Kikia 28

Ko na ke tei Maleta ne to

1Dé na wori dé bɛ bubɛ konto to, dé ma lɔre we bubɛ dem konto yere mo Maleta. 2Nɔɔna balo na zoore dáane to maa tiini ba jege debam ŋwaŋa. Doa maa bobo ka wora ka nena pa se waaro wora. Ba ma dwei mini ba pa debam maama se dé weeri. 3Pɔɔl ma puuri dɛ o wora o ke mini dem wone. Mini dem fonyogo ma pa se basankwea nwoŋi dɛ sem wone ka kekare Pɔɔl jeŋa ka lei da.#Maake 16:18 4Teo kom tiina bam ma na basankwea kam na leigi Pɔɔl jeŋa kam ne to. Ba maa tɛ daane ba we, “Keim dento bere we nɔɔno wonto ye nɔn-goro mo. O na lugi naneo kom wone to, ko nam wo maŋe se o taa ŋwe. Wɛ wo sɛ se o wori.”

5Pɔɔl ma miisi basankwea kam o de mini dem wone ye kolokolo wo ke‑o. 6Ba maa zege ba cheigi ba nii se o yera ga wó fole mo naa o pɔpɔ o to tega ne o te. Ba na cheigi konto taa to, ba maa wo nɛ we kolokolo ke‑o. Ba ma leiri ba boboŋa o ŋwaane ye ba daare ba we, “Nɔɔno wonto ye wɛ dedwoŋi mo!”

7Jeiga kam konto seeni nɔɔno wodwoŋi kara bwola da. Nɔɔno wom yere mo Pubilu. Wonto mo ye teo kom konto dedɛɛro. O ma jeeri debam lanyerane o sɔŋɔ ne. Dé ma ke da yatɔ da. 8O kwo maa tigi o weela. Paa de wo-zuru mo jege‑o. Pɔɔl ma zo o diga kam se o na‑o. O ma lwoori Wɛ o pa‑o, ye o zi o jea o baŋa ne pa se jaweo kom jei. 9O na ke konto to, teo kom tiina balo maama na weele to maa tui o tei ye o pa ba na yazura. 10Ba ma kwei pɛɛra dedɛ ba ja ba ba pa debam. Maŋa kalo dé daa na lage dé zo nabworo se dé kɛ to, ba ma ke kolo maama dé na lage to nabworo kom wone se dé ja kɛ.

Ba vo ba yi Rom

11Dé déem ke chane setɔ mo teo kom konto ne ye dé laam na nabworo kodwoŋi kolo ba na bwoŋi we ‘Wa-yeywa’ to. Ko déem nwoŋi Alɛzandaria mo ko ba ko zege bubɛ dem konto ni ne taa ye vo-dɛɔ kom maŋa kɛ. Dé déem ma zo ko wo se dé kɛ. 12Dé ma tɔge naneo kom wo dé vo dé yi Sirakuza. Dé ma peini da da yatɔ. 13Dé ma zaŋe dáane dé tɔge naneo kom wo dé vo dé yi Rɛgimu. Tega na poore to, vio ma zaŋe dé kwaga ne ko bobo se ko taa maga. Dé ma ke da yalei ye dé vo dé yi Putioli dé zege da. 14Dé ma nwoŋi nabworo kom wone dé vo dé maŋe de Yezu tɔgena badwonna. Ba ma lwoori debam se dé ke da yarepɛ ba tei ne. Dé ke konto mo ye dé laam vo dé yi Rom. 15Yezu tɔgena balo na wo Rom ne to ma ni debam ŋwa. Ba ma zaŋe Rom ne se ba nwoŋi ba jeeri debam chwoŋa ne. Ba déem tu ba yi Apiu yaga kam na wo mɛ to, ye badaara de déem ba jei selo ba na bwoi we ‘Veira Di Setɔ’ to se ba jeeri debam. Pɔɔl na nɛ-ba konto to, o ma ke Wɛ lei ye o daare o su de dam. 16Dé na vei dé yi Rom konto to, ba ma pa Pɔɔl chwoŋa se o taa zoore o na lage mɛ to, ye ba pa soja tu taa tɔge‑o o yera.

Pɔɔl bere Wɛ chega kam Rom ne

17Da yatɔ na kɛ to, Pɔɔl ma bwoŋi teo kom Juu tiina nakwa se ba tigisi daane. Ba na tu ba wora konto to, Pɔɔl ma ta de-ba o we, “A nu-bia bam, amo wo ke kolokolo a chɔge debam nɔɔna bam wo, naa a chɔge chullu telo dé nabaara bam na tiŋi ba pa debam to. De konto de, ba jaane amo Jerusalem ne ye ba laam ke-ne Rom tiina jeŋa ne se a taa ye peeno. 18Ba déem bwei-ne taane se ba nii. Ba maa wo nɛ amo na ke kolo a chɔge se ko pa ba go-ne to. Konto ŋwaane ba ya maa lage se ba yage amo. 19Juu tiina bam maa wo sɛ konto. Mo kokuri ko déem ye fefeo mo ko pa-ne se a ke a tete Rom Pa-faro wom jeŋa ne se o di a taane. Ko nam dae we amo ya jege taane mo de a tete dwi tiina bam. 20Konto ŋwaane mo amo bwoŋi abam se á ba se dé ŋɔɔne daane dé nii. Ba na vɔge amo de chaponno tem to, ko ye amo na sɛ wolo wom Juu tiina bam na jege o teena to ŋwaane mo.”

21Pɔɔl na tage konto to, ba ma ta ded‑o ba we, “Debam nam wo jwoŋi tɔnɔ Judea tiina bam tei ne ba na popone ba ta nmo taane to. Debam ta wo nɛ dé nu-bu wolowolo na nwoŋi da o ba o ta nmo taane o bere debam, naa o ta wo-balɔrɔ o pa nmo. 22Debam nam wó taa lage se dé lɔre nmo na jege kolo n boboŋa ne to. Kolo ŋwaane ko ná ye nmo na tɔge chwo-doŋa kalo to, dé maŋe dé yei we nɔɔna yeini ba ŋɔɔne ba yaale-ka jei maama ne mo.”

23Ba laam ma lage dɛ ba pa Pɔɔl. Dɛ dem na yi to, nɔɔna dedɛ ma ba jeiga kalo Pɔɔl na zoore da to. Ba na tu konto to, o ma tiini o ŋɔɔne o bere-ba taa, ko zege zezeŋa ne se ko vo ko yi dedaan-ni. O ma ta Wɛ paare dem na ye tei to o bere-ba. O ma ma Wɛ chega kalo na popone Moses nia tɔnɔ kom ne, de faŋa faŋa Wɛ sampwori sem twanno tem wone to o bere-ba, ye o kwaane se o pa ba sɛ chega kalo o na tɛ Yezu ŋwaane to. 24O na bere-ba konto to, badaara ma sɛ o taane dem. Badaara de maa wo sɛ. 25Ba ma zaŋe se ba viiri ye ba mage ni-kantɔgɔ daane Pɔɔl ya na tage kolo to baŋa ne. Ba ta na wo viiri to mo Pɔɔl tage taane dento o woli da:

“Wɛ Sin-laao kom déem tɔge Wɛ sampwora Izaya kwora mo ko ta chega de abam nabaara bam we:

26Véi a nɔɔna bam tei n ta de-ba we:

‘Abam wó fɔge á ta‑á cheigi Wɛ taane dem,

ye á bá ni de kuri.

Abam yia nam wó kwaane ya nii,

ye á na nɛ kolo to bá zo á yuu.’

27Kokuri nɔɔna bam konto boboŋa seene ya te mo.

Ba zwa de ma kwareme,

ye ba daare ba pu ba yia.

Ko ná dae konto, ba yia na nɛ kolo to

jege se ko zo ba yuu mo.

Ba zwa de ya jege se ya ni Wɛ taane dem,

ye ba boboŋa de wó lɔre de kuri.

Ba ya ná ke konto, ba ya wó pipiri ba sɛ amo Wɛ

se a pa ba na fɔgem.”#Izaya 6:9-10

28Pɔɔl laam ma ta o kweeli o we, “Á nam ta‑á yei-na we Wɛ pɛ se dwi-gɛ tiina mo lɔre o na wó jwoŋi-ba o yage tei to. Banto nam mo wó sɛ.” [29O na tage konto to, Juu tiina bam ma nwoŋi o tei ne. Ba na maa viiri to, ba ma tiini ba mage ni-kantɔgɔ ba pa daane.]

30Pɔɔl déem ke bena yalei mo jei sem konto ne. O maa zoore o na lage mɛ to ye o ŋwe sabu. O maa yeini o jeeri nɔɔna balo maama na tui o tei se ba na‑o to. 31O maa yeini o bere Wɛ paare dem chega kam ye o tɔɔle dé Teiru Yezu Krista kwora. O déem ŋɔɔne de baare mo ye nɔɔn-nɔɔno wo chege o yiga.

Currently Selected:

Kikia 28: KBG

Highlight

Copy

Compare