2 Tim 4
4
Timoti na wó taa bere Wɛ chega kam tei to
1Timoti, a lage a ta nmo Baŋa Wɛ de Yezu Krista yiga ne, se n seene n yia n ta‑n toŋa n pa Wɛ. Yezu mo ye wolo na wó ba o di nɔɔna maama taane, nɔn-ŋwena dedaane twa maama de. O maa wó jwoori o ba o veere o tete nabiina yiga ne ye o daare o di paare o nɔɔna baŋa ne. 2Mo kokuri n jege se n ta‑n tɔɔle Wɛ kwora kam. Fɔge n ta‑n ke konto, ne nɔɔna ná sɛa, naa ba ná ba sɛa de. Nam bwɛ-ba n pa ba lɔre ba na tusi tei to, se ba daare ba jwoori ba tɔge chwoŋa. Kwoori nɔɔna se ba taa jege pu-dɛa, se n bere-ba lanyerane de ban-peno. 3Kokuri, maŋa wó ba ye nɔɔna daa bá sɛ ba taa cheigi berem delo na ye chekke to. Ba laam wó daare ba taa tɔge ba tete boboŋa na lage tei to mo, ye ba pa se berem tiina dedɛ taa wo ba tei ne ba bere-ba wonnu telo maama ba na lage se ba ni to. 4Ba laam wó se ba zwa se ba yé taa cheigi Wɛ chega kam, ye ba daare ba sɛ nabiina sensɔle selo na ba jege kuri to. 5Ko daare nmo nam jege se n ja n tete mo de wonnu maama. Vɔ n wo yaara wone. Kwaane n ta‑n toŋa se n pa nɔɔna lɔre Wɛ kwor-ywoŋa kam. Totoŋe delo maama Wɛ na ke nmo jeŋa ne to, se n toŋe-de n ti maama.
6Ko nam ná ye amo, a ŋwea lage ka ti mo, ne ba na pwori wo-nyɔɔro pɛɛre ba yage tega ne tei to. Maŋa kam yia se amo yage logo baŋa se a vo Wɛ tei. 7Amo na jege a ŋwea tei to nye de a yɔɔre a wo jaŋa wone mo chwori. Amo kwaane mo a peene a tete a duri taa, se a vo a yi de kweelim jei. Amo daa ta sɛ Wɛ chega kam, a wo yage.#Kikia 20:24 8Konto to, amo pɛɛre dem laam tigi Wɛ tei ne de cheigi-ne, amo na jege chega o tei ne to ŋwaane. Dé Teiru Yezu mo ye wolo na yɔɔre o tɔge chega o di nabiina taane chekke to. O dɛ-kamunu kom ná yia, o wó kwei a pɛɛre dem konto o pa-ne. Ko nam dae amo yerane mo o wó pa pɛɛre dem konto. O nam wó pa balo maama de na swoi‑o ye ba jege teena we, o wó jwoori o ba o veere o tete to mo.
9Nam kwaane se n ba amo tei lela. 10Demas zaŋe o jwoori amo kwaga ne mo, ye o daare o kɛ Tɛsaloni, o boboŋa na tiini ya zo logo baŋa wo-yɔɔro tem to ŋwaane. Kerɛseka ma kɛ Galatia. Titusi de ma kɛ Dalmatia. 11Luka yerane mo wo a tei ne.#Kolosia 4:14 Nmo nam ná ma‑n beena, se n pa Maake tɔge o ba, kolo ŋwaane wonto wae o woli-ne de Wɛ totoŋa yam. 12Kokuri amo toŋe Tichika Efesia ne, ye o daa tere amo tei ne.#Kikia 20:4 13Nmo ná ma‑n beena, se n ja amo gɔrɔ kom a na yage Torase ne Kapusi tei ne to n ja n ba n pa-ne, dedaane twanno tem de. A tiini a lage tɔn-lilirru tem se a ga.
14Alezanda wolo na ye luru to tiini o ke lwarem mo o pa-ne. Dé Teiru wom nam wó waare‑o de o kikia yam konto.#1 Tim 1:20 15Nam ja n tete ded‑o, kolo ŋwaane o kwaane se o chɔge debam na yeini dé bere chega kalo to mo.
16Bobo ye a zege a tole a taane dem se a jwoŋi a tete to, nɔɔn-nɔɔno wo tu o zege amo kwaga ne. Ba maama duri ba yage amo yerane mo. Wɛ nam bere o yé taa jege taane de-ba konto ŋwaane. 17Dé Teiru wom nam zege amo kwaga ne, ye o pa-ne dam se a kwaane a tɔɔle Wɛ kwora se dwi-gɛ tiina maama cheigi-ka. Konto to, Wɛ nam mo jwoŋi amo toone jeŋa ne o yage. 18Dé Teiru wom nam wó jwoŋi-ne wo-lwanno maama wone o yage, ye o daare o ja-ne o vo o zo o telaao paare dem wone de yazura. Wonto maŋe de zula se ko taa vei wuu. Ameena.
19Jɔɔne Pirisila de Akwila n pa-ne, dedaane Onesifɔrɔ sɔŋɔ tiina bam maama.#Kikia 18:2 20Erasitu laam maŋe Korinti ne mo. Ko daare amo yage Torofima Militus ne, o na ba jege yazura to ŋwaane.
21Kwaane se n ke lela n ba ye yadɛ ta wo yi. Yubulu, de Pudɛnza, de Linusi, de Kaludia, ko ta woli de dé nu-bia bam maama jɔɔne‑m lanyerane.
22Dé Teiru wom wó taa wo nmo bochare ne.
Wɛ zaane dem taa wo abam tei ne.
Currently Selected:
2 Tim 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
