Kolosia 3

1Abam na nɛ Wɛ ŋwe-doŋa kam to, ko nye de á tɔge de Yezu Krista mo á jwoori á bi toone wone. Yezu laam jege o jeiŋa jei Wɛ jazem seeni. Abam na me ded‑o to, pa-na se Wɛ telaao wonnu tem taa jege fera á tei ne. 2Pa-na se á boboŋa tiini ya zo wo-laaro tem konto, ye ko dae logo baŋa wo-yɔɔro tem. 3Abam na yage wɛleera chwoŋa to, ko nye de á ye twa mo ya tei ne. Á ŋwe-doŋa kam ye Yezu Krista nyem mo, ye Wɛ jege-ka o kwola o tei ne. 4Á ŋwea kam de Yezu Krista ye bedwe mo. Konto ŋwaane, o ná jwoori o ba o bere o tete jaja de o nenɔŋ-fɔrɔ kom, abam de wó tɔge ded‑o á ta‑á jege o nenɔŋ-fɔrɔ kom dwoŋi.

Wɛ ŋwe-doŋa kikia yam taane

5Abam nam jege se á chɔge logo baŋa boboŋ-lwanno mo á bochara ne, se á daa yé zaŋe á sɛ-te. Ko ná ye kabwoŋa mo, naa wo-zɔɔna keim, naa ka-laga kikia, naa ko ná ye á fera na zoore wo-yɔɔro tei, naa á yi su wonnu tei to, se á yé sɛ á tɔge boboŋa yam konto dwoŋi. Nmo nam ná pae n yi su wonnu, ko bere we n pa tento mo zula ne jwona tei to. 6Ko nam na ye tei to, kikia yanto dwoŋi ŋwaane mo Wɛ bane wó zaŋe nabiina baŋa ne. 7Abam tete ŋwea déem tɔge chwei sento dwoŋi mo. 8Ko daare leile konto, abam nam jege se á de wo-balwaaro tem konto maama mo á yage. Yage-na ban-zɔŋɔ de ban-lom maama. Á yé ta‑á boŋe nɔɔna chɔgem. Á yé ta‑á twe nɔɔna. Á yé pa se ta-zɔɔna taa wo á ni ne. 9Yé zaŋe-na á fɔ vwa á pa daane.#Chullu 6:2 Kokuri abam dole á ŋwe-dwoŋa kam á yage de ka kikia maama, 10ye á laam daare á jege ŋwe-doŋa mo. Wɛ mo ye á ŋwe-doŋa kam keiru. O maa wora o fɔge-ka se ka taa nye de o tete ŋwea, se á wane á lɔre o na ye tei to chekke. 11Konto ŋwaane, ko ná ye balo na jege Wɛ ŋwe-doŋa kam to, pɔɔrem tera ba wone. Juu tiina de dwi-gɛ tiina maama ye bedwe mo. Balo peina na gwoni to de balo na wo gwoni to de maama ye bedwe. Balo na ye veira to de balo yi na wo poore to, ko woli de kabɛ de balo na tei ba tete to maama ye bedwe mo. Ba maama ŋwea wora Yezu Krista ŋwaane mo ye o me de ba maama.#Rom 10:12

12Wɛ mo kuri abam se á ta‑á ye o nyem, ye o jege abam swono. Konto ŋwaane, ta‑á jege-na da-ŋwaŋa, de da-zula. Ta‑á gwooni-na á tete da-tei ne, se á ta‑á nege daane de ban-peno. 13Ta‑á zuri-na á yera á pa daane. Abam wolo ná jege o dwoŋi taane, se á yage á ma á chɛ daane, ne dé Teiru Yezu na yage abam wɛleera o ma chɛ abam tei to.#Matiyu 6:14; Efesia 4:2 14Konto maama wone ta‑á jege-na da-swono, se ko pa á wane á tɔge chwoŋa de ni dedwe. 15Pa-na se á boboŋa maama taa tɔge bochare-zuru, ne Yezu Krista na pɛ á jege tei to. Abam na ye kɔgɔ dedoa to, Wɛ kuri abam se á ta‑á tɔge daane de bochare-zuru konto dwoŋi mo. Maŋa maama se á ta‑á ke Wɛ lei. 16Pa-na se Yezu Krista taane dem tiini de zo abam bochara de fɔge-ya lanyerane. Á ta‑á mae boboŋ-dɛɛra á bere daane Wɛ chega kam, se ko pa á lɔre chwoŋa kalo na lana to. Ta‑á leeni-na Wɛ seinim lei, de Yezu kɔgɔ kom lei, de Wɛ Sin-laao kom na pɛ abam lei selo to. Ta‑á leeni-na konto á pa Wɛ, ye á ke‑o lei. 17Woŋo kolo maama abam na wora á ke de á ni, naa de á jeŋa to, se á pa ko taa ye dé Teiru Yezu yere ŋwaane, ye á daare á tɔge o ŋwaane á ta‑á ke dé Kwo Wɛ lei.

Nɔɔna maama na jege se ba tɔge chwoŋa kalo to

18Kaana jege se ba sɛ ba pa ba banna, ne ko na maŋe de balo na tɔge dé Teiru Yezu to.

19Ko nam ná ye kan-banna, se á ta‑á swoi á kaana, se á yé ta‑á ke keim-chɛɛre de-ba.

20Ko nam ná ye bia, á na sɛ dé Teiru Yezu to, ko maŋe se á sɛ á tiina ni mo maŋa maama, se konto mo lamma Wɛ tei ne.

21Ko daare ko ná ye bia tiina, se á yé ta‑á chuchugi á bia bana, se konto wó pa ba boboŋa chɔge chwoŋa kalo na lana to wone.

22Ko ná ye balo na ye kabɛ to, se á ta‑á toŋe á tɔge á yuu tiina boboŋa woŋo maama baŋa ne. Ko nam dae ba na zege ba nii abam maŋa kalo to yerane mo á wó ke konto se á jwoŋi zula ba tei ne. Maŋa maama ta‑á toŋe-na de á wo maama, á na kɔre dé Teiru wom to ŋwaane. 23Woŋo kolo maama á na toŋe to, se á ta‑á toŋe de jawala. Pa-na se á na ke tei to taa ye dé Teiru wom ŋwaane, ye ko dae nabiina yerane ŋwaane. 24Kokuri á yei we dé Teiru Yezu Krista wó pa abam nyɔɔre delo o na tiŋi se o pa o nɔɔna bam to. Wonto mo ye á yuu tu wolo á na toŋe á pa to. 25Ko daare wolo maama na ke o chɔge to wó jwoori o na chɔgem se ko maŋe de o kikia yam na ye tei to. Wɛ nam tɔge chega de o na ke nɔɔna maama tei to ye o ba kuri-ba daane.

Currently Selected:

Kolosia 3: KBG

Highlight

Copy

Compare