Kikia 26

Pɔɔl ŋɔɔne o pa o tete

Kikia 9:1-19; 22:3-20

1Fɛsitu na ŋɔɔne o ti to, Agiripa laam ma ta de Pɔɔl o we, “Nmo jege chwoŋa se n ŋɔɔne n pa n tete.” Pɔɔl ma zeiŋi o jeŋa ye o laam daare se o ŋɔɔne o jwoŋi o tete. 2O maa we:

“Pɛ Agiripa, amo zem jege wopwolo de a na zege nmo yiga ne se a ŋɔɔne a jwoŋi a tete de Juu tiina bam na saŋe-ne wonnu telo maama ŋwaane to. 3Amo seene a jege wopwolo, nmo na tiini n yei Juu tiina chullu tem de ba ni-kantɔgɔ na ye tei to ŋwaane. Mo kokuri a lwoori‑m se n kwaane n cheigi a taane dem.

4Juu tiina bam maama maŋe ba yei amo ŋwea na ye tei a biini ne, se ko ba ko yi zem. Banto nam yei ba na loge-ne maŋa kalo ye a wo amo tete teo kom ne de Jerusalem ne to maama. 5Ba maa maŋe ba yei we ko ye boboa ne mo amo maŋe a tɔge a wo Farisi tiina kɔgɔ kom wone ye a tɔge a sɛ ba chullu tem na tiini te damma te dwoi debam Wɛ chullu tem maama to. Ba ná laga, ba ya wó wane ba ta we konto ye chega mo. 6Woŋo kolo ŋwaane ye a zege ywo-seeni zem se ba bwei amo taane to ye a na jege teena we, Wɛ wó bi twa toone wone ne o na pwooli de dé nabaara bam se o ke tei to. 7Debam Isarele dwia fuga-yalei maama tiini dé zuli Wɛ wea de tete maama ye dé jege teena se dé na Wɛ na gwoni o ni se o ke wonnu tento dwoŋi to. Pɛ, amo na jege o teena yam konto to mo pɛ se Juu tiina bam jege-ne ba saŋa. 8Wɛ nam bá wane o bi twa toone wone na? Bɛŋwaane mo abam ware se á sɛ konto?

9Ko ná ye amo tete de, a déem boŋe we, a ná wae kolo maama a ke se ko chɔge Yezu na ye Nazarete tu to yere. 10Amo ke tento maama Jerusalem ne. Juu tiina kaanem yiga tiina bam déem mo pɛ-ne chwoŋa se a taa jaane Wɛ tete nɔɔna a ke peena diga ne. Ba ta ná yeini ba go-ba, amo wó pu balo na go-ba to kwaga. 11Kuni dedɛ amo maa yeini a kare a vei Juu tiina jeerim di sem maama ye a jaane-ba a pa ba na waarem. A maa kwaane a fe-ba se ba twe ba Teiru wom yere. A bane na tiini de zaŋe de-ba to, a yeini a tɔge ba nɛ a vei teene yiga yiga ye a jege-ba a bɛɛsa.#Kikia 8:3

12Dɛ dedwe mo a zaŋe a maa vei Damasika se a zeili Yezu nɔɔna konto dwoŋi. Juu tiina kaanem yiga tiina bam ya pɛ-ne chwoŋa de dam se a vo da a yaare-ba. 13Pɛ, debam déem wo chwoŋa ne mo dé via. Ko ye wea tetare ne mo. Amo ma na pwooni na tiini de dana de dwoi wea kam na ye tei to de nwoŋi wɛyuu ne de ba de kekare amo de balo na tɔge de amo to. 14Debam maama ma to tega ne. Amo ma ni kwora na ŋɔɔne de Juu tiina taane ka we, ‘Sɔɔl, Sɔɔl, bɛ mo ye n jege-ne n bɛɛsa konto? Nmo ke nenɛɛne nabea ná kwaane se ka ta wolo na jege-ka o pa to mo. Nmo wó jwoori n chɔge n tete mo.’ 15A ma bwei a we, ‘Amo tu, n ye wɔ mo?’ Dé Teiru wom ma ta o we, ‘Amo ye Yezu wolo nmo na jege n bɛɛsa to mo. 16Nam zaŋe n zege wɛɛne. Amo veere a tete a pa nmo se a wane a le‑m se n ta‑n ye a tontoŋeno mo, se n daare n pa se nɔɔna lɔre nmo zem na nɛ kolo amo tei ne, de kolo amo na wó bere nmo to. 17Amo wó jwoŋi nmo Juu tiina bam jeŋa ne a yage, de dwi-gɛ tiina bam jeŋa ne. Amo laam nam wó toŋe‑m se n vo dwi-gɛ tiina bam tei, 18se n pa ba yia puri n daare n le-ba lim wone n yage pwooni yiga ne. Nmo wó le-ba setaana pɛ dam wone n daare n ke-ba Wɛ jeŋa ne. Konto to, Wɛ wó yage ba wɛleera o ma chɛ-ba pa se ba na jeiŋa jei o tete nɔɔna bam wone, ba na ke ba wo-dedoa de amo to ŋwaane.’

19Pɛ Agiripa, Wɛ na le o bere-ne keim delo na nwoŋi o telaao ne to, a yɔɔre a sɛ-de mo. 20Amo bobo a ta Wɛ kwora a bere nɔɔna Damasika ne mo, de Jerusalem ne, ko woli de Judea teene dem maama ne, de dwi-gɛ tiina bam de tei ne. A bere-ba se ba leiri ba wo se ba daare ba pipiri ba taa tɔge Wɛ, se ba taa tɔge kikia yalo na wó bere we ba seene ba leiri ba wo to mo. 21Konto ŋwaane mo Juu tiina bam jaane-ne maŋa kalo a na wo Wɛ diga kam ne to. Ba ma kwaane se ba go-ne. 22Wɛ nam mo woli-ne se ko ba ko yi zem. Konto ŋwaane mo a zege ywo se a ta chega a bere nɔɔna maama, ko ná ye nɔn-kamuna naa nɔɔno de nɔɔno de. Amo na yeini a tɛ kolo to ye bedwe mo de faŋa faŋa Wɛ sampwori sem de Moses tete déem na tage we ko wó ke to. 23Konto mo ye we Wɛ Dam Tu Krista jege se o na yaara ye o ji wolo na wó da yiga o bi toone wone o vo Wɛ tei.#Luka 24:35 O maa wó pa Juu tiina bam de dwi-gɛ tiina bam de na pwooni se Wɛ jwoŋi-ba.”

24Pɔɔl na wora o ŋɔɔne o pa o tete konto dwoŋi to, Fɛsitu ma zaŋe o ta de kwor-dɛa o we, “Pɔɔl, nmo yirisi mo! Nmo na zamese tɔnɔ dedɛ to mo pɛ n boboŋa tera konto.” 25Pɔɔl ma leiri o we, “Debam tu Fɛsitu, ko dae we a yirisi. Amo na zege a tɛ kolo to ye chega mo ye ko jege swa lanyerane. 26Pɛ Agiripa maŋe o yei wonnu tem konto ni ne. Amo wó wane a ŋɔɔne a taane ded‑o jaja. Amo yei we a na ŋɔɔne kolo maama to dae wo-doŋo o tei ne, kolo ŋwaane keim dem konto wo seigi de ke gugworo ne. 27Pɛ Agiripa, nmo sɛ faŋa faŋa Wɛ sampwori sem na bere kolo to na? A yei we n sɛ.” 28Agiripa ma ta de Pɔɔl o we, “Nmo boŋe se n ke lela n pa se amo tɔge a ji Krista bu mo na?” 29Pɔɔl ma leiri o we, “Ko ná ye lela naa ko ná dáane, amo lwoori Wɛ se o pa nmo de ji ne amo na ye tei to. Ko nam dae nmo yerane, se ko ye balo maama zem na jei ba cheigi amo taane dem to mo de. Amo lage se á maama ji ne amo tei, ko ná dae ba na vɔge-ne de chaponno tem to yerane mo a ba lage se á na.”

30Pɛ wom, de gɔmena tu Fɛsitu, de Bɛnisi, de balo maama na wora to laam ma zaŋe ba nwoŋi. 31Ba na nwoŋi to, ba maa ŋɔɔne daane ye ba we, “Nɔɔno wonto kikia wo maŋe se o na toone naa se ba ke‑o peena diga ne.” 32Agiripa ma ta de Fɛsitu o we, “Dé ya wó wane dé le nɔɔno wonto dé yage, ko ná dae o na ke o tete Pa-faro wom jeŋa ne to ŋwaane.”

Currently Selected:

Kikia 26: KBG

Highlight

Copy

Compare