2 Samuwel 21

Gibeon tiina bam bochara zuri

1Maŋa kalo David déem na di paare to, mo kana tu ka zo tega kam bena yatɔ ya saŋe daane. David ma ja Baŋa Wɛ teiŋa ka ŋwaane. Baŋa Wɛ ma ta o bere‑o o we, “Ko ye Sɔɔl de o diga tiina bam na ye nɔn-gora ye ba go Gibeon tiina bam to ŋwaane mo tei konto.”

2Banto déem dae Isarele dwi tiina. Ba maa ye Amori tiina balo na daare ba dwi dem wone to. Isarele tiina bam déem ya dugi we ba bá chɔge-ba.#Josua 9:3-15 De ko de, Sɔɔl déem tiini o kwaane se o ti ba dwi dem mo, o na jege boboŋ-dɛɛra se o woli Isarele tiina de Judah tiina to ŋwaane.

David ma bwoŋi Gibeon tiina bam, 3ye o bwei-ba o we, “Abam lage se a ke tɛ mo se ko pa á wo to? Dé lage se dé fɔge dé kwɛ tusim dem, se Baŋa Wɛ da abam ŋwaane o swɛ o nɔɔna bam swolim.” 4Gibeon tiina bam ma leiri ba we, “Sabu-seŋa de lu-nyenno bá wane te kwɛ tigura kalo na tigi debam de Sɔɔl dwi dem laŋa ne to. Dé nam ba jege chwoŋa se dé pa nɔɔn-nɔɔno te Isarele tiina bam wone se ko ma fɔge keim dem.”

Pɛ wom laam ma ta o we, “Abam nam we a ke bɛ mo a pa abam?” 5Ba ma leiri‑o ba we, “Sɔɔl déem yɔɔre o boŋe se o ti dé dwi dem mo, se dé yé daare Isarele tega kam baŋa ne. Konto mo pɛ se o kwaane o go debam dedɛ. 6Nam le baara barepɛ o dwi dem wone n ja n ba n pa debam. Debam de maa wó ja-ba dé vo Sɔɔl tete teo Gibea, o na ye pɛ wolo Baŋa Wɛ déem na kuri to. Teo kom konto ne mo dé wó go-ba dé yage Baŋa Wɛ yiga ne.” Pɛ wom ma ta-ba o we, “Amo wó ja-ba a ba a pa abam.”

7Ko daare, Pɛ David guli ni-gwonim delo o de Sɔɔl bu Jonatan déem na ke ba pa daane Baŋa Wɛ yiga ne to. O ma yage Jonatan bu Mefibosɛfi se ba yé go‑o. 8O ma daare o ja Aramoni de Mefibosɛfi wodwoŋi. Banto déem ye bakeiri selei selo Aya bukɔ Rizapa na loge de Sɔɔl to mo. O daa ta ma ja bakeiri senu selo Sɔɔl bukɔ Meraba na loge de o baro Adireli to. Adireli maa ye Mehola tu Bazilayi bu. 9David ma kwei baara barepɛ bam konto o ke Gibeon tiina bam jeŋa ne. Ba de ma jwoŋi-ba ba ja ba vo peo yuu ne ye ba go-ba ba yage Baŋa Wɛ yiga ne. Ba maama barepɛ bam tɔge daane ba te mo. Ko déem ke ko maŋe de chaara#21:9 chaara = barley zagem maŋa mo.

10Aya bukɔ Rizipa déem ma kwei gare-nyenyaaro o ja o di peo kolo yuu twa bam na tigi to. O ma lware gɔrɔ kom o jei pelɔrɔ kom baŋa ne. O ma maŋe da o jeini, ko na zege faao ni ne se ko jwoori ko vo ko yi doa nenem maŋa to. Wea maama, o maa yeini o zeili zuna, se ba yé jeini twa bam baŋa ne. Tete ne de, o ta zeili kago-vara mo se ba yé di-ba. 11David na nigi kolo Sɔɔl ka-bia Rizipa na ke to, 12o ma zaŋe o vo Jabese Gilead se o jwoŋi Sɔɔl dedaane o bu Jonatan kwi sem nɔɔna bam konto tei ne. Maŋa kalo Filisi tiina bam ya na go Sɔɔl de Jonatan Giliboa peo kom yuu ne ye ba daare ba pale ba yera yam Bɛte-San teo kom pwooni ne to, ko ye Jabese Gilead tiina bam mo déem vei ba ŋɔ kwi sem ba ja jwoori ba teo kom.#1 Samuwel 31:8-13 13David ma jwoŋi Sɔɔl dedaane Jonatan kwi sem ba tei ne ye o daare o vo o pɛ nɔɔna barepɛ bam Gibeon tiina bam na go ba yage to de kwi sem o woli da. 14Ba ma kwei Sɔɔl de Jonatan kwi sem maama ba ja ba vo ba suli Sɔɔl kwo Kisi yibeeli dem wone. Benjamin laŋa kam teo Zela ne mo konto. Ba ta ma ke kolo maama Pɛ David na pɛ ni se ba ke to. Ba na ke konto maama ba ti to, Baŋa Wɛ laam ma sɛ ba teo kom wɛ-lworo.

David kwaare jara de Filisi tiina

15Filisi tiina bam déem daa jaane jara mo ba jeeri Isarele tiina bam. David ma zaŋe o tɔge de o jar-keira bam se ba vo ba ja jara de-ba. Jara yam wone mo David tiini o bugi dedɛ. 16Nɔɔno wodwoŋi déem tɔge o wora, o yere mo Isibi-Benoba. O nwoŋi nɔn-sawaaro dwi dem wone mo. O chichwei dem dunni déem tiini de gaale de dwoi channa kilo tetɔ (3), ye o vɔ se-zɔɔ-doŋo o yera ne. O boboŋa ma ja se o go David. 17Zeruya bu Abisayi ma vo David tei o jwoŋi‑o o yage. O ma mage Filisi tu wom o go. Pɛ David nɔɔna bam ma da ko ŋwaane ba gwoni ni ded‑o ba we, “Dé daa bá sɛ se n da debam n vo jara wone. Kokuri to, Isarele tiina bam maama teena daŋe nmo baŋa ne mo. Dé teena yam konto ba jege se ya jei.”

18Ko kwaga ne, Filisi tiina bam daa ma ke jara de Isarele tiina bam Goba teo ne. Husaa teo nɔɔno Sibekayi ma go nɔn-sawaara dwi tu wodwoŋi, o yere mo Safi.

19Isarele tiina bam daa ta ma kwaare jara de Filisi tiina bam Goba ne. Bɛtelehem tu Jayiri bu Elihanan déem go Giti tu Goliafe choro wodwoŋi.#21:19 choro wodwoŋi tera Hiburu tɔn-dwoŋo kom ne.#1 Tigisim 20:5 Wonto chichwei dem daga de dwoi gare-yi sɔɔna da-kwolo na mae tei to.

20Jara yadwonna daa ma ke Gafa teo ne. Filisi tiina bam babea kadwoŋi maa wora o de na ye nɔn-sawɔrɔ. O jeŋa maama déem jege nwa baredo baredo mo. O namimbia de maa ye baredo baredo. 21O maa jege Isarele tiina bam o twea. David zembaaro Samma bu Jonatan ma zaŋe o go‑o.

22Filisi tiina bana bam konto déem mo ye nɔn-sawaara dwi dem tiina na nwoŋi Gafa ne to. David de o nɔɔna bam nam mo go-ba.

Currently Selected:

2 Samuwel 21: KBG

Highlight

Copy

Compare