2 Samuwel 24

David jeeli o jar-keira bam ni

1 Baŋa Wɛ bane déem daa ma jwoori de zaŋe de Isarele tiina bam. O ma tɔge David baŋa o pa ba na chɔgem. O ma ta David se o vo o jeeli Isarele dedaane Judah baara bam ni se o lɔre ba na mae tei to.#1 Tigisim 21:1 2Pɛ David laam ma pa o jar-keira yiga tu Joaba ni o we, “Véi n kaare Isarele dwia yam maama wone, ko na zege Dan laŋa kam seeni se ko yi Beeriseba to. Pa ba jeeli baara balo na yi se ba woli a jar-keira bam wone to ni.”

3Joaba ma leiri David o we, “Pɛ, amo lwoori nmo Tu Baŋa Wɛ wom se o pa Isarele kɔgɔ kom puli kuni bi se ko dwoni ba zem na ye tei tento to, se nmo daare n ma n yia n na konto maama. Se bɛ ŋwaane mo nmo laam nam boŋe se n jeeli ba ni konto dwoŋi?”

4De ko de Pɛ David wo to o pa Joaba dedaane o jar-keira yiga tiina bam. Ba ma zaŋe ba nwoŋi se ba vo ba jeeli Isarele baara bam ni. 5Ba ma vo ba bɛ Jɔdan buga kam. Ba ma zege Arowa ne, dedaane teo kolo na wo bwolo kom tetare ne to, ba bobo se ba taa jeeli nɔɔna bam. Ba ma zege dáane ba tole Gad laŋa kam maama ba vo ba yi Jazera. 6Ba ma daare ba vo Gilead, ba kɛ ba vo ba yi Kadese na wo Hiti tiina laŋa kam ne to. Ba daa ma zaŋe ba vo Dan, ba daare ba zege Dan ne ba gugwoli ba vo Sidon. 7Ba na zege dáane to, ba ma kɛ ba yɔɔre Tura teo kom na lɔge ko pe de dam to seeni. Ba ma daare ba tole Hivi tiina teene dem, de Kanaan tiina teene dem maama, ba vo ba kweeli Beeriseba ne. Teo kom konto maa wo Judah tega-kuri seeni kagoa kam ne.

8Ba déem kwei chane nogo de da finlei mo ba ma kaare teo kom ni maama ba pu. Ba laam ma jwoori ba vo Jerusalem. 9Joaba ma lwoni o bere pɛ wom Isarele baara balo na yi jara keim ye ba jeeli-ba to ni na mae tei to. Isarele dwia yam wone, ba déem ye baara morro bia nana (800,000) mo. Ko daare ye Judah dwi dem wone ba ye baara morro bia yanu (500,000).

10David na jeeli nɔɔna bam ni o ti to, mo o boboŋa daane‑o. O ma ta de Baŋa Wɛ o we, “Amo tiini a ke wɛleere de a keim dento. Baŋa Wɛ, popo a lwoori‑m se n yage n ma n chɛ-ne. Kokuri to, a tiini a toŋe jworim dedɛ.”

11Tega na jege ka poore ye David zaŋe to dedaane Baŋa Wɛ kwora ya tu o sampwora Gaadi tei. Wonto maa ye Wɛ ni-jwoŋinu wolo na toŋe o pa David to.#1 Samuwel 22:5 12-13Baŋa Wɛ ma pa‑o ni se o vo o ta de David o we, “Baŋa Wɛ na tage kolo to mo tento: N jege se n kuri wonnu tento tetɔ wone dedoa se a ke-ko n yera ne. Kɔ mo nmo nam wó kuri? N lage se kana mo zo n teo kom bena yatɔ#24:12-13 bena yatɔ naa bena yarepɛ, naa se á dona mo taa jege abam ba zeila ye á duri ba yiga ne chane setɔ, naa se jawe-chɛɔ to n teo kom wone da yatɔ? Nam boŋe lanyerane, se n laam kuri te wone n ta n bere-ne, se amo de jwoori a vo a ta de wolo na toŋe-ne n tei ne to.”#1 Tigisim 21:11-12

Gaadi na tage Baŋa Wɛ kwora kam de David o ti to, 14David ma leiri‑o o we, “Amo bochare tiini de di mo. A wó kuri kɔ se a daare kɔ? Amo ba lage se nabiina taa jege debam ba dam kuri ne. Baŋa Wɛ tete nam ná waare debam, ko gara, wonto na tiini o duri nɔɔna yibwona to ŋwaane.”

15 Baŋa Wɛ laam ma pa se jawe-chɛɔ ba ko to Isarele teo kom ne. Jaweo kom ma bobo zezeŋa kam konto ko goe nɔɔna taa se ko yi maŋa kam na yi se ko kweeli to. Ko nam na zege Dan laŋa kam seeni se ko yi Beeriseba to, nɔɔna morro fuserepɛ (70,000) déem mo tega. 16Wɛ maleka kam na yi Jerusalem teo kom se ka go ko nɔn-bia to, mo Baŋa Wɛ leiri o boboŋa de lɛɛro telo o na toŋe ba baŋa ne to. O ma ta de maleka kam o we, “Ko maŋe! Dɔne n jeŋa teo kom baŋa ne se n yé chɔge-ko!” Konto de Baŋa Wɛ maleka kam ya zege ka maŋe de Jebusi tu Arawuna mena ferem jei sem ne mo.

17David na nɛ maleka kam na jege nɔɔna bam ka goe to, o ma ta de Baŋa Wɛ o we, “Nɔɔna banto ye amo kwaga nɔɔna mo. Ba tete nam ke bɛ mo ye ba na lɛɛro tento? Ko ye amo mo tiini a ke wɛleere. Amo tusi dedɛ. Nam ma n jeŋa n waare amo de a sɔŋɔ tiina bam n daare banto.”

David lɔge bimbini se o ma o zuli Wɛ

18Dɛ dem konto ne nɔɔ mo Gaadi de vei David tei o ta ded‑o o we, “Zaŋe n vo n lɔ kaanem bimbini Arawuna mena ferem jei sem ne se n ma n zuli Baŋa Wɛ.”#2 Tigisim 3:1 19David ma sɛ Baŋa Wɛ ni dem o na pɛ Gaadi se o ta ded‑o to, ye o zaŋe o maa vei jei sem. 20Arawuna na kwoni o nii o na we pɛ de o dedɛɛra mo vei ba beene o tei to, mo o nwoŋi o vo pɛ wom tei o vwi o yibia tega ne o zuli‑o.

21O ma bwei‑o o we, “Pɛ, bɛ mo jege nmo ko beene amo tei ywo-seeni?” David ma leiri‑o o we, “Amo tu se a lwoori‑m mo se n yeigi n mena ferem jei sem n pa-ne. A lage se a lɔ kaanem bimbini dáane mo a zuli Baŋa Wɛ se ko pa jawe-chɛɔ kom ti dé teo kom ne.” 22Arawuna ma ta o we, “Pɛ, nam kwei-ka zɛɛra n ma n ke kaanem delo maama n na lage to. Nii amo nabɛ mo tento se n wane n ja n zwɛ n ma n ke kaanem dem. Mena ferem dɛ sem de nabɛ zela yam de maa wora se n kwei-ya n ma n tɔre mini n zwɛ vara bam. 23Pɛ, amo kwei tento maama a pa nmo zɛɛra.”

Arawuna ma daare o ta‑o o we, “Nmo Tu Baŋa Wɛ wom wó sɛ o jwoŋi n pɛɛra yam.” 24David ma ve se o jwoŋi-te zɛɛra ye o ta de Arawuna o we, “Amo wó ŋwe te maama jene mo a pa‑m. Kokuri to, a ba lage se a kwei pɛɛra yalo a na jwoŋi zɛɛra to a zwɛ a ke kaanem a pa a Tu Baŋa Wɛ.”

David ma jeeli lu-nyenno sabu-dala finnu o pa Arawuna o ma yeigi o mena ferem jei sem de o nabɛ sem. 25O ma lɛɛre o lɔ bimbini da se o ma ke kaanem o zuli Baŋa Wɛ. O ma daare o ke zwɛɛm pɛɛra, de yazura pɛɛra o ma kaane Baŋa Wɛ. Baŋa Wɛ ma sɛ o wɛ-lworo kom, ye o daare o pa se jawe-chɛɔ kom yage Isarele teo kom maama.

Currently Selected:

2 Samuwel 24: KBG

Highlight

Copy

Compare