1 Pwa 1

David kokweero maŋa kam taane

1Pɛ David déem tiini o kwe ye o bena gaale. O ná maŋe o zo gwaaro tei maama, o ware waaro tem. 2O tontoŋena bam ma ta ba we, “Dé tu, pa se dé beeri busankan-pwola se o taa wo n tei ne o nii nmo baŋa ne. Wonto wó taa kukwori‑m se waaro daa yé taa zoore‑m.”

3Ba ma buŋi Isarele teo kom maama wone ba na bukɔ-laao, o yere na ye Abisage ye o zoore Sunem teo ne. Ba ma ja‑o ba vo ba pa pɛ wom. 4Bukɔ wom yibia déem tiini ya lana ye o sɛ se o taa wo pɛ wom tei ne o woli‑o. Pɛ wom de nam wo ke sare-peiga ded‑o.

5Adonija wolo nu na ye Hagifa to#1:5 O kwo déem ye Pɛ David. déem ma zaŋe o bere o tete kamunim ye o we, “A lage a ji pɛ mo.” O ma kwei torokooro de sisein-nɔɔna de se dira bam, ye o daare o kwei baara finnu se ba duri ba da o yiga.#2 Samuwel 3:4; 15:1 6Wonto déem mo ye Abisalom nyaane. O maa ye nenɔŋ-chɔrɔ mo. Ko na zege o biini ne to, o kwo David wo korese‑o naa o fɔge o bwei‑o taane we, “Bɛŋwaane mo n ke keim dem konto?”

7Adonija ma bane de Joaba wolo kwo na ye Zeruya to, dedaane Wɛ kaanem tu Abiatara. Ba ma sɛ se ba da ba woli‑o. 8Ko nam ná ye Wɛ kaanem tu Zadoki, de Benaya wolo kwo na ye Jehoyada to, de Natan wolo na ye Wɛ sampwora to, de Simeyi, de Reyi, dedaane David babɛ sem, banto maama wo tɔge Adonija kwaga.#2 Samuwel 20:23-26

9Adonija ma kwei pei, de nabɛ, de na-paala o ja o vo se o ma ke kaanem Zohelete pelɔrɔ kom baŋa ne. Jei sem konto bwola de En-Rogele. O déem ma bwoŋi pɛ wom bia bam maama na ye o chorro to, de pɛ sɔŋɔ dedɛɛra balo na nwoŋi Judah dwi dem wone to. 10Se ko ná ye Wɛ sampwora Natan, de Benaya, de pɛ wom babɛ sem, de o nyaane Solomon, o wo bwoŋi-ba.

11Natan ma zaŋe o vo o ta de Solomon nu Bafeseba o we, “Nmo wo nigi we Hagifa bu Adonija laam jigi pɛ mo, ye debam tu David yeiri ko ni ne na?#2 Samuwel 12:24 12Konto ŋwaane amo lage a bere‑m n na wó ke tei se n jwoŋi n tete ŋwea de n bu Solomon ŋwea to mo. 13Ke lela n zo Pɛ David tei n ta we, ‘Pɛ, nmo ya wo dugi duuri de amo we, amo bu Solomon mo wó saŋe n kwaga o ji pɛ na? Bɛŋwaane nam mo Adonija jigi pɛ?’ 14Tɔ. N ta ná wora n ŋɔɔna de pɛ wom, amo laam wó ba a zo, ye a zege n taane dem kwaga ne we ko ye chega mo.”

15Bafeseba ma sɛ ye o vo o zo Pɛ David tei. O déem tiini o kwe mo ye Sunem tu Abisage de wora o nii o baŋa ne. 16Bafeseba ma tiiri tega ne o zuli pɛ wom. Pɛ wom ma bwei‑o o we, “Bɛ mo n laga?”

17O ma leiri o we, “Pɛ, nmo tete mo dugi duuri n Tu Baŋa Wɛ yere ŋwaane n pa amo we, amo bu Solomon mo wó saŋe n kwaga o ji pɛ. 18Adonija nam maŋe o ji pɛ mo, ye n yeiri ko ni ne. 19O kwei nabɛ dedɛ, de na-paala, de pei mo o ma o ke kaanem. O ma bwoŋi pɛ wom bia bam de Wɛ kaanem tu Abiatara, ko ta woli de Joaba wolo na ye nmo jar-keira yiga tu to. O nam wo bwoŋi n bu Solomon wolo na kwei o chega o pa nmo to o woli da. 20Pɛ, Isarele tiina bam maama kwoni ba nii nmo mo, se ba ni nmo ni ne se ba lɔre nmo na lage se wolo leiri nmo yuu ne o di paare dem to. 21Nmo nam ná wo ke konto, ye n momwɛ ná ti ko daare amo de Solomon yerane, ba wó ma debam ba ji paweero mo.”

22Bafeseba ta na wora o ŋɔɔna de pɛ wom konto to, mo Natan yi o zo. 23Ba ma ta ba bere pɛ wom we, “Nii Wɛ sampwora Natan da.” O ma vo o tiiri pɛ wom yiga ne o zuli‑o.

24Natan ma ta o we, “Pɛ, nmo mo pɛ chwoŋa se Adonija saŋe nmo kwaga o ji pɛ na? 25Zem dɛ dento o jaane nabɛ dedɛ, de na-paala, de pei mo o ma o ke kaanem. O bwoŋi pɛ wom bia bam maama, de n jar-keira yiga tiina bam, de Wɛ kaanem tu Abiatara se ba ba. Leile konto ba jei ba nyɔ ye ba di ded‑o mo. Ba laam maa zuli‑o ye ba tɛ ba we, ‘Wɛ wó pa Pɛ Adonija taa jege momwɛ-dɛɛre!’ 26Ko daare amo wolo na ye n tontoŋeno to, de Wɛ kaanem tu Zadoki, de Benaya wolo kwo na ye Jehoyada to, de nmo bu Solomon, o wo bwoŋi debam. 27Pɛ, nmo mo pɛ chwoŋa se tento maama ke ye n wo pɛ se debam balo na ye n tontoŋena to lɔre wolo na lage o leiri nmo yuu ne o di paare to na?”

David pɛ ni we Solomon wó ji pɛ

28Pɛ David maa we, “Bwoŋi-na Bafeseba á pa-ne”. Ba ma seene ba bwoŋi‑o pa se o ba o zege Pɛ David yiga ne. 29Pɛ wom ma du duuri Baŋa Wɛ yere ŋwaane ye o we, “Ŋwea Tu Baŋa Wɛ na seene o wora ye o vere-ne chanɛɛre dedɛ wone to, 30amo na maŋe a pwooli Isarele tiina Baŋa Wɛ wom yere ŋwaane se a ke a pa‑m to, amo wó seene a ke. Nmo bu Solomon wó saŋe amo kwaga o ji pɛ.”

31Bafeseba ma kuni dwoona Pɛ David yiga ne ye o we, “Wɛ wó pa‑m momwɛ-dɛɛre.”

32Pɛ David maa we, “Bwoŋi-na Wɛ kaanem tu Zadoki, de Wɛ sampwora Natan, de Jehoyada bu Benaya á pa-ne.” Ba na tu ba zege pɛ wom yiga ne konto to, 33o ma ta-ba o we, “Ja-na Solomon á jeini amo tete bona-siseiŋa kam baŋa ne se á ja a dedɛɛra bam á woli da á vo Gihon buli-yi dem seeni. 34Á na yi da, se á pa Wɛ kaanem tu Zadoki, de Wɛ sampwora Natan lwo nuga o yuu ne se o ji Isarele tiina pɛ. Wu-na nabɔnɔ á daare á ta de kwor-dɛa we, ‘Wɛ wó pa Pɛ Solomon momwɛ-dɛɛre’. 35Laam tɔge ded‑o á jwoori á ba ywo, se o laam ba o leiri amo yuu ne o ji pɛ. Amo mo kuri‑o se o di paare Isarele de Judah tiina maama baŋa ne.” 36Benaya ma leiri o we, “Ameena! Pɛ, nmo Tu Baŋa Wɛ wó pa ko ke. 37Ne Baŋa Wɛ na maŋe o wora de nmo to, o ta wó taa wora de Solomon, pa se o paare dem fɔge de ke dam se ko dwoni nmo David paare dem.”

38Zadoki, de Natan, de Benaya, de Cherete tiina bam, de Peleti tiina bam#1:38, 44 Nɔɔna bam konto déem yere pɛ wom mo. maama ma ja Solomon ba jeini Pɛ David bona-siseiŋa baŋa ne ba ja‑o ba vo ba yi Gihon. 39Wɛ kaanem tu Zadoki ma kwei kwara de ka wo nuga wara-vwei dem wone o nwoŋi o vo o lwo-ka Solomon yuu ne. Ba ma wu nabɔnɔ kom ba daare ba bage de kwor-dɛa ye ba we, “Wɛ wó pa Pɛ Solomon momwɛ-dɛɛre.” 40Nɔɔna bam maama ma tɔge o kwaga ba ja‑o ba jwoori Jerusalem teo wo. Ba na maa vei to, ba ma wui wi ye ba jege wopwolo dedɛ pa se tega ziziŋi.

41Adonija de o veira bam maa na twɛ se ba di ba ti to mo ba nigi sɔɔ kom. Joaba na nigi nabɔnɔ kom kwori to, o ma bwei o we, “Sɔɔ konto na ke teo wone to kuri mo bɛ?”

42O na wora o ŋɔɔne konto to mo Wɛ kaanem tu Abiatara bu Jonatan tu o yi. Adonija maa we, “Ba n zo. Nmo na ye nɔn-ŋom to, ko wó taa ye kwor-ywoŋa mo n jaane n ba.”

43Jonatan ma leiri we, “Aawo, ko dae konto. Debam Pɛ David mo tiŋi Solomon se o ji pɛ. 44O ta ma pa se Zadoki, de Natan, de Benaya, de Cherete tiina bam, de Peleti tiina bam ja‑o ba vo Gihon. O ta pɛ se ba ja‑o ba jeini pɛ wom bona-siseiŋa baŋa ne mo. 45Wɛ kaanem tu Zadoki, de Wɛ sampwora Natan ma lwo nuga o yuu ne Gihon ne se o taa ye pɛ. Ba nam zege dáane mo ba beene teo kom wo de wopwolo. Konto ŋwaane mo sɔɔ kom ke konto. 46Ko woli da, Solomon laam mo jei paare yituŋu kom baŋa ne. 47Pɛ wom tontoŋena de ma ba ba ke debam Pɛ David yu-ywoŋo lei ye ba we, ‘Nmo Tu Wɛ wom wó pa se Solomon yere zaŋe de gaale, ye o paare taa daga de dwoi nmo paare dem.’ Pɛ wom ma maŋe o gadwogo yuu ne o ke o yuu tega ne o zuli Baŋa Wɛ, 48ye o we, ‘Baŋa Wɛ wom na ye Isarele tiina Wɛ to maŋe de tia. Wonto mo kuri nɔɔno se o leiri a yuu ne o di paare, ye a na keim dento.’ ”

49Adonija veira bam na nigi konto to, foone ma zo-ba. Ba ma zaŋe wodiu kom baŋa ne ye ba duri ba jage. 50Adonija na kɔre foone de Solomon to ŋwaane, o ma duri o vo o zo wara-vwei dem o zi bimbini dem nyea yam.#1:50 bimbini dem nyea yam: Nɔɔno wolo ná zi nyea yam, ba daa ba jege chwoŋa se ba ja kotu ba go. 51Ba ma ta ba bere Solomon we, “Nii mo! Adonija kɔre foone de nmo. O ma vo o zi bimbini dem nyea yam ye o lwoori we, ‘Pa Pɛ Solomon du duuri we o bá kwei se-zɔɔ o go-ne. Ko ná dae konto, a bá nwoŋi pwooni.’ ” 52Solomon ma leiri o we, “O ná bere we o lage o ke o chega de amo, o bá na zonne de fenfee de. O nam ná jege puseŋa, o wó te mo.” 53O ma toŋe nɔɔna ye ba vo ba bwoŋi Adonija ba ja ba ba pa‑o. Adonija ma tiiri Pɛ Solomon yiga ne o zuli‑o. Solomon maa we, “Adonija, zaŋe n vo sɔŋɔ!”

Currently Selected:

1 Pwa 1: KBG

Highlight

Copy

Compare