2 Samuwel 10

David di Amon tiina bam

1Konto kwaga ne, Amon tiina pɛ Nahasi ma te. O bu Hanun ma leiri o yuu ne o ji pɛ. 2David ma ta o we, “Amo lage a ke Nahasi bu Hanun lanyerane mo nenɛɛne o kwo de déem na ke amo lanyerane tei to.” O ma toŋe nɔɔna se ba vo ba ke Hanun lei de o kwo lua kam.

David nɔɔna bam na yi Amon tiina laŋa kam to, 3Amon tiina dedɛɛra bam ma ta de ba pɛ Hanun ba we, “Nmo pɛ chega we David boŋe lanyerane mo ye o toŋe nɔɔna se ba ba ba ke n kwo lua kam lei na? Lɔre we o toŋe-ba se ba ŋɔ ba nii dé teo kom mo, se o wane o ba o di debam.” 4Hanun ma pa se ba ja David tontoŋena bam ba cheeri ba twana yam ba daare chichwo-chwooru. Ba ta ma ja ba gwaaro tem tetare ne ba gwoni ba yage se ko yi ba takeira seeni. Ba laam ma yage-ba se ba viiri de kuri-nɔrɔ. 5David tontoŋena bam ma kɔre se ba jwoori sɔŋɔ, chaveera na jege-ba to ŋwaane. David na nigi ko na ke-ba tei to, o ma toŋe nɔɔna se ba jeeri-ba chwoŋa ne. O ma pa-ba kwora o we, “Maŋe-na Jeriko ne se á twana yam ná nwoŋi maama se á laam jwoori sɔŋɔ.”

6Amon tiina bam ma maane we ba kikia maama laam lwoi David momwa ne. Ba ma vo ba sɔ ni de Aram tiina balo na wo Bɛte-Rehoba ne, de Zoba ne to, ba jwoŋi ba jar-keira morro finlei (20,000). Ba ta ma jwoŋi jar-keira moro (1,000) Maaka teo pɛ tei ne, ye ba daare ba jwoŋi jar-keira morro fuga-balei (12,000) Toba tiina tei ne.

7David na lɔre ko ni ne to, o ma toŋe Joaba se o ja o babɛ sem kɔgɔ kom maama o vo o jeeri-ba de jara. 8Amon tiina bam ma gwɛ ba nwoŋi ba chichei ba zege ba te-fɔrɔ kom manchwoŋo ni ne se ba ke jara yam. Ko daare Aram tiina balo na nwoŋi Zoba de Rehobi to, de Toba tiina bam, dedaane Maaka tiina bam de laam ma chichei ba zege teo kom pwola ne ye ba cheiga.

9Joaba ma lɔre we ba dona bam lage ba jeeri-ba yiga de kwaga maama mo. O ma kuri Isarele jar-keira bam wone balo na tiini ba yei jara laŋa chekke to, se banto yɔɔre ba jeeri Aram tiina bam. 10Jar-keira balo na daare to, o ma ke-ba o nyaane Abisayi jeŋa ne se banto maama vo ba jeeri Amon tiina bam. 11Joaba laam ma ta Abisayi o we, “Nmo ná nɛ we Aram tiina bam tiini ba dana ba dwoi amo, se n ba n woli-ne. Amon tiina bam de nam ná dana ba dwoi nmo, amo de wó ba a woli‑m. 12Ke dam n tete kuri ne se n ta ta‑n jege baare! Pa-na dé jaŋe dé pa dé nɔɔna bam dedaane dé Tu Wɛ wom teene dem ŋwaane. Baŋa Wɛ wó ke kolo na su o yi to!”

13Joaba de o jar-keira bam ma ja jara yam ba jeeri Aram tiina bam, ye ba duri ba jage. 14Amon tiina bam na nɛ we Aram tiina bam duri ba jage to, mo ba de duri ba jwoori ba zo ba teo kom wone, ye ba daare Abisayi de o jar-keira kɔgɔ kom. Jara yam ma ti pa se Joaba jwoori o vo Jerusalem.

15Aram tiina bam na maane we Isarele tiina bam wane-ba ba di to, mo ba jwoori ba la ba jar-keira bam ba ke daane. 16Zoba teo Pɛ Hadadezere ma bwoŋi Aram tiina balo na wo Yuferata buga kam wɛ-puli seeni to se ba vo ba jeeri Helam ne. Hadadezere jar-keira yiga tu Sobaka déem wo ba yiga ne mo. 17David ma maane ba na ke tei to. O de ma la Isarele jar-keira bam maama o ke daane. Ba ma vo ba bɛ Jɔdan buga kam ba lɛɛne ba vo ba yi Helam. Aram tiina bam ma chichei ba fɔge ba zege ye ba jeeri David de jara. 18Isarele tiina bam ma fe Aram tiina bam ba zeili pa se ba duri ba jage. David de o nɔɔna bam ma go ba dona balo na dɔge sisei-torokooro yuu to bia yarepɛ (700). Ba ta ma go balo na dɔge sisein-nɔɔna to morro finna (40,000). Ko ná ye ba jar-keira bam yiga tu Sobaka, ba ma tiini ba ke zonne o yera ne, pa se o te jara kaporo kom ne. 19Hadadezere kwaga pwa bam maama ma maane we Isarele tiina bam yɔɔre ba di-ba mo jara wone. Ba ma lwoori yibwona Isarele tiina bam tei ne ye ba daare ba sɛ ba pa-ba.

Aram tiina bam laam ma kɔre se ba daa woli Amori tiina bam jara keim baŋa ne.

Currently Selected:

2 Samuwel 10: KBG

Highlight

Copy

Compare