2 Samuwel 20
20
Seba nwoŋi David kwaga ne
1Bichiri bu Seba déem maa wo Giligal ne. O ye Benjamin dwi tu mo, ye o ta ye nɔn-wo-koro. O ma wu nabɔnɔ ye o tɔɔle o ta o we, “Isarele tiina bam, debam dedaane Jesse bu David dae daane. Dé yiga tera o paare dem wone! Pa-na dé jwoori-na sam.” 2Isarele tiina bam maama ma da ko ŋwaane ba nwoŋi David kwaga ne ye ba daare ba pɛ Seba kwaga ba pu.
Ko daare Judah tiina bam déem tiini ba meeli Pɛ David yera ne mo. Ba ma zege Jɔdan buga bam seeni ba kwogili‑o ba vo ba yi Jerusalem.
3David na jwoori Jerusalem o vo o zo o sɔŋɔ kom wone to, mo o jaane o ka-bi fuga selo o ya na yage se ba taa nii o sɔŋɔ kom baŋa ne to o ja o vo o seigi sɔŋɔ kodwoŋi ne. O ma pa se nɔɔna yere-ba, ye ba daare ba pa-ba ba ni-wodiu. Pɛ wom daa maa wo peini de-ba, ye ba lɛɛre ba maŋe dáane ba di kadeini taa se ba vo ba te.#2 Samuwel 16:22
4Pɛ David ma ta de Amasa o we, “Toŋe n bwoŋi Judah tiina bam, se n pa ba la daane. Pa se á maama da daane á ba ywo-seeni da yatɔ dɛ ne.” 5Amasa ma zaŋe o vo se o bwoŋi Judah tiina bam o ke daane. O ma dáane o kɛ dɛ dem pɛ wom na pɛ‑o to.
6David ma ta de Abisayi o we, “Dé ná wo ke lela, Bichiri bu Seba wó daane debam o dwoni Abisalom na ke tei to. Konto to, ja amo jar-keira bam n ke n kwaga ne se á vo á jeeri‑o de jara. Ko ná dae konto, o wó wane o vo o zo teene delo na lɔge de pe to wone, ye dé daa bá yi‑o.” 7Abisayi ma zaŋe o nwoŋi Jerusalem ne, ye Joaba de o nɔɔna bam, de Cherete tiina bam, de Peleti tiina bam, ko woli de jar-keira babɛ sem maama wo o kwaga ne. Ba ma nwoŋi ba vo se ba pare Seba ba ja. 8Ba ma vo ba maŋe de kandwɛ-kamunu kom na wo Gibeon ne to, dedaane Amasa tu o ba o jeeri-ba. Joaba déem ya zo o jara-keim gwaaro tem mo ye se-zɔɔ laam vɔ o teiŋa seeni. O ma fɔɔre se o vo o yi Amasa tei ye seo kom wo ko pwolo wone.
9Joaba ma jɔɔne Amasa ye o we, “Amo choro, n jege yazura na?” O ma daare o ma o jazem o ja Amasa o tɔne seeni o yi o yera nenɛɛne o lage se ba kukwori daane mo tei. 10Amasa nam wo jeeli we Joaba zei seo mo o jagwia ne se o ga ke‑o woŋo. Joaba ma kwei seo kom o zɔ Amasa puga ne pa se o loro ta te nwoŋi te to tega ne. Joaba daa wo zɔge‑o o ke belei, Amasa na maŋe o te lela to ŋwaane.#2 Samuwel 19:13 Joaba de o nyaane Abisayi daa ta ma to chwoŋa ne se ba pare Seba ba ja.
11Joaba nɔn-doŋo wodwoŋi ma vo o zege Amasa yera yam baŋa ne o tɔɔle o we, “Abam wolo maama yiga ná wo Joaba de David wone, se kotu zaŋe o taa tɔge Joaba kwaga.” 12Amasa déem ma te o tigi pempale dem tetare ne. O ma bibili o jana bam wone. Joaba nɔɔno wom ma maane we wolo maama ná yeini o yi too wom na wo mɛ to, kotu yeini o zege da o nii mo. O ma tuuri Amasa o ja o kɛ pempale dem dáa ne. O ma tiŋi‑o gaao ne, ye o daare o kwei gɔrɔ o ma o kwoli‑o. 13O na pɛ se Amasa yera yam daa ba tigi pempale dem tetare ne to, jar-keira bam maama ma tɔge Joaba kwaga se ba beeri Seba ba ja.
14Seba déem nam ya kaare Isarele dwi maama laŋa ne mo ye o laam vo o yi Abel Bɛte-Maaka. Bichiri dwi tiina bam maama ma tɔge ded‑o ba zo teo kom wone. 15Joaba de o nɔɔna bam ma vo ba pu teo kom maama se ba ja Seba. Ba ma pɛ kasolo ba lɔ taara ba sale teo kom kabiri sem teiŋa ne. Ba maa kwori ba jege da-kwollu kamuna ba kuusi teo kom kabiri sem se se bwori se to tega ne. 16Kaane wodwoŋi déem nam ya wo teo kom ne ye o swa gaale. O ma zege ko kabira yera ne o tɔɔle o ta nɔɔna bam o we, “Cheigi-na! Cheigi-na! Bwoŋi-na Joaba se o fofɔ o twɛ ywo-seeni, se a lage a ŋɔɔne ded‑o mo.”
17Joaba ma vo o twɛ‑o. Kaane wom ma bwei‑o o we, “Nmo mo ye Joaba to na?” O ma leiri o we, “Ɛɛ.”
Kaane wom ma ta o we, “A kwo, nam fɔge n cheigi kolo amo na jege se a ta to.” Joaba ma leiri‑o o we, “Ta‑n tɛa, se a de cheiga.”
18O laam ma ta o we, “Faŋa tu mo we, ‘Wolo ná lage se o taane kwɛ, kotu wó vo Abel teo mo, se de kwɛ.’ 19Tɔ. Debam teo kom tiini ko jege kuri ka pa Isarele dwi tiina maama mo. Dé ye balo na lage chega de yazura tɔgem mo dé gaale. Bɛ mo ke ye á kwaane se á chɔge teo kolo na ye Baŋa Wɛ nyem to?”
20Joaba ma leiri‑o o we, “Ko fɔge ko dae konto! A bere a maŋe a wo ke a boboŋa ne se a chɔge abam. 21Ko dae we dé boŋe se dé chɔge á teo kom. Ko ye nɔɔno dedoa yerane ŋwaane mo dé tua. Nam ja Bichiri bu Seba na nwoŋi Efrayim zwonnu laŋa kam ne to n pa debam, se dé wó kɛ de daare á teo kom. Kokuri to, wonto mo vaŋe kɔgɔ o ke o kwaga ne se ba ve Pɛ David.” Kaane wom maa we, “Ta‑n cheiga, se dé wó da kabira kam baŋa dé dole o yuu dé de tega ne dé pa‑m.”
22Kaane wom ma ja o boboŋ-laao kom o vo teo kom tiina tei. Ba ma gwoni Seba yuu, ba daare ba dole-ko ba de Joaba yiga ne. O de ma wu nabɔnɔ se o ma o gwɛɛne jara yam. O de o nɔɔna bam ma viiri ba daare teo kom, ye ba maama jwoori ba sam. Joaba de ma jwoori pɛ wom tei Jerusalem ne.
Pɛ David dedɛɛra bam
23Joaba déem mo wo Isarele jar-keira bam maama yiga ne.#2 Samuwel 8:16-18
Jehoyada bu Benaya de maa wo Cherete tiina bam dedaane Peleti tiina bam yiga ne.
24Adoniram déem mo ye fefeo totoŋa yam yiga tu.
Ahiluda bu Jehosafate maa nii woŋo maama se o popone-te o tiŋi.
25Seeva déem mo ye pɛ wom tɔn-poponno.
Zadoki de Abiatara maa ye Wɛ kaanem tiina. 26Jayiri tu Yira de déem wo David kaanem tiina bam wone mo.
Currently Selected:
2 Samuwel 20: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
