2 Samuwel 22
22
David na leeni o seini Wɛ tei to
Lei 18:1-50
1 Baŋa Wɛ déem na yɔɔre o jwoŋi David o yage o dona maama jeŋa ne dedaane Sɔɔl jeŋa ne to, mo David dɛ ko ŋwaane o pane leiŋa kanto se o ma o seini Baŋa Wɛ. 2O ma leeni o we:
Baŋa Wɛ mo ye amo dam jeiga,
de amo jwoŋinu.
O nye de peo mo o pa-ne.
3Amo Tu Wɛ nye de peo gugworo,
a na dale da to mo.
O maa yeini o kwoli-ne
ne jara nantana na kwoli nɔɔna jara wone tei to.
O maa jege dam se o ma
o vere-ne cham wone.
O maa kwori o ye amo dalem jei,
de amo vereno.
O jwoŋi-ne vuvuga maama wone mo o yaga.
4Amo yeini a bwoŋi Baŋa Wɛ yere mo.
O de maa jwoŋi-ne o yage
a dona jeŋa ne.
Wonto maŋe se nabiina taa tei‑o mo.
5Toone déem kekare-ne de vɔ,
nenɛɛne na-fɔrɔ na lage
ko pu nɔɔno ko ja tei to.
Ko nam ya gɛ fee mo
se chɔgem yi-ne.
6Ko nye de churu chwoŋa ŋoge ŋone mo ka vɔ amo ka tiŋi.
Toone de ma che kalanchogo
a chwoŋa ne de cheigi-ne.
7Lɛɛro na tiini te jege-ne to,
mo a bwoŋi Baŋa Wɛ yere.
A ma keeri a jare a Tu Wɛ
se o zeini-ne.
O maa zege o sɔŋɔ kom ne
o ni amo kwora.
Amo keira kam ma to o zwa ne,
ye o woli-ne.
8Tega baŋa maama maa ziziŋi
ye ka yera sae.
Peero tem de maa ziziŋi,
Wɛ ban-zɔŋɔ kom ŋwaane.
9Nyoa maa tɔge o momwa
ka nwoŋa.
O ta ma daare o twi min-vogo
de min-chala,
ye ya tɔge o ni ne ya nwoŋi
ya di wonnu bugi-bugi.
10O ma kɔɔre wɛyuu kom
nenɛɛne diga ni gɔrɔ to,
ye o laam daare o tu tega kam baŋa ne.
O na maa tu to,
mo kunkwon-lilirru wo
o nɛ kuri ne.
11O diini cherubi mo
o jaane o maa kɛa.
Vio kom vɔna baŋa ne mo
o tɔge da o via.
12Lim mo o kwei o ma pu o tete.
Kunkwon-lilirru telo na pae do-fɔrɔ to ma kwoli‑o.
13Pwooni maa wo o yiga ne de nyeena,
ye min-chala yam jaane ya di min-vogo.
14Yuu-tu Baŋa Wɛ ma zege wɛyuu ne o bage de dam.
O kwora kam ma dɔne ka to nɔɔna zwa ne.
15O ma ta o che-tɛɛra yam,
pa se o dona bam jage.
O ma pa doa pepele ka zeili-ba
ye ba duri ba jei.
16 Baŋa Wɛ bane na zaŋe
ye o bage o dona to,
mo naneo kom na bam pɔgele
pa ko kuri nae jaja.
Wɛ na fi o momwa to,
tega kam gugworru maama ma ziziŋi
pa te tigi ja.
17 Baŋa Wɛ ma zege wɛyuu ne o twe o jeŋa o ja amo.
O ma liiri-ne o ja o nwoŋi na-luŋa wone.
18O yɔɔre o jwoŋi-ne mo o yage a dona jeŋa ne,
kokuri to, balo na chuli-ne to tiini ba dana ba dwoi-ne.
19Amo ya wo lɛɛro wone mo
ye a dona bam chuchugi-ne.
Baŋa Wɛ nam tu o teili-ne
pa se a zege cheppe.
20O woli-ne mo o pa a nwoŋi cham wone.
O ma yɔɔre o jwoŋi-ne o yage,
se a taa wo pwooni yiga ne,
o wo na dɛ amo to ŋwaane.
21 Baŋa Wɛ ke-ne lanyerane
a na tɔge chega chwoŋa to ŋwaane.
Amo na toŋe chega to,
mo o jwoori o ŋwe-ne konto dwoŋi.
22Amo yɔɔre a tɔge Baŋa Wɛ chwei sem mo.
A wo ywori a Tu Wɛ kwaga ne
se a daare a toŋe lwarem.
23O nia yam maama mo amo tɔga.
A maa wo ve chullu telo o na pɛ to.
24A jege chega mo o yiga ne,
a na cho a tete dedaane lwarem to ŋwaane.
25Ko ma pa se o jwoori o ke-ne lanyerane,
de a na tɔge chega chwoŋa
ye a kwori a toŋe chekke to ŋwaane.
26Amo Tu Baŋa Wɛ!
Nmo yeini n jege chega mo
de balo na jege chega ba pa‑m to.
Balo na jege bora n yiga ne to mo,
nmo yɔɔre n toŋe lanyerane n pa-ba.
27Ko ná ye balo na jege wo-pwoŋo to,
nmo de ye wo-pwoŋo tu mo n pa-ba.
Ko daare balo na toŋe tusim kikia to,
n ke swa mo pa ko chɛ ba yera ne.
28Nmo yeini n jwoŋi nabwona mo n yaga.
Ko daare ye n pa kamun-nyena jwoori ba tu tega.
29 Baŋa Wɛ, nmo mo ye amo pwooni.
Chega to, n pae se lim delo na li amo to
jwoori de ji pwooni mo.
30Amo Tu Wɛ, nmo mo yeini n pa amo dam,
se a wane a zeili a dona bam kɔgɔ maama.
N dam dem konto ta ma woli-ne,
se a wane a faŋe a gaale a dona bam teo kabira,
ye a daare a di-ba.
31Amo Tu Wɛ chwoŋa kam lamma fase mo!
O ni taane dem yɔɔre de ye chega mo.
O wae o cho balo na seigi o woro kom wone to,
ne jara nantana na kwoli nɔɔna jara wone tei to.
32Wɛ dedwoŋi daa tera ko ná dae Baŋa Wɛ.
Wonto yerane mo ye peo kolo na ye dé dalem jei to.
33O maa jege dam ye o kwoli-ne.
O ma pa se a chwoŋa tigi jase se a taa vei ka wone.
34O ma pa se a nɛ kwaare tega,
nenɛɛne woŋa nɛ na ye tei to.
O maa cho-ne se a yé to peero tem yuu ne.
35Wonto ta bere-ne jara keim laŋa mo,
se a taa wae a saŋe taŋa kalo na vaŋe de dam to a tae.
36 Baŋa Wɛ,
nmo pɛ-ne jara-keim nantana se ka taa kwoli-ne,
ye n jwoŋi-ne n yage cham wone.
Nmo na sɛ se n woli-ne tei to pɛ se a ji babea.
37Nmo kwɛ chwoŋa kalo na yala to mo
n tiŋi amo yiga ne,
se a yé seeri a to tega ne.
38Amo pare a dona bam mo a ja.
A ma yɔɔre a mage ba maama a go,
se ba wolowolo yé daare.
39A chochoge-ba mo a de tega ne
pa se ba daa ware ba zaŋe wɛɛne,
a na nɔne-ba de a naga to ŋwaane.
40 Baŋa Wɛ, nmo mo pa-ne dam se a taa ma a ke jara.
N pae se a dona bam ba ba kuni dwoona amo yiga ne.
41N ta pae se foone ja a dona bam maama
ye ba pipiri mo ba duri ba daare-ne.
Amo ma yɔɔre a chɔge balo na chuli-ne to.
42Ba maa beeri wolim.
Nɔɔn-nɔɔno nam tera se o jwoŋi-ba o yage.
Ba ma keeri ba jare Baŋa Wɛ,
ye o wo sɛ ba wara yam.
43Amo maa cho-ba a mumugi
se ba ji ne tega fwogo tei.
A ta maa nɔne-ba ye a chochoge-ba
nenɛɛne ba ye chwoŋa ni bworu mo tei.
44Ko ná ye pawe-nyena na wo a dwi tiina bam wone to,
nmo vere-ne n yage ba jeŋa ne mo.
Nmo ta ma‑n pa se a di paare teene dedɛ baŋa ne,
se a taa tei dwi tiina balo a ya na yeiri to.
45 Dwi-gɛ tiina mo tui ba gwane amo yiga ne de foone.
Ba ná yɔɔre ba ni a taane,
ba yeini ba sɛ a ni mo.
46Veira bam konto vɔna yeini ya da ya pare mo.
Ba ma zaŋe ba nwoŋi ba dalem jei sem wone,
ye ba yera sae de foone.
47 Baŋa Wɛ seene o ŋwe!
O maa ye peo kolo na ye amo dalem jei to.
Ko maŋe mo se dé taa tei‑o.
Pa-na dé tei Dam-fɔrɔ Tu Baŋa Wɛ!
Wonto nam mo jwoŋi amo o yage!
48Wonto mo jwoori o ŋwe jene a dona baŋa ne.
O maa ke dwi-gɛ tiina amo dam kuri ne.
49O ta vere-ne mo a dona jeŋa ne o yage.
Amo Tu Baŋa Wɛ!
Nmo mo pa-ne dam se a di balo na chuli-ne to.
N ta ma‑n jwoŋi-ne nankɔ-nyena jeŋa ne.
50Konto ŋwaane nam mo, amo wó tei nmo yere,
se dwi-gɛ tiina taa yei n ni ne.
Chega ŋwaane to, Baŋa Wɛ,
amo wó leeni a tei nmo yere.
51 Baŋa Wɛ yeini o pa se o pɛ wom di wɔnɔ mo maŋa maama.
O maa tɔge o swono kom baŋa
o ke wolo o na kuri to lanyerane se ko taa vei wuu.
Ko maa ye amo David de a dwi dem mo konto.
Currently Selected:
2 Samuwel 22: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
