2 Tim 2
2
Timoti maŋe se o taa tɔge Wɛ de baare
1Amo bu Timoti, ta‑n zege de dam, se Yezu Krista wó zeini‑m de o zaane dem, nmo na me ded‑o to ŋwaane. 2Chega kalo maama amo déem na yeini a bere nɔn-kɔgɔ kom maama yiga ne ye n yei-ka to, ma-ka n bere nɔɔna badwonna balo na ye jawale-nyena to, se ba de daa wane ba maa bere nɔɔna badwonna.
3Nmo na tiini n toŋe n pa Yezu Krista tei to, ta ta‑n toŋa se ko chɛ n yera ne, nenɛɛne soja tu na nae cham tei to mo. 4Nɔɔno ná ye soja tu, ye o ná zo jara wo, wonto wó kwaane o ke kolo na wó su o dedɛɛro wom yi to mo. O nam bá sɛ se o toŋe ne nɔn-kafɛ tei. 5Ko ta nye de nɔɔno na kwaane o duri o di yiga tei to mo. Wonto ná dia, ye o wo dɛ durim dem chwoŋa chekke, ba bá sɛ ba pa‑o yiga tu pɛɛre dem. 6Ko ta woli da, nɔɔno ná ye valo, ye o ná tiini o toŋa, ko maŋe se wonto mo da yiga o jwoŋi o teiri wodiiru tem wone. 7Boŋe n nii amo na tɛ se n che n tete tei to. Dé Teiru Yezu wó pa n lɔre amo taane dem kuri n ti.
8Ta‑n boŋe Yezu Krista boboŋa. Wonto mo bi toone wone. O déem mo ye Pɛ David dwi tu. Kwor-ywoŋa kalo a na yeini a tɔɔle to bere kam konto. 9Amo na tɔɔle Wɛ kwora kam konto to mo tei a wo yaara wone, ye ba vɔ-ne de chaponno ne a ye ŋweeno mo tei. Ba nam bá wane ba che Wɛ kwora kam se nɔɔn-nɔɔno yé lɔre-ka.#Filipi 1:12-13 10Konto ŋwaane mo a sɛ se a taa nae cham wonnu maama baŋa ne, se ko wane ko woli nɔɔna balo Wɛ na kuri se ba taa ye o nyem to. Ko maa wó pa se Wɛ tɔge Yezu Krista ŋwaane mo o ma jwoŋi banto de, se ba daare ba na ŋwea o tei ne, de nenɔŋ-fɔrɔ na bá ti to.
11Taane dento seene de ye chega mo:
Dé ná tɔge de Yezu dé te,
dé wó na ŋwea o tei ne.
12Dé ná fɔge dé zege lanyerane cham wone,
dé wó da dé di paare o tei ne.#Luka 12:8
Dé nam ná ve‑o,
o de wó ve debam mo.
13Dé ná maŋe dé ba jege o chega,
wonto ta wó zege o chega wone mo,
kolo ŋwaane o ware se o jwoori o tete kwaga ne.
Dé kikia na wó su Wɛ yi tei to
14Ta‑n guli amo berem dem konto n bere Yezu nɔɔna bam, se n daare n ma Wɛ n kaane-ba lanyerane se ba yé taa mage ni-kantɔgɔ botare baŋa ne. Kantɔgɔ konto dwoŋi ba jege kuri, ye ko pae se balo na jei ba cheigi-ko to boboŋa chɔge Wɛ chega kam tɔgem seeni. 15Kwaane n ta‑n tɔge chwoŋa lanyerane se ko su Wɛ yi, se chaveera yé ja‑m o yiga ne. Ta‑n toŋe de jawala de n na wó kwaane n ta‑n bere nɔɔna Wɛ chega kam tei to.
16Ja n tete de lare-yɔɔro telo na dae Wɛ chega kam to. Balo na lare konto dwoŋi to pae se nɔɔna jwoori ba maŋe kwaga kwaga mo Wɛ tei ne. 17Ba na kare ba bere wo-yɔɔro tem konto to, te lɔgese te jage jei maama, nenɛɛne nɔɔno na jege ŋɔne ye de woori de di o yera tei to mo. Humenaya de Fileta mo yeini ba bere wo-yɔɔro tem konto dwoŋi. 18Ba tusi chega chwoŋa kam wone mo. Ba maa tɛ ba we, Wɛ daa bá bi nɔɔna toone wone, se twa biim maŋe ko kɛ. Ba berem dem konto ma pa se balo na sɛ Wɛ to badwonna boboŋa jwoori ya leiri. 19Ko daare balo na yɔɔre ba tɔge Wɛ chega kam to boboŋa ba zae. Ba maa nye de kabiri-beira kalo Wɛ na fɔge o chwi to. Ka maa ba gɔe kɔtaa, ye Wɛ taane mo popone ka yera ne we:
“Dé Teiru wom yei balo na ye o nyem to.”
Ko ta popone we:
“Wolo maama na sɛ we o ye dé Teiru wom nyem to
jege se o yage keim-lwanno mo.”#Nahum 1:7
20Ko nye de sɔ-fɔrɔ wone kabeili de zwe dwi dwi na wora tei to. Sedwonna ye lu-nyenno naa sabu-seŋa mo ba mɛ ba ke. Sento ye lonne nyem mo. Sedwonna maa ye dɛ naa dɔgɔ mo ba mɛ ba ke, ye ba mae sento yɔɔ yerane. 21Ko bere we, nɔɔno ná chege o tete de wo-yɔɔro tem konto, kotu wó taa ye lonne nyem mo. O maa ye wolo na kwei o tete o ke o tu wom jeŋa ne pa se o jege kuri o pa‑o to mo. O maŋe se o taa toŋe totoŋ-laaro telo maama o tu wom na lage to. 22Ko na ye konto to, se n yage keim-yɔɔro telo nɔn-donno boboŋa na yeini ya zoore to, se n daare n kwaane n tɔge chega chwoŋa, de wo-dedoa, de swono, de bochare-zuru. Ta‑n vei de balo bochara na lana ye ba ke ba tete dé Teiru wom jeŋa ne to.
23Ko ta woli da, fɔge n che n tete de ni-kantɔgɔ kolo maama na ba jege kuri ye swa tere ko wone to. Nmo yei we ko yeini ko kweeli jara ne mo. 24Nɔɔno wolo na ye dé Teiru wom tontoŋeno to nam ba jege se o taa mage ni-kantɔgɔ. Ko nam maŋe se o taa nege nɔɔna maama lanyerane, se o daare o bere-ba chekke de ban-peno. 25Ko ta maŋe se o zuri o yera o pa se balo na dwoni ded-o to jwoori ba tɔge chwoŋa. Dɛ delo Wɛ wó pa-ba chwoŋa se ba leiri ba boboŋa, ye ba daare ba ba ba lɔre o chega kam. 26Konto to, ba swa wó jwoori pa se ba wane ba lu setaana pɛ jeŋa ne. Wonto ya jaane-ba ne kalanchogo tei, ye o pa ba ke o boboŋa na lage tei to.
Currently Selected:
2 Tim 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
