1 Tɛsaloni 1
1
1Amo Pɔɔl dedaane Silas de Timoti mo popone tɔnɔ konto se dé pa abam Tɛsaloni tiina balo na ye Wɛ kɔgɔ kom wo nɔɔna ye á tɔge á ye dé Kwo Baŋa Wɛ de dé Teiru Yezu Krista nyem to.#Kikia 17:1-9
Wɛ wó pa abam zaane de yazura.
Tɛsaloni tiina na tɔge Wɛ tei to
2Maŋa maama dé yeini dé ke Wɛ lei á maama ŋwaane, ye dé kwori dé lwoori‑o dé pa abam. 3Dé ná vei dé Kwo Wɛ yiga, dé yeini dé guli á na yɔɔre á tɔge dé Teiru Yezu Krista tei to. Abam na ke á wo-dedoa ded‑o tei to mo pae á toŋe lanyerane. Á na swoi‑o tei to mo pae á toŋe pa ko chɛ á yera. Á na jege teena ded‑o tei to mo pae á zege lanyerane de pu-dɛa.
4Dé nu-bia bam, dé yei we Wɛ mo swoi abam, ye o daare o kuri abam se á ta‑á ye o nyem. 5Kokuri, dé déem na kwei Wɛ kwor-ywoŋa kam dé ja ba dé tɔɔle dé bere abam to, ko dae ni taane yerane mo dé tu dé bere. Wɛ dam wo debam tei ne, de o Sin-laao kom de, ye dé zege o chega kam kwaga ne. Á déem nɛ dé na zoore abam tetare ne ye dé ke tei to. Ko maa ye se ko zeini abam mo.
6Á déem lwoni debam de dé Teiru wom na ye tei to. Á na jwoŋi Wɛ kwor-ywoŋa kam to, ko pɛ se á na yaara dedɛ. Á nam ta jwoŋi-ka de wopwolo, Wɛ Sin-laao kom na zeini abam to ŋwaane. 7Ko ma pa se á dwonna lɔre á na ye tei to, ye Yezu nɔɔna balo na zoore Makedonia de Akaya teene dem ne to maama ta lwoni abam kikia. 8Abam na tɔɔle dé Teiru wom kwora kam á bere nɔɔna tei to, ka yi Makedonia#1:8 Tɛsaloni déem ye Makedonia kateiri dem teo kamunu kom. de Akaya ka gaale ka kɛ ka yi jei maama, ye nɔɔna maama lɔre á na ke á wo-dedoa de Wɛ tei. Mo kokuri dé daa ba jege se dé ta abam kolokolo. 9Nɔɔna bam tete yeini ba tɛ á na jeeri debam lanyerane tei to. Ba lɔre á na yage jwona kaanem mo se á daare á ta‑á tɔge Wɛ. Ba maa tɛ á laam na toŋe á pa Wɛ wom na ye chega tu de ŋwea tu to, 10ye á kwori á cheigi o Bu wom se o jwoori o ba. Wɛ bi‑o toone wone mo, ye o lage o nwoŋi Wɛ telaao ne o ba logo baŋa. Wonto mo ye Yezu wolo na wó jwoŋi debam Wɛ ban-zɔŋɔ kom na wó ba nɔɔna baŋa to wone.
Currently Selected:
1 Tɛsaloni 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
