2 Samuwel 9

Pɛ David dedaane Mefibosɛfi taane

1Dɛ dedwe mo David bwei o we, “Sɔɔl dwi dem nɔɔno wo daare se amo da Jonatan ŋwaane a ke kotu lanyerane na?”#2 Samuwel 4:4 #1 Samuwel 20:15-17

2Sɔɔl diga kam déem nam jege ba tontoŋeno dedoa o yere na ye Ziba. Ba ma bwoŋi‑o ba pa David. O na yi pɛ wom tei to, mo David bwei‑o o we, “Nmo mo ye Ziba to na?” O de ma leiri o we, “Ɛɛ, amo ye n tontoŋeno Ziba mo.”

3Pɛ David ma bwei‑o o we, “Sɔɔl dwi dem nɔɔno daa wo daare se a ke kotu lanyerane Wɛ zaane dem ŋwaane na?” Ziba ma leiri o we, “Jonatan ta daare bu dedoa. O nam gwarege mo o nɛ sem maama ne o jei.”

4Pɛ David daa ma bwei o we, “O nam wo yei ne mo?” Ziba ma leiri o we, “O wo Lo-Debara ne mo, Ameli bu Makira sɔŋɔ ne.”

5Pɛ David ma toŋe pa se ba vo Lo-Debara ba ja‑o ba ba o tei. 6Jonatan bu wom konto yere mo ye Mefibosɛfi. O kwo-nakwe maa ye Sɔɔl. O na tu o yi David tei to, o ma vwi o yibia tega ne o jɔɔne‑o. David ma bwoŋi‑o o we, “Mefibosɛfi!” O de ma leiri o we, “Amo wolo na ye n tontoŋeno to mo tento.”

7David ma ta‑o o we, “Yé ta‑n fona. Amo boboŋa maŋe ya ja se a ke‑m lanyerane mo n kwo Jonatan ŋwaane. A wó kwei tega kalo maama ya na ye n kwo-nakwe Sɔɔl nyem to a jwoori a pa‑m. A ta pɛ‑m chwoŋa se n ta‑n zoore amo sɔŋɔ kom ne n di wodiu kolo amo na wó di to.” 8Mefibosɛfi daa ma vwi o yibia tega ne ye o we, “Amo ye n tontoŋeno mo, a de kukuri-teka ba gare daane. Bɛŋwaane mo ye n boŋe se n ke-ne lanyerane konto?”

9Pɛ David ma bwoŋi Sɔɔl tontoŋeno Ziba o ta ded‑o o we, “Amo kwei woŋo kolo maama ya na ye nmo tu Sɔɔl de o diga kam nyem to mo a jwoori a pa o naa Mefibosɛfi. 10Nmo dedaane n bia, de n tontoŋena bam maama jege se á ta‑á vare kare sem mo á pa Mefibosɛfi. Se ná ke wodiu, á wó ja á ba á pa o diga kam se ba yé ga. Ko nam ná ye Mefibosɛfi, wonto lage o taa di wodiu kolo amo na wó di a sɔŋɔ kom ne to mo.”

Ziba déem nam jege bakeiri fuga-banu de tontoŋena finlei mo. 11O ma leiri Pɛ David o we, “A ye n tontoŋeno mo. A nam wó ke tei maama n na bere se a ke to.”

Mefibosɛfi laam ma lɛɛre o tɔge o di kolo maama David na yeini o di to, nenɛɛne pɛ bia bam na di tei to. 12O maa jege bakeiri-pwola mo o yere na ye Mika. Ziba sɔŋɔ tiina bam maama déem ma ji Mefibosɛfi tontoŋena. 13Mefibosɛfi na gwarege o nɛ sem maama ne to laam ma ba o zoore Jerusalem ne. Maŋa maama o maa tɔge o di kolo maama Pɛ wom na yeini o di to.

Currently Selected:

2 Samuwel 9: KBG

Highlight

Copy

Compare