2 Samuwel 5

David jigi Isarele tiina bam maama pɛ

1Isarele dwi tiina bam maama déem vei Heboron mo. Ba ma ta de David ba we, “Nii mo. Debam maama dedaane nmo ye yera dedoa de jana dedoa mo.#2 Samuwel 2:4 2Faŋa ye Sɔɔl ta ye debam maama pɛ to, nmo mo ye wolo na tɔge dé yiga pa se dé vei dé ke jara de dé dona to. Baŋa Wɛ nam ya maŋe o ta de nmo o we, ‘Nmo mo wó ji a nɔɔna Isarele tiina bam yuu tu ye n nii ba baŋa ne ne nayero tei.’ ”#1 Samuwel 18:3

3Konto to, Isarele nakwa bam maama déem jeeri Pɛ David tei ne Heboron ne mo. Baŋa Wɛ yiga ne mo David ke ni-sɛɛm de-ba. Ba laam ma lwo nuga o yuu ne se o taa ye Isarele tiina bam maama pɛ.

4David déem jege bena fintɔ mo ye ba tiŋi‑o se o ji pɛ. O ma di paare dem bena finna. 5O ya jeini Heboron ne o di paare Judah dwi tiina baŋa ne bena yarepɛ de chichworo mo, ye o daare o vo o jeini Jerusalem ne o di Isarele tiina dedaane Judah tiina maama paare bena fintɔ-yatɔ.

David na di Jerusalem tei to

1 Tigisim 11:4-9

6Jebusi tiina déem mo zoore Jerusalem teo kom ne. David dedaane o jar-keira bam ma zaŋe ba vo Jerusalem se ba ke jara de Jebusi tiina bam. Nɔɔna bam konto maa wo jeeli we David wó wane o di ba teo kom. Mo kokuri ba déem mɔne‑o ye ba ta ba we, “Lilwoa de gwane tete wó wane ba che abam se á yé zo ywo-seeni.” 7De konto de, David wane Zion o di. Ko déem ye teo kom dam jeiga mo. Nɔɔna laam maa jege jei sem konto ba bwoi we, ‘David teo’.

8Dɛ dem konto ne David déem tage de o nɔɔna bam o we, “Nɔɔno ná boŋe se o wane Jebusi tiina bam, konto tu wó tɔge peo bɔɔne na-chwoŋa kam mo o zo teo kom o yi-ba. Amo tiini a chuli-ba, de ba na maŋe ba ye gwane de lilwoa to!” Konto ŋwaane nam mo ba tɛ ba taane ba we, ‘Lilwoa dedaane gwane bá na chwoŋa se ba zo pɛ sɔŋɔ kom wo.’

9David na di teo kom dam jeiga kam to, mo o lɛɛre o maŋe da o zoore ko wone. O ma bwoŋi ko yere we ‘David teo’. O ma zege mɛ tega kam na suuri ka maŋe daane to o jwoori o lɔ teo kom o zege o kaage jeiga kam maama. 10David dam dem déem ma fɔge de puli de ke da, Paŋwa Tu Baŋa Wɛ wom na wo o tei ne to ŋwaane.

11Tura teo Pɛ Hiram déem ma toŋe nɔɔna David tei ne se ba ke pipiu daane.#1 Pwa 5:1 O ma pa se ba ja Sedare da-kwollu ba vo ba pa‑o. O ta ma pa se gwaro, de kandwa-cherena tɔge ba vo, pa se ba lɔ pɛ sɔŋɔ ba pa David. 12David ma lɔre we Baŋa Wɛ mo seene o pa se o di Isarele teo paare, ye o ta daare o pa se o paare dem fɔge de puli lanyerane Wɛ tete nɔɔna Isarele tiina bam ŋwaane.

13David na zege Heboron ne o vo o zoore Jerusalem ne to, mo o daa ta swo ka-bi dedɛ o woli o kaana bam wone. Ba ma lo bia dedɛ, bakeiri de busankane, ba pa‑o. 14Bia balo David na loge Jerusalem ne to yera mo tento:

Sammua, de Sobabi, de Natan, de Solomon, 15de Ibihara, de Elisua, de Nefega, de Jafia, 16de Elisama, de Eliada, dedaane Elifeleti.

David di Filisi tiina bam

17Filisi tiina bam déem ma ni we ba tiŋi David se o taa ye Isarele tiina pɛ. Ba ma la ba jar-keira bam maama ba ke daane ba vo ba beeri o jeiga se ba ja. David ma lɔre ko ni ne ye o nwoŋi teo kom ne o vo o seigi dalem jei sem ne. 18Filisi tiina bam ma ba ba yi Refayim bwolo kom. Ba ma maŋe da ba faare jei sem maama. 19David ma bwei Baŋa Wɛ o we, “A véi a jeeri Filisi tiina bam de jara, se nmo wó ke-ba a jeŋa ne na?” Baŋa Wɛ ma leiri‑o o we, “Ɛɛ, zaŋe n vo n jeeri-ba, se amo wó seene a ke-ba n jeŋa ne.”

20David ma vo o yi Baal Perazim o jeeri Filisi tiina bam. O ma wane-ba o di. O laam ma ta o we, “Baŋa Wɛ mage o pore a dona bam baŋa ne mo o zeili-ba, nenɛɛne na na mage ba pore tei to.” Ba ma lɛɛre ba jege jei sem konto ba bwoi we ‘Baal Perazim’. #5:20 Baal Perazim kuri mo ye Dam tu wolo na mage o pore to. 21Dáane mo Filisi tiina bam duri ba daare ba jwona yam ba yage. David de o nɔɔna bam ma pɛ-ya ba ja ba viiri.

22Ko na ke da fenfee to, Filisi jar-keira bam daa ta ma jwoori ba ba ba faare Refayim bwolo kom maama. 23David daa ma bwei Baŋa Wɛ se o lɔre o na wo ke tei to. Wɛ ma ta o we, “Nmo ná jeeri-ba, se n yé yɔɔre ba yiga vekke. Nam kaare n tɔge Balesam teeni dem n kekare dáa kadwoŋi kam ne n yi ba kwaga seeni. 24Ta‑n nii teeni dem yuu ne. Nmo ná tu n ni ko dɔna de baŋa ne, se n laam zaŋe n jeeri-ba. Ko bere we amo Baŋa Wɛ tete mo dɛ á yiga se a jeeri Filisi tiina bam de jara se a di-ba.”

25David ma seene o ke kolo Baŋa Wɛ na bere‑o se o ke to. Ko ma pa se o wane Filisi tiina bam o di. O ma zege Gibeon ne o pare-ba o vo o yi Gezere.

Currently Selected:

2 Samuwel 5: KBG

Highlight

Copy

Compare