1 Tim 1
1
1Amo Pɔɔl wolo na ye Yezu Krista totoŋa nakwe to mo popone tɔnɔ konto se a pa nmo Timoti.#Kikia 16:1-3 Baŋa Wɛ wolo na ye debam Vereno to, de Yezu Krista wolo debam na jege o teena to mo pɛ-ne chwoŋa se a taa ye o tontoŋeno. 2Nmo mo ye nenɛɛne amo bu chekke, dedaane n na sɛ Yezu Krista to.
Dé Kwo Wɛ, de dé Teiru Yezu Krista wó pa nmo zaane de yazura, ye o daare o duri nmo ŋwaŋa.
Vwa berena taane
3Maŋa kam amo déem na lage se a vo Makedonia to, a lwoori nmo se n maŋe Efesia ne. Nmo jege se n maŋe dáane mo, se n kaane nɔɔna badwonna ba na jege vwa ba bere nɔɔna to se ba yage ba bera yam. 4N jege se n ta-ba se ba yage ba boboŋa sensɔle selo na dae chega to, se ba daare ba yage ba kwoa kwoa yera natɔga kalo na ba jege kweelim jei to. Kolo ŋwaane wonnu tem konto pae se nɔɔna boboŋa ye kafɛ mo. Te nam ba woli nɔɔna se ba ke ba wo-dedoa dedaane Wɛ se ba taa tɔge‑o. 5N jege se n kaane-ba mo dedaane wonnu tem konto se ba yage-te, se ba taa jege swono kolo na ye chekke to. Swono kom konto nam tɔge bochare-ŋona mo, de boboŋ-laaro, de wo-dedoa keim chekke ŋwaane ko wora. 6Nɔɔna bam konto nam ywori wo-laaro tem konto wone mo, ye ba tusi ba tɔge taane delo na ba jege kuri to. 7Ba lage se ba taa ye Wɛ nia yam berena mo, ye ba nam ba ni ba tete ni taane kuri. Ba yeini ba seene ba yia mo ba ŋɔɔne wonnu tem, ye ba ta yeiri te kuri.
8Ko ná ye Wɛ nia yam, dé yei we ya lana ya pae nɔɔno wolo maama na tɔge-ya chekke to. 9Ta‑n yei we, Wɛ na pɛ o ni-kaana yam to, o wo pɛ ya zege nɔn-laaro ŋwaane. O nam pɛ-ya balo na yeini ba chɔge chullu to ŋwaane mo, dedaane zwabani-nyena ŋwaane. O ta pɛ-ya Wɛ-lwɛɛna, de wo-lwan-keira, de nɔn-chechɔgero, de balo na ywori Wɛ chwoŋa wone to ŋwaane mo. O ta tage-ya balo de na go ba kwoa naa ba niina naa ba dwonna to ŋwaane mo, 10dedaane balo na bwoori to, de baara balo na mae ba dwonna ba jiri kaana to, dedaane balo na cho ba jaane nɔɔna de dam ba yeigi to, dedaane vwa-fɔra, de balo na du de Wɛ ye ko dae chega to ŋwaane. O nam tage o ni-kaana yam o pa balo na ke kolo maama ba chɔge berem delo na ye chekke 11ye de tɔge Wɛ kwor-ywoŋa kam na bere tei to mo. Kwor-ywoŋa kam konto nwoŋi Ywoni Tu Wɛ tei mo, ye wonto mo kwei-ka o ke amo jeŋa ne se a taa tɛa.
Wɛ zaane dem taane
12Dé Teiru Yezu Krista mo pɛ amo dam se a taa toŋa a pa‑o. A ke‑o lei dedaane o na boŋe we amo jege wo-dedoa, ye o le-ne o zege o totoŋa yam baŋa ne to. 13Faŋa to amo déem yeini a ŋɔɔne mo a chɔge Wɛ yere, ye a ta yaare o nɔɔna.#Kikia 8:3 A déem jege nankɔɔre mo ye Wɛ ta duri amo ŋwaŋa, kolo ŋwaane amo ya yeiri woŋo kolo a na jege a ke to, a na wo sɛ‑o to ŋwaane. 14Ko daare dé Teiru wom nam mo ke-ne zaane dedɛ ko ja gaale, ye o daare o pa se a taa jege wo-dedoa dedaane Yezu Krista, ye a swoi‑o.
15Taane dento ye chega ye de jege se nɔɔna yɔɔre ba sɛ-de mo:
“Yezu Krista tu logo baŋa
se o jwoŋi nɔn-chechɔgero mo
o daare o ke-ba Wɛ jeŋa ne.”#Maake 2:17; Rom 4:25
Amo nam mo ye nɔn-chechɔgɔ a dwoi nɔɔna maama. 16Wɛ nam ta ma duri amo ŋwaŋa se ko pore chwoŋa se Yezu Krista wane o tɔge-ka o bere nɔɔna o na zuri o yera de amo tei to. O tiini o zuri o yera de amo wolo na ye nɔn-chechɔgero tem yiga tu to. Ko maa ye maana ko pae nɔɔna balo na wó da amo kwaga ba ba ba sɛ‑o se ba daare ba na ŋwea kalo na ba jege kweelim Wɛ tei ne to.
17Baŋa Wɛ ye pɛ wolo paare na bá ti maŋa de maŋa to mo. O ye ŋwea tu, ye o yera ba nae de yia. O dwoŋi tera. Konto to, zula de paare taa wo o tei ne se ko taa vei wuu. Ameena.
18Amo bu Timoti, a lage a ta de nmo se n ta‑n toŋe n pa Wɛ, ne ba déem na tɔɔle Wɛ kwora ba ta nmo taane tei to. Ko na ye konto to, se n kwaane n guli ba na tɔɔle tei to se n wane n ke n tete n ke daane, nenɛɛne n na lage n jaŋe jaŋa chekke tei to. 19Ta‑n tɔge Wɛ chwoŋa se n daare n ta‑n ke kolo maama n na yei we ko lamma to. Nɔɔna badwonna wora ye ba ba sɛ se ba taa tɔge kolo ba na yei we ko lamma to. Konto ma pa se ba daa ware ba da Wɛ chwoŋa. 20Humenaya de Alezanda mo tɔge ba wo nɔɔna bam konto wone. Amo maŋe a ke banto setaana pɛ jeŋa ne se o vaŋe ba zwɛ, se ko bere-ba we, ba daa yé ŋɔɔne ba twe Wɛ yere.#2 Tim 4:14
Currently Selected:
1 Tim 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
