2 Samuwel 23
23
David kweelim botare
1David botare selo o na popone o kweeli to mo tento:
“Cheigi-na Jesse bu David kwora.
Jakob Tu Baŋa Wɛ pɛ se o jwoŋi yere,
o daare o kuri‑o se o di paare.
O maa ye lein-leenu wolo Isarele tiina na swoi to.
2 Baŋa Wɛ Jworo mo bere-ne kolo a na wó ta to.
Chega ŋwaane to, o tɔge amo ni baŋa ne mo o ŋɔɔne.
3Isarele tiina Wɛ wom tete mo ŋɔɔne,
Wɛ wolo na ye Isarele tiina dalem jei to
ma ta de amo o we:
‘Pɛ wolo ná tɔge chega o tei o nɔɔna
ye o kɔre Wɛ,
4kotu nye de wɛ mo puli te-pora ne
ye kunkwonnu tere wɛɛne tei.
O ta maa nye de wea na pa se gaaro nyeene
doa nenem kwaga ne tei to.’
5Wɛ nam wó seene o ke zaane amo dwi dem baŋa ne konto dwoŋi mo.
Wonto gwoni ni de amo se o zeini-ne.
Ni-gwonim dem konto wó taa wora taa wuu.
Maŋa maama de bá fɔge de leiri,
de nam daa bá gɔ.
Baŋa Wɛ lage o yɔɔre o jwoŋi-ne mo o yage.
Kolo maama amo boboŋa na lage to mo,
Wɛ wó seene o ke o pa-ne.
6Ko nam ná ye nɔn-wo-korro maama,
banto nye de sabare selo nɔɔna na dole ba yage to mo.
N bá‑n wane n ma n jeŋa n ja sabare sento dwoŋi.
7Wolo ná lage o dwei sabare sem konto,
kotu jege se o kwei luu,
naa chichwei mo o ma o toŋe,
ye o laam daare o zwɛ-se kula!”
Bembɛ selo na woli David to
1 Tigisim 11:10-41
8Bembɛ selo déem na wo David tei ne ba woli‑o de jara-keim to yera mo tento:
Joseba-Basebɛfa déem mo ye ‘Bembɛ setɔ sem’ yiga tu wom.#23:8 naa ‘Bembɛ kɔgɔ kom’ wone jar-keiru dedoa. Wonto nwoŋi Tachemon mo. O déem jeeri nɔɔna bia nana (800) mo de jara. O ma kwei o chichwei o ma go ba maama jara-keim dedoa baŋa ne.
9Wolo na saŋe wonto kwaga bembɛ setɔ sem wone to déem ye Dodo bu Eleaza mo. Ba maa ye Ahohi sɔ-yuu tiina. Dɛ dedwe Filisi tiina bam na gilimi jara ŋwaane to, wonto de David ma yiŋi-ba de jara. Isarele jar-keira bam maama ma tutwoni ba jwoori kwaga, 10se ko daare Eleaza, wonto pɛ o zaŋe mo o jeeri Filisi tiina bam. O ma kwei o se-zɔɔ o jege-ba o zɔ o goe taa ye o daa ware se o de-ko tega ne o yera na chɛ to ŋwaane. Dento dɛ dem ne Baŋa Wɛ déem ma pa se Isarele tiina bam di wɔnɔ dedɛ. Ko kwaga ne Isarele tiina bam ma jwoori ba ba ba pu Eleaza kwaga. Kolo yerane na daare se ba ke to maa ye se ba buŋi twa bam yera ba nii se ba daare ba vere ba zela yam.
11Wolo na saŋe o ke batɔ tu to ye Agee bu Samma mo. Ba maa ye Harara sɔ-yuu tiina. Filisi tiina bam déem tu ba gilimi Lehi ne mo mɛ swoona kara na wora to. Isarele tiina bam ma duri se ba lu Filisi tiina bam jeŋa ne. 12Samma ma zege swoona kara kam tetare ne o kwaane o ke jara yam ka ŋwaane. O ma go Filisi tiina bam dedɛ. Baŋa Wɛ déem ma pa se Isarele tiina bam di wɔnɔ dedɛ.
13Bene dedwe, ko na maŋe de mena zagem to, mo bembɛ fintɔ sem wone setɔ déem vei David tei, o na seigi Adulam peo bɔɔne wone to. Filisi tiina jar-keira kɔgɔ kodwoŋi ya tu ba tigisi Refayim bwolo kom ne. 14Ba kɔgɔ kodwoŋi de ya jwoŋi Bɛtelehem teo kom mo ba wora. Konto maama dedaane David ya wo o peo kom dalem jei sem ne mo. 15David boboŋa ma tiini ya ja o tete teo kom ye o ta o we, “Wɔ mo wó zaŋe o vo Bɛtelehem se o mɔ na vole delo na tigi teo kom manchwoŋo ni ne to wone o ja o ba o pa-ne se a nyɔ?” 16Bembɛ setɔ sem konto ma lɔɔre ba tɔge Filisi tiina kɔgɔ kom wone ba vo ba yi vole dem ba mɔ na bam, ye ba jwoori ba ja-ba ba ba ba pa David. Ba na jwoori to, o ma ve se o nyɔ na bam konto. O ma lwo-ba o yage tega ne se ba taa ye pɛɛre ba pa Baŋa Wɛ. 17O ma ta o we, “Amo Tu Baŋa Wɛ, amo bá wane a nyɔ na banto! A ná nyɔge-ba, ko nye de a nyɔge nɔɔna banto jana mo, ba na sɛ se ba ga ba ŋwea se ba ma ba mɔ na banto to ŋwaane.” O ma ve se o nyɔ-ba.
Bembɛ setɔ sento déem na toŋe tei to mo konto.
18Abisayi de déem mo ye ‘Bembɛ kɔgɔ kom’#23:18 naa ‘Bembɛ fintɔ sem’ naa ‘Bembɛ setɔ sem’ wone jar-keiru dedoa. O maa ye Joaba nyaane ye ba nu ye Zeruya. O ma kwei o chichwei o jeeri nɔɔna bia yatɔ (300) jara wone o go. Konto ŋwaane o ma na yere bembɛ setɔ sem yiga ne. 19Wonto déem mo nɛ yere o dwoni bembɛ fintɔ sem maama, ye o ji ba yiga tu. O nam wo woli bembɛ setɔ sem wone.
20Jehoyada bu Benaya de déem ye jar-keiru mo na ye bembea. O nwoŋi Kabezele mo, ye o toŋe baare dedɛ. Benaya déem go Moaba bembɛ selei. O ta ma tu gwoŋo wone o go nywoŋo dɛ dedwe do-kandwa#23:20 do-kandwa = snow na toe ye waaro tiini te wora to. 21Benaya ta go Ejipti nɔn-wagele dedwoŋi mo. Nɔɔno wom déem zei chichwei mo. Ko daare ye Benaya jege da-lɔŋɔ. O ma vo o vere chichwei dem Ejipti tu wom jeŋa ne, o jwoori o ma-de o zɔ‑o o go. 22Jehoyada bu Benaya déem na toŋe tei to mo konto. O de ma na yere nenɛɛne bembɛ setɔ sem tei. 23O ma tiini o na yere bembɛ fintɔ sem wone, se o wo tɔge o woli bembɛ setɔ sem wone mo. David ma pa se Benaya ji balo na yere‑o to yiga tu.#2 Samuwel 8:18
24Balo de na tɔge ba wo ‘Bembɛ fintɔ sem’ wone to mo tento:
Joaba nyaane Asaheli.
Dodo bu Elihanan, na nwoŋi Bɛtelehem to.
25Samma de Elika, na ye Haroda tiina to.
26Paliti tu Heleza.
Ikesa bu Yira, na nwoŋi Tekoa to.
27Anatofe tu Abizeri.
Husaa tu Mebunayi.
28Ahohi tu Zalemon.
Netofa tu Maharayi.
29Baana bu Helebi, de na ye Netofa tu to.
Ribayi bu Itayi, na nwoŋi Gibea teo Benjamin laŋa kam ne to.
30Pirafon tu Benaya.
Hidayi, na nwoŋi Gaasa bu-nwaro tem seeni to.
31Arabafa tu Abi-Alebon.
Baharum tu Azimavefa.
32Saalebon tu Eliaba.
Jasen bia bam.
Jonatan 33na ye Harara tu Samma bu to.
Sarare bu Ahiyam, de na ye Harara tu to.
34Ahasabayi bu Elifeleti, na ye Maaka tu to.
Ahitofeli bu Eliam, na ye Giloo tu to.
35Kamele tu Hezero.
Aribi tu Parayi.
36Natan bu Igale, na nwoŋi Zoba to.
Gad tu Bani.
37Amon tu Zeleki.
Beerofa tu Naharayi. Wonto déem zei Zeruya bu Joaba jara zela yam mo.
38Ifiri tu Yira.
Ifiri tu Gareba.
39Hiti tu Yuria.#2 Samuwel 11:3
Bembɛ sem maama déem ke daane se ye fintɔ-serepɛ (37) mo.
Currently Selected:
2 Samuwel 23: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
