2 Samuwel 2

David jigi Judah tiina pɛ

1Konto kwaga ne, David ma bwei Baŋa Wɛ o we, “A jwoori Judah laŋa kam se a vo a taa zoore ba teene dem dedoa ne na?” Baŋa Wɛ ma leiri‑o o we “Ɛɛ, véi.”

David daa ma bwei‑o o we, “Teo kɔ mo a nam wó vo?” Baŋa Wɛ maa we, “Véi Heboron.”#Josua 15:13

2David ma zaŋe o vo Heboron se o taa zoore da, o de o kaana balei bam, Ahinoam dedaane Abigali. Ahinoam nam ya nwoŋi Jezerele ne mo, Abigali maa ye Kamele tu Nabale kadeim wom. 3David nɔɔna bam de ba sɔŋɔ tiina maama de déem ma tɔge ded‑o ba vo ba zoore Heboron teo kom de ko nawuura yam wone. 4Judah tiina nakwa bam ma vo Heboron ne, ye ba lwo nuga David yuu ne ba tiŋi‑o se o taa ye Judah tiina pɛ.#2 Samuwel 5:1-5

David ma ni we Jabese Gilead tiina mo kwei Sɔɔl ba suli. 5David ma toŋe nɔɔna ba tei ne de kwora kanto ye o we:

“Baŋa Wɛ wó swɛ abam swolim, de á na bere á pɛ wom chega á kwei‑o á suli to. 6Amo nam sɔɔle Baŋa Wɛ mo a pa abam se o de bere abam chega, o daare o ke abam lanyerane. Á keim-laao konto ŋwaane amo de wó ke abam lanyerane.#1 Samuwel 31:11-13 7Sɔɔl na tege to, nam ta jege-na baare, se á daare á ta‑á dana! Lɔre-na we Judah tiina bam tiŋi-ne mo se a taa ye ba pɛ.”

David sɔŋɔ kom dedaane Sɔɔl sɔŋɔ kom tetare jara yam taane

8Nera bu Abenera déem mo ye Sɔɔl jar-keira bam yiga tu. Sɔɔl na tege to, Abenera ma ja Sɔɔl bu Isi-Bosefa o bɛ Jɔdan buga kam o lu o vo Mahanayim.#1 Samuwel 14:49-50 9Abenera ma pa se Isi-Bosefa di paare Gilead teene dem baŋa ne, de Asuri tiina baŋa ne, de Jezerele jei sem baŋa ne, ko ta woli de Efrayim dwi tiina bam, de Benjamin dwi tiina bam, dedaane Isarele tiina badaara bam maama baŋa ne. 10Isi-Bosefa déem jege bena finna mo ye o bobo se o di paare. O ma jeini paare dem wone bena yalei.

Ko daare Judah dwi tiina bam ma pa David chega se o taa ye ba pɛ. 11David ma maŋe Heboron ne o di paare Judah tiina bam baŋa ne bena yarepɛ de chichworo.

12Dɛ dedwe Abenera de Isi-Bosefa dedɛɛra bam ma zege Mahanayim ne ba vo Gibeon. 13Zeruya bu Joaba de déem ma ja David dedɛɛra bam o vo o jeeri Abenera de o nɔɔna bam Gibeon bula kam ne. Nɔɔno maama de o jar-keira maa wo bula kam bubɛ ne, kɔgɔ dedoa wo bula kam daa kadwoŋi ne ye kɔgɔ kodwoŋi wo ka daa kakam kam ne pa se ba jeini ba jeeri daane. 14Abenera ma ta de Joaba o we, “Le n jar-keira bam wone nɔɔno dedoa dedoa se amo de le dedoa dedoa. Banto maa wó jeeri daane ba jaŋe balei balei se dé nii.” Joaba ma sɛ.

15Ba ma le Benjamin dwi dem nɔɔna fuga-balei na ye Isi-Bosefa kwaga nɔɔna to se ba nwoŋi ba jeeri David nɔɔna fuga-balei dedaane jara. 16Ba balei balei na wo jara yam wone to, ba maama ma ja da yu-ywei. Ba laam ma kwei se-zɔɔro ba moore da sɛ ne, ye ba go daane. Ko dɛ konto mo ye nɔɔna finlei-bana bam maama te. Ba ma pa jei sem konto yere we, ‘Se-zɔɔro Kapworo’. 17Ko na tu ko chɛ to, nɔɔna bam maama ma lɛɛre ba zo jara wone. David jar-keira bam ma di Abenera de Isarele jar-keira bam.

18Zeruya bia batɔ bam, Joaba, de Abisayi, de Asaheli déem tɔge ba wo jara yam wone. Ko ná ye Asaheli, wonto déem wara o dwoi feira. 19O ma zaŋe o yɔɔre o pare Abenera se o ja. O maa wo sɛ se o tɔge wo-gaa. 20Abenera ma pipiri o na‑o ye o we, “Asaheli, nmo mo pare-ne konto na?” O de ma leiri o we, “Ɛɛ! Amo mo pare‑m.”

21Abenera daa ma ta‑o o we, “Nam yage amo se n vo n beeri nɔn-doŋo kodwoŋi n pare. N ná jaane kotu, se n jwoŋi o jara zela yam n ta‑n tei.” Asaheli ma ve se o yage Abenera zeilim.

22Abenera daa ta ma kaane‑o ye o we, “Yé ta‑n pare-ne se n ja! Amo ba lage se a fere‑m a de tega ne a go. Nmo ná fe-ne se a go‑m, a daa bá wane n zembaaro Joaba yibia a nii.” 23Asaheli nam wo sɛ se o jwoori kwaga. Abenera ma kwei o chichwei dem nabili seeni o tɔ Asaheli puga ne de dam pa se de moore da ye de kɛ de nwoŋi o kwaga ne. Asaheli ma to tega ne o te. Wolo maama na tu o yi mɛ Asaheli na tege o tigi to, kotu wó maŋe dáane mo o zege.

24Joaba de Abisayi laam ma zeili Abenera se ba ja. Wɛ-zoore maŋa ne mo ba yi Amma zwoŋo kom seeni. Jei sem konto wo Gibeon kagoa kam chwoŋa ne mo, mɛ na bwola de Gia to. 25Abenera ma la Benjamin jar-keira bam o ke daane zwoŋo kodwoŋi yuu ne. Ba ti ba yiga mo se ba ke jara. 26Abenera ma tɔɔle o bwoŋi Joaba o we, “Dé lage dé ja jara taa dé go daane dé vo dé yi yei ne mo? N bá‑n pa dé yage konto na? N wo maane we ko kweelim jei wó taa ye wo-chechɔgɔ yerane mo na? Debam maama na ye chorro daane to, nmo bá‑n ke lela n ta de n nɔɔna bam se ba daa yé zeili debam na?”

27Joaba ma sɛ ye o we, “Amo dugi Ŋwea Tu Wɛ wom yere ŋwaane, nmo ya ná wo tage tento, a nɔɔna bam ya wó kwei tete dem maama ba ma zeili abam ba ja mo.” 28Joaba ma le o nabɔnɔ kom o wu pa se o nɔɔna bam maama zege. Ba ma yage Isarele tiina bam parem. Ba daa wo mage jara dedaane-ba.

29Tete dem konto maama Abenera de o jar-keira bam ma vo ba tɔge Jɔdan bwolo kom ne ba kɛ. Ba ma vo ba bɛ Jɔdan buga kam. Tega na poore to, ba ta maa vei taa, ba vo ba yi Mahanayim.

30Joaba na yage Abenera zeilim to, o ma zaŋe se o jwoori sɔŋɔ. O ma jeeli o nɔɔna bam ni ye o maane we ba fuga-nogo mo woli Asaheli wone ye ba tera. 31David jar-keira bam nam ya go Abenera nɔɔna bam bia yatɔ dedaane fuseredo mo na ye Benjamin dwi dem tiina. 32Joaba de o nɔɔna bam ma ja Asaheli yera yam ba vo Bɛtelehem. Ba ma suli‑o o kwo yibeeli dem wone. Konto kwaga ne, mo ba vei konto taa tete dem maama wone. Te-pora ni ne ba ma yi Heboron.

Currently Selected:

2 Samuwel 2: KBG

Highlight

Copy

Compare