2 Samuwel 3

1Tigura déem ma lɛɛre ka peini Sɔɔl diga kam de David diga kam tetare ne ka dáane. David diga kam ma yɔɔre ka nae dam dɛ maama ka woli da, ko daare ye Sɔɔl diga tiina bam bwom dɛ maama.

2David ta na wo Heboron ne to, mo o loge o bia baredo banto:

O bu-kwea kam mo ye Aminon. Wonto nu maa ye Jezerele tiina bukɔ Ahinoam.

3Chileabi ma saŋe. O nu ye Abigali mo, o na ye Kamele tu Nabale kadeim wom to.

Abisalom maa ye o bia batɔ tu. O nu déem ye Gesura teo pɛ Talimayi bukɔ Maaka mo.

4Adonija maa ye o bia bana tu. O nu ye Hagifa.#1 Pwa 1:5

Sefatia maa ye bia banu tu. O nu ye Abitali.

5David bia baredo tu maa ye Ifream. O de nu déem ye Egela mo.

Mo bia balo David na loge Heboron ne to.

Abenera gɔge o zo David kɔgɔ kom wone

6Maŋa kalo tigura kam na tigi Sɔɔl diga kam de David diga kam tetare ne to, Abenera ma ba o jege dam dedɛ Sɔɔl kwaga nɔɔna bam maama wone. 7Sɔɔl nam ya jege o ka-bia wodwoŋi, o yere na ye Rizapa. Wonto maa ye Aya bukɔ. Dɛ dedwe Sɔɔl bu Isi-Bosefa ma ta de Abenera o we, “Bɛ mo ke ye n vo n peini de a kwo ka-bia kam?”

8Isi-Bosefa taane dem ma fuli Abenera wo dedɛ. O ma leiri‑o o we, “Nmo pɛ chega we amo ye bebare nyem mo na? Amo wó yeigi Sɔɔl kwaga nɔɔna bam a ke Judah tiina jeŋa ne na? De zem maama, a tiini a kwei a chega maama mo a pa n kwo Sɔɔl, de o diga tiina dedaane o badwonna maama. Amo nam mo chege David pa se o ta wo di nmo, ye n laam kwei kaane wonto taane n ja n jeeri-ne. 9-10Baŋa Wɛ déem gwoni ni o tiŋi de David o we, o wó jwoŋi paare dem Sɔɔl dwi dem tei ne o pa David. Wɛ nam wó pa se a na a lɛɛro, nenɛɛne a ná wo pɛ se ni-gwonim dem konto ji chega. Amo laam wó woli David se o di paare Judah tiina de Isarele tiina bam maama baŋa ne, ko na zege Dan laŋa kam seeni se ko yi Beeriseba to.” 11Isi-Bosefa ma ga ni se o puri de Abenera, o na tiini o kɔre‑o to ŋwaane.

12Abenera ma toŋe nɔɔna David tei ne o we, “Teo kom maama ye wɔ nyem mo, ye ko dae nmo? Nam sɛ se nmo de amo ke ni-sɛɛm daane, se a ja Isarele tiina bam maama a ba a ke n kwaga ne.” 13David ma jwoori o leiri‑o o we, “Nmo taane dem lamma. N nam ná lage se dé fɔge dé ke ni-sɛɛm daane, se n ná beene, se n ja Sɔɔl bukɔ Mikaale n jwoori n ja n ba n pa-ne.”

14David ma daare o toŋe nɔɔna Isi-Bosefa tei ne o we, “Jwoori n pa-ne a kaane Mikaale. A déem go Filisi tiina bi mo se a wane‑o a di a ma ke a kaane.”#1 Samuwel 18:27

15Mikaale déem nam ya zo Layisi bu Paliteli mo. Isi-Bosefa ma pa ba vo ba jwoŋi Mikaale o tei ne. 16Ba na maa kɛ to, Paliteli ma tɔge Mikaale kwaga ye o keeri taa o vo o yi Bahurim teo kom. Abenera ma bage‑o o we, o jwoori sɔŋɔ! O ma pipiri o jwoori.#1 Samuwel 25:44

17Abenera ma vo Isarele nakwa bam tei o ta de-ba o we, “Maŋa kalo abam na boŋe se David taa ye á pɛ to, ko dae zem. 18Chwoŋa laam tiga se á ke á boboŋa na lage tei to. Nam yé swei-na we Baŋa Wɛ ya maŋe o gwoni ni se o tɔge o tontoŋeno David baŋa ne o jwoŋi o nɔɔna Isarele tiina bam o yage Filisi tiina bam de dé dona maama jeŋa ne mo.”

19Abenera tete ma vo o ŋɔɔne de Benjamin dwi tiina bam. O laam ma daare o vo Heboron se o lwoni kolo na ke to o bere David, se o taa yei Isarele tiina de Benjamin tiina bam maama na boŋe se ba ke tei to. 20Abenera ma ja nɔɔna finlei o ke o kwaga ne ye ba vo Heboron. Ba na yi da to, mo David pɛ se ba ke kuri kamunu ba pa-ba. 21Ko kwaga ne mo Abenera déem tage de David o we, “Pɛ, pa-ne chwoŋa se a vo a la Isarele tiina bam a ke daane se ba jeeri‑m. Ba laam maa wó ke ni-sɛɛm dede‑m se n ta‑n ye ba pɛ, n di paare tega kam maama ne, ne n boboŋa na lage tei to.” David ma bane Abenera o yage chwoŋa ne, pa o jwoori o viiri de o yazura.

22Joaba de David jar-keira bam déem ya vei jara keim ne mo. Ba ma vere jejegero dedɛ ba dona tei ne ba ja jwoori sɔŋɔ. Ba na yi Heboron to dedaane Abenera daa tera. O de David ŋɔɔne ba ti mo, ye pɛ wom pa se o viiri de o yazura. 23Joaba dedaane o kwaga kam na yɔɔre ba yi to, mo nɔɔno tage‑o o we, “Nera bu Abenera ya tu ywo-seeni o na Pɛ, ye o pa o jwoori o viiri de o yazura.”

24Joaba ma vo o zo David tei ye o we, “Abenera na tu nmo tei to, bɛ mo ye n yage‑o pa se o jwoori o viiri mɔle mɔle? 25Nmo maŋe n yei Abenera na ye wolo. O tu se o ŋɔ n swa mo o nii, se o lɔre n na-veili dedaane kolo maama n na jege n ke to.”

26Joaba ma nwoŋi da David tei ne, ye o vo o toŋe nɔɔna Abenera kwaga ne se ba ja‑o ba jwoori. Ba ma beeri‑o ba na Sira vole dem seeni. Ba ma ja‑o ba jwoori, ye David yeiri ko ni ne. 27Abenera na jwoori o vo o yi Heboron to, mo Joaba jaane‑o o fɔɔre o vo gugworo kodwoŋi ne, teo kom manchwo-peo ni ne. O ma ke nenɛɛne o lage se ba bwɛ woŋo mo daane. Dáane mo o zɔge‑o o puga ne o go, se ko ŋwe Abenera na go wonto choro Asaheli to jene.#2 Samuwel 2:22-23

28David déem na tu o lɔre we Joaba go Abenera to, o maa we, “Baŋa Wɛ wó zege amo kwaga ne we amo de a nɔn-bia bam maama yiga tera Abenera toone dem wone. 29Abenera toone dem jene wo Joaba de o sɔŋɔ tiina baŋa ne. Wɛ wó pa se Joaba dwi dem maama wone, jaweero dwi dwi yé fɔge te ti se ko taa vei wuu. Ŋɔn-pwoni wó le ba badwonna yera ne. Ba badwonna wó taa ye naywanno, de gwaaro#3:29 gwaaro naa baywallo. Ba badwonna wó te jara keim wone. Ba badaara wó ga wodiu se ba di.”

30Ko déem dɛ konto mo ye Joaba de o nyaane Abisayi paale ba go Abenera. Ko nam ye o de déem na go ba choro Asaheli Gibeon jara yam ne to ŋwaane mo ba ke konto.

31David ma ta de Joaba de o nɔɔna bam maama o we, “Á maama kaare-na á gwaaro, se á daare á zo gare-nyenyaaro wo-chechɔgɔ ŋwaane. Dé jege se dé di Abenera lua mo.” David tete ma pɛ Abenera na wo gandwa yalo baŋa ne to kwaga o pu. 32Ba ma kwei Abenera ba suli Heboron wone. David ma maŋe o yibeeli dem ne o keeri dedɛ. Nɔɔna bam maama de ma tiini ba keeri. 33David déem dɛ ko ŋwaane o leeni luseim leiŋa kanto Abenera baŋa ne o we:

“Abenera ye nɔn-jworo mo,

pa se o te toone dento dwi na?

34Abenera, ba wo vɔge n je sem.

Ba nam wo mɛ chaponno ba vɔ n nɛ de.

Nmo yɔɔre n te nɔn-gora jeŋa ne mo!”

David na leeni leiŋa kam konto to, nɔɔna bam maama daa ma to keira ne. 35Ba ma kwaane se ba kwoori David se o jwoori o di wodiu dɛ dem konto ne. O ma ve ye o du duuri o we, “Amo ná di wodiu ye wɛ wo zo, se Wɛ pa lɛɛro yi-ne!”

36Nɔɔna bam na maane David na ke tei konto to, ba ma sɛ de wopwolo. Ba wo yeini ko da kolo maama pɛ wom na ke to mo. 37Dento dɛ dem ne, Judah tiina bam de Isarele tiina bam maama ma lɔre we, Abenera na tege to, ko dae David yiga.

38David déem ma ta de o nɔɔna bam o we, “Abam wo maane we Isarele tiina nɔn-kamunu zem mo tege na? 39Amo zem ye Pɛ wolo Wɛ na kuri to mo. De konto de, a nam tiini a bwona mo lage-lage. Zeruya bia balei bam konto tiini ba dana se a wane-ba a che. Baŋa Wɛ nam mo wó waare-ba se ko maŋe de ba totoŋ-lwanno tem!”#1 Pwa 2:5-6

Currently Selected:

2 Samuwel 3: KBG

Highlight

Copy

Compare