2 Tim 3
3
Logo baŋa kweelim da yam taane
1Ta‑n yei we lɛɛro dedɛ wó taa wora maŋa de maŋa logo baŋa kweelim da yam ne. 2Kanto maŋa kam ne, nɔɔna wó taa wora ba na lage ba yerane wonnu, ye ba yi zo sabu-laga. Kachaare-nyena wó taa wora balo na bere ba tete to. Nɔɔna wó taa twe daane, ye ba ve ba tiina bam ni. Badwonna wó taa ye banegero nyena, de Wɛ-lwɛɛna. 3Nɔɔna bá taa jege ba dwonna swono, naa ba ŋwaŋa. Ba wó taa ye vwa-nyena. Badwonna maa wó taa ye nankɔ-nyena ye ba ware ba tete ba jaana. Ba wó taa chuli wonnu telo na lamma to. 4Nɔɔna wó taa wora ba na ye bebare-nyena, ye ba gare ba ke wo-lwanno. Ba wó taa mage ba nyɔɔna ye ba bere ba tete kamunim. Nɔɔna wó taa swoi ba tete ywoni ko dwoi Wɛ swono. 5Nɔɔna bam konto bere ba tete we ba tɔge Wɛ chega kam, ye Wɛ dam nam tera ba tei ne. Nam lɔŋe nɔɔna bam konto dwoŋi.
6Nɔɔna bam konto badwonna yeini ba ke swa ba vei ba zoore sam ba gane kaana balo na ye ka-kayɛ to pa ba boboŋa chɔge. Kaana bam konto wo chɔge de ba keim-balwaaro dedɛ, ye ba boboŋa pae se ba tɔge woŋo kolo maama ba fera na zoore to. 7Maŋa maama kaana bam konto maa boŋa se ba na yi-poro, ye ba nam ware se ba lɔre Wɛ chega kam ba ti. 8Nɔɔna bam konto na ke tei to nye de Janese de Jambere déem na ve Moses ni faŋa faŋa tei to mo.#Nwoŋim 7:11 Ba de ve Wɛ chega kam mo. Ba boboŋa jei mo, ye ba na tɔge Wɛ tei to ye kafɛ. 9Ba nam daa bá wane ba kɛ yiga de ba gana yam. Ba na ye nɔn-jworru tei to wó ba ko lɔre ja nɔɔna maama yiga ne, nenɛɛne ko déem na ke Janese de Jambere tei to.
Wɛ chega kam jege wolim lanyerane
10Ko nam ná ye nmo Timoti, n maŋe n yei amo berem dem na ye tei to, de a totoŋ-naga, de a boboŋa na ye tei to de. Nmo nam ta yei amo na jege wo-dedoa de Wɛ tei to, ye n ta yei a na jege ban-peno, de swono, de pu-dɛa tei to. 11Nmo ta yei nɔɔna na zeili-ne ye a yaare tei to. Nmo yei wonnu telo maama na ke amo Antioka ne, de Ikonium ne, de Lustera ne, ne ba na zeili-ne ye a ta wo yage Wɛ chega kam tei to.#Kikia 13:50; 14:5, 19-20 Dé Teiru wom nam mo jwoŋi-ne yaara yam konto maama wone. 12Ko ye chega mo we, balo maama na boŋe se ba seene ba yia ba taa tɔge Wɛ chega kam Yezu Krista ŋwaane to wó na yaara nɔɔna tei ne. 13Ko daare ko ná ye nɔn-balwaaro de kampin-nyena, banto keim-lwanno tem wó tiini te puli te gaale. Ba wó taa gane nɔɔna, ye nɔɔna wó taa gane ba de.
14Ko nam ná ye nmo, se n yɔɔre n ta‑n tɔge chega kalo nmo na maŋe n lɔre ye n jwoŋi-ka n ke n boboŋa ne to, kolo ŋwaane balo déem na bere‑m wonnu tem konto to, n yei ba wo lanyerane mo. 15Nmo na maŋe n ye bu-balaŋa wɛɛne to, nmo yei Wɛ chega twanno tem na bere kolo to. Te berem dem konto wae de pae se n yi poora, se Wɛ jwoŋi‑m o yage, nmo na sɛ Yezu Krista de wo-dedoa to ŋwaane. 16Kolo maama na popone Wɛ tɔnɔ kom wone to, ko ye Wɛ kikia mo ye ko jege nyɔɔre ko pa debam. Ko wae ko bere debam chega, naa ko kaane debam, naa ko pae dé na koresem, naa ko pae dé wae dé zamese chega tɔgem. 17Konto to, debam balo na ye Wɛ nɔɔna to mo yɔɔre dé maŋe se dé taa toŋe totoŋ-laaro dwi maama.
Currently Selected:
2 Tim 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
