2 Samuwel 7

Baŋa Wɛ gwoni ni dedaane David

1Pɛ David déem laam zoore o sɔ-fɔrɔ kom ne mo de yazura. Baŋa Wɛ ma pa se o dona maama daa ba daane‑o. 2Dɛ dedwe David ma ta de Wɛ sampwora Natan o we, “Nii amo mo tento! A zoore sɔ-fɔrɔ kolo ba na kwei Sedare da-ŋonno ba ma lɔ-ko to, ko daare ye Wɛ ni-gwonim dakaa kam laam wo vwei kuri ne.” 3Natan ma leiri o we, “Ke n boboŋa na jaane tei maama to, se Baŋa Wɛ wo n tei ne.”

4Dɛ dem konto tete ne, Baŋa Wɛ ma ŋɔɔne dedaane Natan o we:

5“Véi n ta de amo tontoŋeno David we, ‘Baŋa Wɛ na tage kolo to mo tento: N boŋe we nmo mo wó lɔ sɔŋɔ n pa-ne se a taa zoore da na? 6Ko nam na ye tei to, ko na zege maŋa kalo a na jaane Isarele tiina bam a nwoŋi Ejipti ne to, se ko ba ko yi zem, amo ta wo fɔge a zo sɔŋɔ wone. Mɛ maama a ná jaane-ba a ja a vo, a yeini a zoore vwei wone mo. 7Jei selo maama amo dedaane Isarele tiina bam na beeri dé vo to, amo ta wo fɔge a ta de yiga tiina balo a na kuri se ba taa nii a nɔɔna Isarele tiina bam to we, “Bɛ mo ke ye á wo kwei Sedare da-ŋonno á ma á lɔ sɔŋɔ á pa-ne?” ’

8Konto to, ta de a tontoŋeno David we, ‘Paŋwa Tu Baŋa Wɛ na tage kolo to mo tento: Amo na le nmo to, dedaane n déem ye nayero mo gaao ne n nii pei baŋa ne.#1 Samuwel 17:11 A ma daare a pa se n di paare amo nɔɔna Isarele tiina bam baŋa ne. 9Mɛ maama nmo na yeini n vei to, a déem tɔge n kwaga konto mo, ye a pa se n dona dwi maama saare tega baŋa ne. Leile konto, amo wó pa n yere tiini de zaŋe, se n ta‑n tɔge n ye logo baŋa nɔn-kamuna bam wone dedoa. 10Amo laam nam kwei tega kalo a nɔɔna bam na wó taa zoore ka wone to mo a pa-ba. Ko lage ko taa ye ba tete kugu jei nɔɔn-nɔɔno na bá wane o daane-ba ka wone to mo. Nankɔ-nyena daa bá bɛɛse-ba nenɛɛne ko déem na ke tei, 11ko zege maŋa kalo a na pɛ se yiga tiina nii a nɔɔna Isarele tiina bam baŋa ne to. Amo ta lage a pa se á sii mo á dona maama daanem baŋa ne.

Amo Baŋa Wɛ nam tɛ we, amo tete wó pa n dwi dem puli mo pa se n sɔŋɔ kom jeini de dam. 12Nmo ŋwea kam ná ba ka ti ye ba kwei‑m ba suli mɛ ba déem na suli nmo kwoa bam to, a ta wó pa n dwi dem wone nɔɔno dedoa zaŋe se wonto leiri nmo yuu ne o ji pɛ. A maa wó pa se o paare dem jeini de dam.#2 Tigisim 1:9; Lei 132:11 13Ko ye wonto mo wó lɔ sɔŋɔ amo yere dem zulim ŋwaane.#1 Pwa 6:1-6 Amo ta wó pa se wonto dwi dem taa di paare dem taa wuu. 14Amo wó taa ye o kwo, se o de taa ye amo bu.#Hiburu 1:5 O ná ke o sa chwoŋa, a lage a ma da-lɔŋɔ mo a ma a de‑o chwoŋa ne, ye a korese‑o nenɛɛne nabiina na ke ba bia tei to. 15Amo nam bá fɔge a dɔne a swono kom o baŋa ne, nenɛɛne a déem na ke tei dedaane Sɔɔl ye a le‑o paare dem wone se nmo laam ji pɛ to. 16Amo wó pa se n paare dem taa wora taa. Ko daa bá jei amo yiga ne. Maŋa maama se ko taa vei wuu, nmo sɔŋɔ kom wó na dwi se n paare dem fɔge de ja dam.’ ”

17Natan ma ta kolo maama Baŋa Wɛ na le o bere‑o to de David.

David na ware Wɛ tei to

18David ma vo o zo Baŋa Wɛ wara-vwei dem o jeini da, ye o ware Wɛ o we:

“Yuu-tu Baŋa Wɛ, amo ye wɔ mo, amo dwi dem de ye bɛ mo, ye n zeini amo tento se ko yi zem? 19De konto maama de, n ta boŋe se n ke-ne lanyerane n woli da! Yuu-tu Baŋa Wɛ, nmo laam nam tiŋi ni mo a jwa dwi dem ŋwaane. Ko maa ye wo-kenkagele ko pa-ne! 20Amo nam daa jege bɛ mo se a ta? Yuu-tu Baŋa Wɛ, amo ye n tontoŋeno mo ye n yei a maama n tia. 21Ko ye nmo tete ni-gwonim dem ŋwaane de n boboŋa yam ŋwaane mo n ke wo-kamunnu tento maama, ye n daare n le-te n bere-ne.

22Yuu-tu Baŋa Wɛ, konto ŋwaane mo nmo tiini n ye kamunu! Nmo dwoŋi tera! Nmo yerane mo ye Wɛ. Dé yɔɔre dé yei konto mo chekke. 23Debam Isarele tiina bam mo ye dwi dedwe logo baŋa ne. Dwi dedwoŋi tera de na ma de Isarele tiina bam. Nmo déem jwoŋi-ba kabɛɛne wone mo pa se ba ji nmo tete nɔɔna, se n daare n pa n yere zaŋe wɛɛne. Nmo na vere-ba Ejipti tiina jeŋa ne to, n déem ke wo-kenkagela na jege foone to mo ba tetare ne. Ko ta ná ye dwi tiina balo na kwaane se ba che-ba to, n zeili banto mo de ba wa maama. 24Nmo ma‑n kuri Isarele dwi tiina bam se ba taa ye nmo tete nɔɔna se ko taa vei wuu. Ko daare nmo Baŋa Wɛ de ma ji banto Wɛ wom.

25Amo Tu Baŋa Wɛ, laam pa se n ni-gwonim dem, n na ke amo de a dwi dem ŋwaane to taa jege kuri se ko taa vei wuu. Seene n ke kolo nmo na tage to, 26se n yere dem taa ye kamunu taa wuu. Nɔɔna laam wó taa tɛ ba we, ‘Paŋwa Tu Baŋa Wɛ mo nii Isarele tiina bam baŋa ne.’ Ko ta wó pa se amo wolo na ye n tontoŋeno David to sɔŋɔ kom na dwi se ko taa vei wuu.

27Paŋwa Tu Baŋa Wɛ, nmo mo ye Isarele dwi tiina Wɛ wom. Nmo nam le wonnu tento maama n bere-ne we a dwi dem wó puli pa se a sɔŋɔ kom jeini de dam. Konto ŋwaane mo pɛ se a na baare a lwoori‑m konto dwoŋi. 28Yuu-tu Baŋa Wɛ, nmo seene n ye Baŋa Wɛ chekke mo! Nmo ni taane dem ye chega mo. Nmo nam pwooli wo-laaro tento n pa amo wolo na ye n tontoŋeno to mo. 29Amo lwoori‑m se n swɛ a kwaga kam swolim mo, se n ta‑n ke-ba zaane taa wuu. Yuu-tu Baŋa Wɛ, nmo na gwoni n ni konto to, n swolim wó yɔɔre de taa tɔge a dwi dem mo se ko taa vei wuu!”

Currently Selected:

2 Samuwel 7: KBG

Highlight

Copy

Compare