Kolosia 4
4
1Ko ná ye yuu tiina balo na tei kabɛ to, se á ta‑á tɔge chega de á na ke-ba tei to. Á nam ta‑á yei we, abam de jege wolo na tei abam to Wɛ telaao ne.
2Abam maama nam tiini á ta‑á lwoori Wɛ, se á pa á boboŋa maama taa wora, ye á kwori á ke‑o lei. 3Á nam ta‑á lwoori Wɛ konto á pa debam de, se o pa dé na chwoŋa se dé taa tɔɔle o kwora kam dé bere nɔɔna Yezu Krista chega kam na ye tei to.#Efesia 6:19 Ko nam ye amo na bere Yezu chega kam to ŋwaane mo pɛ se a laam wo peena diga ne. 4Lwoori-na Wɛ á pa-ne se a wane a pa nɔɔna lɔre chega kam konto maama fase. Mo totoŋe delo Wɛ na pɛ-ne se a ke to.
5Ko ná ye balo na ba tɔge Yezu to, se á ta‑á yei á na wó tɔge chwoŋa kalo á ke-ba tei to. Wɛ ná pɛ abam chwoŋa se á toŋe kolo, se á pa ko ja kuri lanyerane. 6Pa-na se á ni taane taa jege ywoni de mwanno, se á daare á ta‑á yei á na wó leiri nɔɔna maama taane tei to.
7A lage a toŋe dé nu-bu-swono Tichika se o ba abam tei. Wonto toŋe o pa dé Teiru Yezu de o wo maama, ne debam de na toŋe tei to. 8O ná tua, o laam wó ta amo taane maama o bere abam. A lage se o pa abam bochara mo peini tega ne, de á na wó lɔre kolo na wora ko ke debam to. 9Debam nu-bu-swono Onesima de wó tɔge o ba. O déem nwoŋi abam kɔgɔ kom wone mo, ye dé yei o wo lanyerane.#Filimon 10-16 Banto balei wó ta woŋo kolo maama na wora ko ke debam tei ne to ba bere abam.
10Arisaka wolo na tɔge de amo o wo peena diga ne to jɔɔne abam. Maake wolo na ye choro de Banabas to de jɔɔne abam. Abam maŋe á jwoŋi ni se, o ná tua, se á jeeri‑o lanyerane.#Kikia 15:37-39; 19:29 11Yesua wolo yere dedwoŋi na ye Jusitu to de jɔɔne abam. Ko ná ye Juu tiina balo na tu ba sɛ Yezu to, nɔɔna banto batɔ yerane mo ye balo na tɔge ba toŋe Wɛ paare dem totoŋa ba woli amo. Ba kwaane ba pa se a bochare ke dam lanyerane.
12Epafera wolo na nwoŋi abam kɔgɔ kom wone ye o toŋe o pa Yezu Krista to de jɔɔne abam. O kwaane mo o lwoori Wɛ maŋa maama o pa abam, se á wane á zege lanyerane de baare, se á boboŋa kweere de Wɛ chwoŋa tɔgem, ye á tɔge Wɛ boboŋa na lage tei to maama.#Kolosia 1:7 13Amo tete mo zege o chega kam kwaga ne we, o tiini o toŋe o pa abam, de nɔɔna balo na zoore Ladika de Hirapoli ne to.
14Debam badwoŋ-swono Luka wolo na ye dɔkta tu to, dedaane Demas jɔɔne abam.#2 Tim 4:10-11
15Jɔɔne-na dé nu-bia balo na tɔge Yezu ye ba zoore Ladika ne to á pa debam, ko woli de Numifa, de Yezu kɔgɔ kolo na yeini ko tigisi o sɔŋɔ ne to.
16Abam ná jwoŋi amo tɔnɔ konto ye á ná gage á ti, se á laam pa-ko Yezu kɔgɔ kolo na zoore Ladika ne to se ba de ga. Ko daare se abam de jwoŋi amo tɔnɔ kodwoŋi Ladika kɔgɔ kom tei ne á ga á nii.
17Ta-na á bere Achipu se o kwaane o ti totoŋe delo dé Teiru Yezu na pɛ‑o se o ke to.
18Amo Pɔɔl tete mo mɛ a jeŋa a popone jɔɔnem dento na kweeli to. Abam yé zaŋe á swei amo na wo peena diga ne tei to.
Wɛ zaane dem taa wo abam tei ne.
Currently Selected:
Kolosia 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
