ywori Baŋa Wɛ na pɛ abam chwoŋa kalo se á ta‑á tɔge to wone. Konto ŋwaane, á jege se á saare lwarem dem konto mo á tetare ne.

6Ko ta ná ye n nu-puga bu, naa n tete bia, naa n ka-swono, naa n chilwoŋ-zɔŋɔ, kotu wó wane o waase o ta de nmo o we, ‘Pa dé vo dé zuli wa yayam.’ Wa yam konto mo abam de á nabaara bam ya yeiri. 7Ya nam ye wa yalo dwi-gɛ tiina na zuli to, ba ná maŋe ba ye dwia yalo na bwola de abam to, naa ba ná ye yiga yiga de. 8Yé zaŋe n sɛ kotu gana yam. Bere n yé cheigi‑o de. Daa‑n yé duri o ŋwaŋa naa n kwaane n kwoli o kikia yam. 9Ja‑o n go! Nmo tete wó da yiga n dole‑o de kandwa se nɔɔna babam de laam tɔge ba dole. 10Dole-o-na de kandwa á go, o na kwaane se o ja abam o ywori abam Tu Baŋa Wɛ wom kwaga ne to ŋwaane. Baŋa Wɛ nam ye wolo na jaane abam o nwoŋi Ejipti teo kom ne pa se o vere abam á kabɛɛne dem ne o yage to mo. 11Isarele tiina bam maama ná nigi kolo na ke to, foone wó ja-ba, pa se abam wone nɔɔn-nɔɔno daa bá toŋe keim-lɔŋɔ konto dwoŋi.

12Ko daa ta ná ye teene delo abam Tu Baŋa Wɛ wom na lage o pa abam se á ta‑á zoore de wone to, á wae á ni we, 13nɔn-wo-korro tedwonna zaŋe teo kodwoŋi ne ye ba soge ba teo kom nɔɔna pa se ba ywori Baŋa Wɛ chwoŋa wone se ba daare ba zuli wa yayam. Abam nam ya yeiri wa yam konto zula. 14Á ná nigi kanto sawea kam dwoŋi, kwaane-na á tɔge ka nɛ se á lɔre chega kam. Ko ná ye chega mo we totoŋ-lɔŋɔ kom seene ko ke abam tetare ne, 15ko jege se á zaŋe á kwei á se-zɔɔro mo á vo á go teo kom konto nɔɔna bam maama ka, de ba vara bam de, se á yɔɔre á chɔge teo kom konto fase. 16Ta daare-na á la ba jejegero tem maama á ke daane teo kom kapworo ne, se á laam zwɛ teo kom de ko woŋo maama á ma‑á ke kaanem á pa Baŋa Wɛ. Ko jege se ko taa ye di-dwonnu yerane mo se ko taa vei wuu, se nɔɔn-nɔɔno daa yé jwoori o lɔ teo kom konto. 17Ko ná ye teo kom wonnu telo maama na maŋe de chɔgem Wɛ ŋwaane to, yé pa se á fera zo kolokolo se á kwei. Á ná sɛ Baŋa Wɛ ni dem konto, o bane wó zuri ye o daare o duri abam ŋwaŋa, pa se á kɔgɔ kom puli dedɛ, ne o na pwooli de á nabaara bam se o ke tei to.

18Konto ŋwaane abam jege se á cheigi abam Tu Baŋa Wɛ kwora kam ye á sɛ o nia yam maama, ne amo zem na bere abam tei to. Ta‑á ke-na kolo na jege chega o yiga ne to.”

Currently Selected:

Nia Gulim 13: KBG

Highlight

Copy

Compare