2 Samuwel 4

Ba na go Isi-Bosefa tei to

1Sɔɔl bu Isi-Bosefa déem ma ni we ba go Abenera Heboron wone. O vɔna ma pare, ye foone de zo Isarele tiina bam maama ko ŋwaane. 2Isi-Bosefa déem jege jar-keira yiga tiina balei na ye Beerofa tu Rimon bia. Ba yera maa ye Baana de Rekabi. Ba ye Benjamin dwi tiina mo. Ba déem jeeli Beerofa teo kom ba ke Benjamin laŋa kam wone mo. 3Kokuri to, balo déem ya na zoore Beerofa ne to duri mo ba vo ba zoore Gitayim teo ne. Ba nam ye veira mo teo kom konto ne de zem maama.

4Sɔɔl bu Jonatan déem jege bu o yere na ye Mefibosɛfi.#2 Samuwel 9:1-13 O maa ye gɔrɔ. Maŋa kalo o na jege bena yanu to, mo ba jaane Sɔɔl de Jonatan lua taane ba nwoŋi Jezerele teo wone ba ba. Ba na nigi to mo kaane wolo na jege Mefibosɛfi o nii to kwei‑o se o ja o duri o lu. O na tiini o lage lela to, bu wom ma vere o jeŋa ne o kwori o to tega ne pa se o ji gɔrɔ.

5Dɛ dedwe wea kam na tiini ka dana to, mo Isi-Bosefa tigi o diga ne o sia. Rimon bia Rekabi de Baana ma vo ba yi o sɔŋɔ kom. 6-7Ba ma zo sɔŋɔ kom wone ba ke nenɛɛne ba lage ba beeri muni mo. Ba ma zo o diga kam wo de o tigi o dɔ mo o gadwogo baŋa ne. Ba ma kwei seo ba zɔ o puga ne ba go. Ba ma gwoni o yuu, ye ba ja-ko ba jwoori ba liisi ba viiri. Tete dem konto ne, ba ma yɔɔre ba kwei Jɔdan bwolo chwoŋa kam ba vo taa ba poore tega. 8Ba ma ja Isi-Bosefa yuu kom ba vo Heboron. Ba ma zo Pɛ David tei ye ba ta ded‑o ba we, “Nii, nmo dono Sɔɔl bu Isi-Bosefa yuu mo tento. Sɔɔl déem kwaane se o go nmo mo, ye zem dɛ dento Baŋa Wɛ ŋwe n jene Sɔɔl de o dwi dem maama baŋa ne o pa‑m.”

9David ma leiri Rekabi de o nyaane Baana o we, “Ŋwea Tu Baŋa Wɛ ye wolo na jwoŋi amo o yage cham maama wone to mo. Amo nam dugi wonto yere ŋwaane we, á maŋe se á te mo! 10Nɔɔno wodwoŋi déem tu o ta de amo we Sɔɔl tega. Kotu ya boŋe we ta-laao mo o tage o bere-ne se o jwoŋi ŋweero de ŋwaane. A ma pa se ba ja‑o ba go Zikalag ne se ko taa ye o ŋweero!#2 Samuwel 1:1-16 11Abam nam zo nɔn-ŋom diga á go‑o o peiga jei ne ye o dɔa. Á na toŋe puseŋa kikia yalo to, ko wó taa ye tɛ mo á yera ne? Amo dugi we amo de wó go abam mo se ko leiri nɔɔno wom toone dem yuu ne, pa se á yera jei logo baŋa ne.”

12David ma pa o nɔɔna bam ni se ba go-ba. Ba ma go-ba ye ba daare ba gwoni ba je de ba nɛ. Ba ma kwei ba yera yam ba vo ba pale ba yage Heboron buga kam ni ne. Ba ma daare ba kwei Isi-Bosefa yuu kom ba ja ba vo ba suli Abenera yibeeli dem na wo Heboron ne to wone.

Currently Selected:

2 Samuwel 4: KBG

Highlight

Copy

Compare