1 Tɛsaloni 5
5
Baŋa Wɛ dɛ-kamunu kom taane
1Dé nu-bia bam, ko daa wo maŋe se dé popone dé ta dé bere abam maŋa kalo wonnu tem konto na wó ke to. 2Abam tete maŋe á yei lanyerane we, dé Teiru wom dɛ dem wó pɔpɔ de ba, ne ŋweeno na yeini o pɔpɔ o ba tete ne tei to.#Matiyu 24:44; 2 Piita 3:10 3Maŋa kalo nɔɔna na tɛ ba we, ko ye chemm mo, ye ywoni wora jei maama to, konto maŋa kam ne de cham wó pɔpɔ de ba ba baŋa, ye ba bá lu. Ko wó taa nye de kaane puga na pɔpɔ ka virigi ye ka wɔe tei to mo.
4Dé nu-bia bam, á nam maŋe á poore, ye á daa tere lim wone. Konto ŋwaane dé Teiru wom dɛ dem bá taa jege se de pɔpɔ de zaŋe de yi abam ne ŋweeno tei ye á yeiri ko ni ne. 5Abam maama wo Wɛ pwooni wone mo, ye á tɔge wea chwoŋa. Dé nam dae tete kokoro nɔɔna, ye dé kikia dae lim wone kikia. 6Konto ŋwaane dé yé pa se dɔɔm taa jege debam ne balo na yeiri Wɛ to. Pa-na dé fɔge dé che dé tete se dé yia waare. 7Tete ne mo nɔɔna yeini ba dɔa, ye ba kwori ba nyɔ sana ba buga. 8Debam nam ye wea nɔɔna mo. Ko maŋe se dé taa cho dé tete. Pa-na dé taa tɔge Yezu de wo-dedoa, ye dé pae da-swono. Konto wó che debam lwarem wone, ne nɔɔno na maa vei jara ye o kwei nantana o ma kwoli o nyɔɔne tei to. Pa-na dé taa jege teena lanyerane we, Wɛ wó jwoŋi debam o yage. Konto maa nye de jara yu-gwoŋo kolo nɔɔno na kwei o ma kwoli o yuu jara maŋa ne to.#Izaya 59:17; Efesia 6:13-17 9Wɛ na kuri debam se dé taa ye o nyem to, ko dae se o ban-zɔŋɔ kom ba ko chɔge debam mo. Ko nam ye se o jwoŋi debam o yage dé Teiru Yezu Krista ŋwaane mo. 10Wonto mo tege dé ŋwaane se dé wane dé tɔge ded‑o dé na ŋwea Wɛ tei ne. O ná jwoori o ba, ye dé ná ŋwe, naa dé ná tega, ko ba chɔga. Dé wó tɔge ded‑o dé na ŋwea Wɛ tei ne.
11Konto ŋwaane, ta‑á woli-na daane se ko pa á bochara taa tiga, se á fɔge á zeini daane ne á na maŋe á ke tei to.
12Dé nu-bia bam, dé nam lwoori abam se á ta‑á nege nɔɔna balo na toŋe á tetare ne to. Nɔɔna banto mo leiri dé Teiru wom yuu ne ba nii abam baŋa ne, ye ba korese abam. 13Á ta‑á zuli-ba lanyerane de swono ba totoŋ-ŋona yam ŋwaane. Pa se ywoni taa wora á wone.
14Dé nu-bia bam, dé kwoori abam se á ta‑á woli nɔɔna lanyerane.
Ko ná ye jawɔre-nyena, se á kaane-ba.
Ko ná ye balo na kɔre foone to,
se á pa ba na baare.
Ko ná ye nabwona, se á zeini-ba.
Ta‑á zuri-na á bochara de nɔɔna maama.
15Á ta‑á yei se nɔɔn-nɔɔno yé ma wo-lɔŋɔ
o ma jwoori o ŋwe wo-lɔŋɔ o pa o dwoŋi.
Maŋa maama se á kwaane á ta‑á tɔge chwo-laao
de á nu-bia bam, ko woli de nɔɔna maama.
16Ta‑á jege-na wopwolo maŋa maama.
17Maŋa maama se á ta‑á lwoori Wɛ.
18Kolo maama ná kea, se á ta‑á ke Wɛ lei.
Mo Wɛ na lage se á ta‑á ke tei,
á na me de Yezu Krista to ŋwaane.
19Yé kwoli-na Wɛ Sin-laao kom.
20Sin-laao kom ná pɛ nɔɔno pworisi Wɛ kwora,
se á yé gwooni ka na ye tei to.
21Abam nam maŋe-na woŋo maama á nii.
Ko ná lana se á ta‑á tɔge-ko.
22Se á nam fɔge á che á tete de lwarem dwi maama.
23Baŋa Wɛ wom na pae nɔɔna bochare-zuru to wó taa jege abam de je selei, se á ta‑á jege wo-pwoŋo fase o yiga ne, se á ŋwea maama taa jege chega, ko ná ye á yera de á jworo de. Konto to, dé Teiru Yezu Krista ná tua, á bá ta‑á jege tusim Wɛ tei ne de fenfee de. 24Wɛ mo bwoŋi abam se á ta‑á ye o nyem. O nam zege o chega wone. O maa wó zeini abam ne o na tage tei to.
25Dé nu-bia bam, ta‑á lwoori-na Wɛ á pa debam de.
26Jɔɔne-na dé nu-bia bam maama, ye á kukwori daane á zuli Wɛ.
27A nam tɛ abam dé Teiru wom dam ŋwaane se á ga tɔnɔ konto á bere dé nu-bia bam maama.
28Dé Teiru Yezu Krista zaane dem taa wo á tei ne.
Currently Selected:
1 Tɛsaloni 5: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
