Kikia 27

Pɔɔl maa vei Yitalia

1Ba déem laam na boŋe se ba pa dé zo nabworo dé vo Yitalia to, ba ma ja Pɔɔl de peena badwonna ba ke soja yiga tu wodwoŋi jeŋa ne, o yere na ye Juliu to. O nwoŋi Pa-faro wom tete soja tiina kɔgɔ kom wone mo. 2Dé ma na nabworo, ko nwoŋi Adaramuta ye ko lage ko vo teene delo na wo Asia naneo kom ni ne to. Dé ma vo dé zo ko wo dé tɔge dé kɛ. Arisaka de ma tɔge debam o kɛ. Wonto nwoŋi Makedonia teo kodwoŋi ko yere na ye Tɛsaloni to mo.#Kikia 19:29

3Tega na poore to, dé ma vo dé yi Sidon. Juliu ma duri Pɔɔl ŋwaŋa ye o pa‑o chwoŋa se o vo o badwonna tei se ba ke kolo o na lage to ba pa‑o. 4Dé ma zaŋe dé yage dáane se dé kɛ naneo kom wo. Vo-dɛɔ maa jeeri debam ko maga. Konto ŋwaane dé ma jwoori dé dale Kupirus teo buburu kom yera dé kɛ. 5Dé ma daare dé tɔge naneo kom wo dé vo dé da Kilikia dé Panfilia tei dé kɛ. Dé ma vo dé yi Lukia teo kodwoŋi, ko yere mo Mura. 6Dé na yi da to, soja yiga tu wom ma na nabworo kodwoŋi ko na nwoŋi Alɛzandaria ko maa vei Yitalia to. O ma pa se dé zo-ko. 7Dé maa wo naneo kom wone dé vei fenfee ye dé ke da kɔgɔ kɔgɔ. Ko ma tiini ko chamma ye dé vo dé yi Kanidu na bwola mɛ to. Vio kom na jeeri debam ko mage konto to, dé daa ma ware dé yɔɔre yiga dé kɛ. Konto ŋwaane dé ma vo dé dale Kiriti buburu kom yera dé kɛ dé da Salimwoni jei sem. 8Dé ma yɔɔre dé dale buburu kom yera. Ko ma tiini ko chamma ye dé laam yi jei selo yere na ye ‘Nabwooru Gugwor-laao’ to. Lasea teo kom bwola de jei sem konto.

9Debam ma tiini dé dáane jei sem konto ne. Ko ma ba ko yi maŋa kam ko na damma se nɔɔna ja nabworo ba zo naneo kom wo to. Juu tiina ni-vɔɔm dɛ dem maŋe de kɛ ye ko daare se bene dem mo ti. Pɔɔl ma kaane-ba o we, 10“A badwonna bam, amo na nɛ kolo to, dé ná zaŋe se dé daa kɛ, dé wó na dé chaveera. Dé wonnu maama lage te chɔge mo. Ko dae nabworo kom de ko zela yam yerane, ko wae se debam tete de ga dé ŋwea.” 11Pɔɔl na tage konto to, soja yiga tu wom maa wo sɛ o na tage kolo to, ye o daare o sɛ nabworo kom tu wom de wolo na chwo-ko to taane dem. 12Nabwooru gugworo kom mɛ ba na wora to ba lana se ba taa tigi da se vo-dɛɔ kom maŋa kam ba ka kɛ. Nɔɔna bam dedɛ boboŋa ma ja se ba zaŋe ba kɛ naneo kom wo se ba kwaane ba nii ba wó wane ba yi Fonikas na. Fonikas wo Kiriti ne ye ko jege nabwooru gugworo kolo kwaga na yage vio kom to mo. Ba ná yi da, ba wó wane ba taa tigi da se vio kom maŋa kɛ.

13Vio laam ma nwoŋi tega-kuri seeni ko dole mɛmɛ. Nɔɔna bam maa boŋe we, ba wó wane ba na chwoŋa ba ke kolo ba na boŋe to mo. Ba ma ti ba yiga se ba kwei nabworo kom ba kɛ. Ba maa dale Kiriti buburu kom yera ba maa kɛa. 14Debam maa wo yi yiga yiga ye vo-dɛɔ zaŋe ko zege bubɛ dem ne ko ba ko mage debam. Ba déem bwoŋi vio kom konto yere we, ‘Yurakulu’. 15Vio kom na tiini ko mage debam konto to, dé daa ma ware se dé pa nabworo kom yɔɔre vio kom na nwoŋi mɛ to. Dé na kwaane dé ga to, dé ma yage nabworo kom dé pa vio kom. 16Vio kom ma ja debam ko vo ko pa se dé dale buburu kodwoŋi yera pa se vio kom daa ba mage debam dedɛ. Bubɛ dem konto yere mo Kɔda. Dé ma tiini dé toŋe cham dé liiri nabworo-balaŋa kam dé ke nabworo-kamunu kom wone se ka yé chɔge. 17Nɔɔna bam na ke konto to, ba ma kwei ŋone ba pa se tɔge nabworo-kamunu kom kuri ye ba vɔ ko maama. Ba maa kɔre foone we vio kom wó zege ko mage-ba ko ja vo na-kwala jei selo yere na ye Suritis to. Konto ŋwaane ba ma kwaane ba cheiŋi nabworo kom pa se ko daa ba tiini ko dura, ye ba yage-ko ba pa vio kom. 18Vo-dɛɔ daa ta ma tiini ko mage debam. Tega na poore to, ba ma bobo se ba le nabworo kom zela yam ba dole ba yage na bam wone se ko daa ye taa duna. 19Tega daa na poore to, ba tete ma ma ba jea ba le nabworo kom yera wonnu ba de na bam wone. 20Ko déem ye da kɔgɔ kɔgɔ mo debam na wo nɛ wea kam de chalechwe sem. Vo-dɛɔ daa ta maa tiini ko mage debam ye ko ba yaga. Debam daa ba teena we dé wó wori.

21Nɔɔna bam maa na vei taa ye ba ba di wodiu to, Pɔɔl ma zaŋe o zege ba wone o ta-ba o we, “A badwonna bam, abam ya ná sɛ amo ni ye dé wo yage Kiriti, dé ya bá na chɔgem de chaveera yanto dwoŋi. 22Amo laam nam lwoori abam se á ta‑á jege pu-dɛa. A yei we abam wolowolo bá ga o ŋwea, se ko ye nabworo kom yerane mo wó chɔge. 23Ko ye diim tete ne mo Wɛ wolo na tei amo ye a ye o tontoŋeno to toŋe o maleka amo tei ne. 24Ka ma ta ka we, ‘Pɔɔl, ye ta‑n kɔre foone, se nmo jege se n vo n zege Pa-faro wom yiga ne mo. Wɛ ye ŋwaŋa tu ye o wó pa se nɔɔna balo na tɔge ba wo nabworo kom wone to de jwoŋi ba ŋwea.’ 25Konto ŋwaane, a badwonna bam, ta‑á jege-na pu-dɛa. Amo jege teena Wɛ tei ne we, maleka kam na tage o bere-ne kolo to wó seene ko ke. 26De konto de, vio kom jege se ko mage debam ko ja vo ko zege bubɛ dedwoŋi yuu ne.”

27Vio kom déem maa mage debam taa ko jege ko kɛa Adaria naneo kom wone. Ko ma yi debam da fuga-yana tete ne. Tete kokoro ne balo na chwo nabworo kom to maa boŋe we dé wora dé twɛ bubɛ mo. 28Ba ma kwei kandwɛ na leiga ŋwana ni ne ba de na bam wone se ba lɔre ba na luuna tei to. Ba ma na we na bam luuna ba maŋe nenɛɛne miita finna mo tei. Ko na ke fee to, ba daa ma ke konto ye ba na we na bam ta luuna ko maŋe de miita fintɔ. 29Ba ma kɔre foone we, vio kom wó mage nabworo kom ko ja vo ko mage de peero. Konto ŋwaane ba ma le nabworo kom zegem luuru tena ko kwaga ne ba de na bam wone. Ba ma daare ba lwoori Wɛ taa, se tega ba ka poore. 30Nabworo kom chwoona bam ma boŋe se ba lu se ba daare nabworo kom. Ba ma le nabworo-balaŋa kam ba de na bam wone ye ba ke nenɛɛne ba lage ba vo se ba le nabworo kom yiga luuru tem mo tei. 31Pɔɔl na lɔre ba na boŋe se ba ke tei to, o ma ta de soja yiga tu wom de o nɔɔna bam o we, “Nɔɔna banto ná nwoŋi ba daare nabworo kom, abam bá wane á jwoŋi á ŋwea.” 32Pɔɔl na tage konto to, soja tiina bam ma gwoni ŋone selo ba na mɛ ba lei nabworo-balaŋa kam to ba de-ka ba yage.

33Tega na wora ka poore to, Pɔɔl ma lwoori ba maama se ba zaŋe ba di wodiu. O ma ta de-ba o we, “Zem mo jege da fuga-yana lwia dedɛ na jege abam ye á peene kana á ba di wodiu. 34A nam lwoori abam se á zaŋe á di wodiu. Á ná wo ke konto, á bá wori. Á ta‑á yei we abam ba lage á yu-yua tete á ga.”

35Pɔɔl na tage konto o ti to, o ma kwei bworobworo o zege ba maama yiga ne o ke Wɛ lei ye o daare o fɔ-ko o wora o di. 36Ko ma pa se ba maama laam ke pu-dɛa ye ba di wodiu. 37Debam maama ni déem ye nɔɔna bia yalei de fuserepɛ-baredo (276) mo nabworo kom wone. 38Nɔɔno maama na di o zaŋe to, ba ma le mena ywollu tem nabworo kom wone ba de na bam wone, se ko daa yé taa duna.

39Tega laam na poore to, nɔɔna bam maa yeiri buburu kolo ni ne ba na wora to. Ba ma nii ba na gugworo na na vei ba tigi da to. Ba maa boŋe se ba nii ba wó wane ba pa se nabworo kom tɔge dáane ko bɛ na. 40Ba ma gwoni ŋone selo na leigi nabworo kom zegem luuru tem to ba yage pa se te misi na bam wone. Ba ma daare ba bwoli ŋone selo na vɔge nabworo kom naywi sem to se ba taa pae ko vei ne ba na lage tei to. Ba laam ma kwei gɔrɔ ba lei nabworo kom yiga ne se vio kom taa maga se ko yɔɔre ko bɛ. 41Nabworo kom ma vo ko yi na-kwala jei ko cheiŋi da. Ko yiga kam ma moore kasolo wone ye ka daa ware ka le. Ko daare na bam maa tiini ba pɔgele ye ba mage nabworo kom kwaga kam pa se ka wora ka chɔga yera yera.

42Soja tiina bam déem ma ke ni daane se ba ja peena bam ba go, se ba wolowolo yé zaŋe o yɛ o vere o tete ba jea ne. 43Ba yiga tu wom maa lage se o jwoŋi Pɔɔl ŋwea. O ma che-ba se ba yé ke kolo ba na boŋe to. O ma daare o pa ni se nɔɔna balo na wó wane ba yɛ ba nwoŋi to, se ba da yiga ba faŋe ba chu na bam wone se ba yɛ ba bɛ, 44se balo na daare to kwei nabworo kom da-dedwaaro tem naa ko wonnu telo na bwori to ba ma yɛ ba bɛ. Konto mo debam maama ke dé ma jwoŋi dé tete.

Currently Selected:

Kikia 27: KBG

Highlight

Copy

Compare