2 Samuwel 6

Ba jaane Wɛ ni-gwonim dakaa kam ba vo Jerusalem

1David déem kuri Isarele jar-keira balo na yei jara laŋa chekke to morro fintɔ mo se ba la daane. 2O ma da ba yiga se ba vo Judah teo Baala,#6:2 Baala yere dedwoŋi yeKiriaf-Jeerim. se ba daare ba ja Wɛ ni-gwonim dakaa kam ba jwoori Jerusalem. Dakaa kam konto nam wora Paŋwa Tu Baŋa Wɛ yere ŋwaane mo. Wonto di paare cherubi sem tetare laŋa ne, se na zege dakaa kam baŋa ne to.#Nwoŋim 25:18-22; 1 Tigisim 13:5-6 3Dakaa kam nam ya wo Abinadaba sɔŋɔ ne mo. O sɔŋɔ kom de déem maa wo zwoŋo yuu ne. Ba ma vo ba kwei-ka ba daŋe nabɛ toroko-doŋo baŋa ne. Ba laam ma siseiri ba tu zwoŋo kom kuri ne. Abinadaba bia balei Yuza de Ahio maa tɔge toroko kom ye ba yere-ko. 4Ahio maa wo ko yiga ne o via. 5David de Isarele dwi tiina bam maama ma leeni lei ba seini Baŋa Wɛ de ba dam maama. Ba ta maa jege kwanno, de senyɛ, de gungwei, dedaane kwɛɛra zela dwi dwi ba kwɛɛre ye ba daare ba sae ba tɔge kwaga.

6Ba ma vo ba yi Nakon na yeini o fere o mena mɛ to. Nabɛ sem ma gare se tete se lage se to. Yuza ma zi Wɛ ni-gwonim dakaa kam se o pa ka fɔge ka zege. 7Baŋa Wɛ bane ma tiini de zaŋe Yuza baŋa ne, o na wo sɛ se o tɔge dakaa kam chullu tem to ŋwaane. Nɛ sem konto ni ne, o ma mage Yuza dakaa kam teiŋa ne o go. 8David wo ma fuli dedɛ de Baŋa Wɛ na tɔge o ban-zɔŋɔ kom baŋa o go Yuza to ŋwaane. Konto ma pa o bwoŋi jei sem konto yere we, ‘Pɛrezi Yuza.’#6:8 Pɛrezi Yuza kuri mo ye Yuza Chɔgem. Mo jei sem yere de zem maama.

9Keim dem konto ma pa se David kɔre Baŋa Wɛ. O ma bwɛ o we, “Amo wó ke tɛ mo a na chwoŋa se a wane a ja Baŋa Wɛ ni-gwonim dakaa kam a ba a tei?” 10O daa maa wo sɛ se o ja-ka o ja o vo o zo Jerusalem teo wone. O ma lɛɛre o pa se ba ywori ba ja-ka ba vo Gafa tu Obed-Edom sɔŋɔ. 11Baŋa Wɛ ni-gwonim dakaa kam ma maŋe Obed-Edom sɔŋɔ ne chane setɔ. Ka na wo dáane to, Baŋa Wɛ ma swɛ wonto de o sɔŋɔ tiina maama swolim.

12Nɔɔna ma ta ba bere Pɛ David ba we, “Wɛ ni-gwonim dakaa kam na wo Obed-Edom sɔŋɔ ne to, Baŋa Wɛ swɛ o swolim lanyerane. O wonnu maama de ma vo yiga.” David laam ma vo Obed-Edom sɔŋɔ o vo o ja dakaa kam o ja o ba Jerusalem teo wone de wopwolo dedɛ. 13Nɔɔna balo na zeŋe dakaa kam to na gɔge naba-laara yaredo to, David ma pa ba zege. O ma go nabea dedaane na-paale o ke kaanem o zuli Baŋa Wɛ. 14David nam ya zo gare-wogo kolo ba na mɛ gare-fefale ba sɔ to mo. O maa tiini o sae de o dam maama se o zuli Baŋa Wɛ. 15Wonto de Isarele tiina bam maama ma ja Baŋa Wɛ ni-gwonim dakaa kam ba jege ba zoore Jerusalem wone. Ba na tiini ba jege wopwolo to, ba maama ma ke sɔɔ ye ba wui nabwanno.#1 Tigisim 15:11-28

16Ba na yɔɔre ba jege Baŋa Wɛ ni-gwonim dakaa kam ba zoore Jerusalem teo wone tei to mo, Sɔɔl bukɔ Mikaale tɔge o takworo seeni o nii o na kɔgɔ kom. O maa na nɛ Pɛ David na faŋe ye o sae o zuli Baŋa Wɛ tei to, o ma chweese‑o o bochare ne.

17David déem ya maŋe o chwi vwei dedwoŋi Baŋa Wɛ dakaa kam ŋwaane. Ba laam ma kwei dakaa kam ba zege vwei dem wone. David ma go vara o ke kaanem o zwɛ o pa Baŋa Wɛ, ye o daare o ja yazura pɛɛra o ba se o ma o zuli‑o. 18O na ke kaanem dem o ti to, o laam ma kwei Paŋwa Tu Baŋa Wɛ yere dem o ma o sɔɔle Wɛ swolim o ke nɔɔna bam yuu ne. 19O ta ma pa se ba chɛ wodiiru tem ba pa Isarele tiina kɔgɔ kom maama, baara de kaana. Nɔɔno maama ma jwoŋi bworobworo dedoa, de nɔn-wɔa, de kekan-wogila bɔŋa dedoa. Ba laam ma jage ba vo ba sam.

20Konto maama na ti to, David ma jwoori o tete sɔŋɔ se o sɔɔle Wɛ swolim o yage o sɔŋɔ tiina bam yuu ne. Sɔɔl bukɔ Mikaale ma jeeri‑o chwoŋa ne ye o we, “Nmo wolo na ye Isarele tiina Pɛ wom to zem yage n tete chekke! Nmo tiini n toŋe jworim dedɛ, de n na jale n tete pa se n tontoŋena bam busankan-bia na n chaveera to!”

21David ma leiri‑o o we, “Amo zem sage se a zuli Baŋa Wɛ mo. Wonto mo yage nmo kwo de n kwo sɔŋɔ tiina o daare o kuri amo se a taa nii o nɔɔna Isarele tiina bam baŋa ne. A nam ta wó fɔge a bere a wopwolo de do. 22Amo nam ta lage a yaale a tete a dwoni a na ke tei to mo. Amo nii a tete se a ta dae kolokolo mo, se ko ná ye busankan-bia balo n na tɛ ba taane to, banto wó yɔɔre ba tiini ba zuli-ne mo.”

23Sɔɔl bukɔ Mikaale déem nam wo fɔge o lo bu se o vo o te.

Currently Selected:

2 Samuwel 6: KBG

Highlight

Copy

Compare