2 Samuwel 8

David na di jara yalo maama to

1Konto kwaga ne, David déem ma vo o jeeri Filisi tiina bam de jara. O ma di-ba pa se ba na ba chaveera. O ma chɔge ba dam ba teo kom maama wone.#8:1 naa O ma vere Meteg-Amma ba tei ne.

2David déem ma kwaare jara o di Moaba tiina bam de. O ma pa se ba peini tega ne ba twoŋi daane, ye o laam kwei ŋona o maŋe-ba kuni betɔ betɔ o vo o ti. Ŋona kam dedɔrem kuni belei ná yi mɛ, ba wó go nɔɔna bam konto mo. Ka dedɔrem yi dedoa ná daare ka yi mɛ, ba wó yage se banto taa ŋwe mo. Moaba tiina bam déem ma lɛɛre ba zo David dam kuri ne, ye ba tui ba ŋwe lampwoo ba pa‑o.

3Rehobi bu Hadadezere déem ye Zoba teo pɛ mo. O nam ya maa vei se o jwoori o jwoŋi Yuferata buga laŋa kam teene dem mo o taa tei. David ma jeeri Hadadezere de jara o di. 4David de o nɔɔna bam ma ja Hadadezere jar-keira balo na dɔge sisein-nɔɔna yuu ne to moro de bia yarepɛ (1,700), ko woli de o jar-keira balo na vei tega ne to morro finlei (20,000). David ma le ba sisein-nɔɔna bi (100) se o taa jege o vaŋa o jara-keim torokooro, ye o daare o bwori selo na daare to nɛ pa se gwarege.

5Aram#8:5 Aram ye Siria teo yere dedwoŋi. tiina balo déem na zoore Damasika laŋa kam ne to ma nwoŋi ba vo se ba woli Hadadezere. David ma jeeri-ba de jara ye o go ba nɔɔna morro finlei-telei (22,000). 6David ma daare o ja o jar-keira badwonna o vo che Aram tiina bam laŋa kam maama. Damasika ne mo konto. Aram tiina bam déem ma zo David dam kuri ne, ye ba ŋwe lampwoo ba pa‑o. Mɛ maama David ná via, Baŋa Wɛ yeini o pa se o di o dona mo jara wone. 7David ma vere sabu-seŋa jara zela yalo Hadadezere dedɛɛra bam ya na jege to o ja o jwoori o vo Jerusalem. 8Ko ta ná ye Teba dedaane Berotayi teene dem Hadadezere na tei to, Pɛ David ma zo de wone o vere channa wonnu dedɛ o ja o viiri.

9Hamafa teo Pɛ Toyi déem ma ni we David di Hadadezere jar-keira bam maama. 10Toyi tete déem ya ke jara kuni dedɛ mo de Hadadezere. O ma toŋe o bu Joram se o vo o jɔɔne David o ke‑o yu-ywoŋo lei de o na wane Hadadezere o di to ŋwaane. Joram ma ja lu-nyenno pɛɛra, de sabu-seŋa pɛɛra, de channa pɛɛra o vo o pa David. 11David ma kwei pɛɛra yam konto o pa se ba taa mae ba zuli Baŋa Wɛ. O déem ya maŋe o ke konto dwoŋi de lu-nyenno de sabu-seŋa wonnu telo o na vere o dona bam tei ne to mo. 12O dona balo o na di to teene dem maa ye: Edom, de Moaba, de Amon, de Filisi, de Amaleki. O ta ma kwei jejegero telo o na vere Zoba teo Pɛ Hadadezere tei ne to o pa Baŋa Wɛ.

13David déem ma vo Yɛ bwolo kom o kwaare jara de Edom tiina bam o go ba nɔɔna morro fuga-nana (18,000). O na jwoori jara yam wone to, o yere déem ma tiini de zaŋe. 14O ma ja o jar-keira bam o vo o che Edom laŋa kam maama. Edom tiina bam maama laam ma zo David dam kuri ne. Mɛ maama David ná via, Baŋa Wɛ yeini o pa se o di o dona mo jara maama wone.

15David déem ma di paare Isarele tiina bam maama baŋa ne. O ma tɔge chwoŋa de o na ke o nɔɔna bam tei to, se ko taa lana ko pa-ba. 16Zeruya bu Joaba mo ye David jar-keira bam yiga tu. Ahiluda bu Jehosafate de ma nii woŋo maama se o popone-te o tiŋi. 17Ahituba bu Zadoki dedaane Abiatara bu Ahimeleka déem ye Wɛ kaanem tiina mo. Seraya maa ye David tɔn-poponno. 18Jehoyada bu Benaya mo nii Cherete tiina bam dedaane Peleti tiina bam#8:18 Nɔɔna bam konto déem mo yere pɛ wom..#2 Samuwel 20:23-26 David bia bam ma toŋe kaanem tiina#8:18 kaanem tiina naa dedɛɛra totoŋa ba pa‑o.#2 Samuwel 23:20-23; 1 Tigisim 18:17

Currently Selected:

2 Samuwel 8: KBG

Highlight

Copy

Compare