2 Samuwel 19

David wo-chechɔgɔ kom

1Ba ma vo ba ta ba bere Joaba ba we, “Pɛ David tiini o keeri o bu Abisalom toone dem ŋwaane mo.” 2David jar-keira bam ma ni we o yɔɔre o keeri o bu lua kam mo. Ko ma pa se ba ware ba di ywoni dento dɛ dem ne, ye dɛ dem konto lɛɛre de ji wo-chechɔgɔ dɛ. 3Dento dɛ dem ne, nɔɔna bam lɔɔre mo ba jwoori ba zo teo kom wone, nenɛɛne nɔɔna na di-ba jara baŋa ne ye chaveera jege-ba tei to. 4David ma kwei o je o kwoli o yibia ye o kaase baŋa baŋa o we, “Aaa! A bu Abisalom! A bu ywoo!”

5Joaba ma zaŋe o vo o zo pɛ tei ye o ta ded‑o o we, “Nmo zem tiini n ke n jar-keira bam chaveera. Yé swei we banto mo jwoŋi nmo tete ŋwea, de n kaana ŋwea, de n bakeiri de n bukwa ŋwea, dedaane n ka-bi sem maama ŋwea ba yage! 6Nmo na ke tei to, ko nye de nmo swoi balo na chuli‑m to mo, ye n daare n chuli balo na swoi‑m to. Nmo zem bere jaja we n yiga tera de n jar-keira bam de n dedɛɛra bam maama. Amo maane we Abisalom ya ná ŋwe, ye debam maama te, konto ya wó pwoli nmo wo. 7Nmo nam ná lage chega, se n zaŋe n nwoŋi n vo n nɔɔna bam tei n pa se ba jwoori ba na baare. A dugi de Baŋa Wɛ yere we, nmo nam ná ve se n ke konto, se tega daa ta ná jege ka poora, nɔɔn-nɔɔno daa bá daare se kotu taa zege n kwaga ne. Konto, ko laam wó tiini ko ji lɛɛro mo ko pa‑m, se ko dwoni cham delo maama na tu n baŋa ne, ko zege n biini ne ko ba ko yi zem to!”

8Pɛ David na nigi konto to, o ma zaŋe o vo o jeini teo kom manchwoŋo kom ni ne. O nɔɔna bam ma ni we pɛ wom nwoŋi pwooni o jei da. Ba ma vo o tei ba gilimi daane o yiga ne.

David jwoori o zo Jerusalem teo wone

Isarele tiina balo na tɔge Abisalom kwaga to déem nam ya jwoori ba sam mo. 9Ba maama ma bobo se ba taa bwɛ daane ba we, “Pɛ David mo jwoŋi debam o yage dé dona jeŋa ne. Wonto ta mo vere debam o ja o nwoŋi Filisi tiina bam jeŋa ne. Abisalom laam ma zeili‑o pa se o duri o daare dé teo kom. 10Dé nam ya kuri Abisalom mo se o taa ye dé pɛ. O de ma te jara yam wone. Dé daa zege dé dáane se bɛ mo? Pa-na se dé vo dé ja Pɛ David dé jwoori dé ba ywo-seeni.”

11David ma toŋe kwora Wɛ kaanem tiina Zadoki de Abiatara tei ne o we:

“Véi-na Judah nakwa bam tei á ta de-ba we, ‘Isarele dwi tiina bam maama taane dem maŋe de to amo zwɛ ne. Bɛ mo pɛ se á ye balo na kweeli se á bwoŋi á pɛ wom se o jwoori sɔŋɔ? 12Abam ye amo chorro mo, á ye amo tete yera dedaane a jana. Bɛŋwaane mo abam nam maŋe kwaga ne, ye nɔɔna badwonna lwoori yiga ba bwoŋi-ne se a jwoori?’

13Nam ta véi-na Amasa tei á ta ded‑o we, ‘Nmo dae amo choro mo na? Wɛ wó pa se lɛɛro yi-ne nenɛɛne a na wo pɛ se nmo laam leiri Joaba yuu ne n ji a jar-keira bam yiga tu.’ ”#2 Samuwel 20:9-10

14David taane dem ma dwei Judah dwi tiina bam maama bochara. Ba ma ke ba ni daane ne nɔɔno dedoa tei, pa se ba toŋe kwora ba pa David ba we, “Ja n nɔɔna bam maama se á jwoori sɔŋɔ.”

15David déem ma zaŋe o kwei chwoŋa o maa jwoori Jerusalem. O na yi Jɔdan buga kam to, dedaane Judah tiina bam nwoŋi Giligal ne ba vo ba jeeri‑o se ba woli‑o se o bɛ buga kam. 16Gera bu Simeyi na ye Benjamin tu ye o nwoŋi Bahurim to de ma ke lela o tɔge o woli Judah tiina kɔgɔ kom wone se o da o jeeri Pɛ David. 17Benjamin dwi dem nɔɔna moro mo déem tɔge o kwaga, ko woli de Ziba na ye Sɔɔl kaba-kwea to, de wonto bia fuga-banu bam, de o tontoŋena finlei. Ba maama ma nwoŋi ba ke lela ba vo ba yi Jɔdan buga kam ni ba lwoori pɛ wom ye ba cheigi‑o. 18David na yi to, ba ma bɛ buga kam ba ja o diga tiina bam de ba zela yam ba jwoori ba bɛ. Ba déem ta ma ke kolo maama na tɔge pɛ wom boboŋa to.

Simeyi yera taane#2 Samuwel 16:5-8

Simeyi de ma bɛ o vo o yi Pɛ David tei. O ma to o vwi o yibia David yiga ne. 19O ma ta o we, “Pɛ, a lwoori‑m se n yage a keim-balɔrɔ kom n ma n chɛ-ne. Ko ná ye kolo amo ya na ke nmo yera ne, maŋa kam nmo na duri n daare Jerusalem to, yé kwei-ko n ke n yuu ne. 20Amo tu, amo lɔre lanyerane we a ke lwarem mo. Konto ŋwaane mo amo dɛ yiga Josɛf dwi tiina#19:20 Josɛf dwi tiina = Isarele dwia yalo na nwoŋi baŋa seeni ye ya dae Judah dwi dem to. maama wone se a ba a jeeri‑m.”

21Zeruya bu Abisayi ma ta o we, “Simeyi maŋe se o te mo, bɛŋwaane o sɔɔle lwarem mo o yage wolo Baŋa Wɛ na kuri se o taa ye pɛ to yuu ne.” 22David ma leiri Abisayi o we, “Abam Zeruya bia bam! Á yiga mo ka kɔ? Abam zem mo jigi amo sebanyena na? Zem dɛ dento mo Isarale tiina bam jwoori ba pa-ne chwoŋa se a taa ye ba pɛ. Konto ŋwaane, ba bá go nɔɔn-nɔɔno zem.” 23Pɛ wom laam ma pipiri o ta de Simeyi o we, “Amo gwoni ni a pa‑m we, n bá‑n te.”

Mefibosɛfi yera taane

24Sɔɔl naa Mefibosɛfi de ma da o vo se o jeeri Pɛ David. Ko déem zege maŋa kalo David na nwoŋi Jerusalem ne to, se ko yi o daa na maa jwoori de yazura to maama, Mefibosɛfi wo dɔɔre o namimbi-bwori, o ta maa wo fane o tɔne, naa o zare o gwaaro.#2 Samuwel 16:3 25O na nwoŋi Jerusalem o ba o yi David tei konto to, o ma daane pɛ wom peiga. David ma bwei‑o o we, “Mefibosɛfi, bɛ mo ke ye n wo dɛ amo kwaga se dé kɛ?”

26O ma leiri o we, “Pɛ, nmo yei a na maŋe a ye gɔrɔ tei to. Konto mo tei a pɛ ni we ba ti a bonaga kam yiga ba pa-ne se a di a ma tɔge dede‑m. Amo tontoŋeno Ziba mo nwoŋi a kwaga ne. 27O ma chwo amo n yiga ne. Nmo nam yei woŋo maama kuri, nenɛɛne n ye Wɛ maleka mo tei. Ke kolo maama na wo n boboŋa ne se n ke to. 28Kokuri, amo kwo-nakwe dwi tiina bam yɔɔre ba maŋe se n ya go debam maama mo, ye n ta sɛ se amo taa tɔge a di nmo sɔŋɔ ne. Amo daa wó taa jege chwoŋa se a lwoori woŋo kodwoŋi nmo tei ne a woli da na?”

29Pɛ wom ma leiri‑o o we, “Daa‑n yé chɔge n ni. Amo pɛ ni se nmo dedaane Ziba pɔɔre tega kalo maama na ye Sɔɔl nyem to á pa daane.” 30Mefibosɛfi ma leiri o we, “Amo tu, o ná lage te maama, se o kwei o taa jega. Nmo na jwoori sɔŋɔ de n yazura to maŋe ko pa amo.”

Bazilayi yera taane

31Gilead tu Bazilayi de ma zege Rogelim ne o ba se o jeeri Pɛ David se ba bɛ Jɔdan buga kam, se o daare o yage‑o chwoŋa ne se o kɛ. 32Bazilayi déem nam tiini o kwe mo o yi bena funɔnɔ. Maŋa kam David de o nɔɔna bam na wo Mahanayim ne to, mo o déem jaane wodiu o vo o pa-ba, o na tiini o ye nadum to ŋwaane. 33David ma ta ded‑o o we, “Da n bɛ Jɔdan buga kam n tɔge debam se dé vo Jerusalem, se a taa nii n baŋa ne.”

34Bazilayi ma leiri pɛ wom o we, “A lage a da de nmo a vo Jerusalem a ke bɛ mo? Amo ŋwea daa bá daga. 35Amo jege bena funɔnɔ mo tento, ye a daa ware wopwolo de cham a pɔɔre daane. A daa ware a ni-wodiu ywoni. Nɔɔna ná leeni lei, a ba ni. Konto ŋwaane amo ná dɛ de nmo a vo sɔŋɔ, ko wó taa ye daanem yerane ko pa‑m. 36Pɛ, nam yage se a da dede‑m a bɛ Jɔdan buga kam, ye a kwogili‑m se dé yi yiga fee. Amo na ye n tontoŋeno to, konto wó taa ye zula yalo na maŋe de amo to. 37Pa-ne chwoŋa se a laam jwoori sɔŋɔ, se a vo a te a teo ne ye ba kwei-ne ba ke a kwo de a nu yibeela tei ne. Nam nii a bu Chimam mo tento. Wonto wó tɔge‑m se á vo Jerusalem. O wó taa toŋe o pa‑m, ye n de ná lage se n ke tei maama n pa‑o, n wae n ke.” 38Pɛ David maa we, “Tɔ. Chimam wó da amo o vo Jerusalem, se a ke kolo maama na wó pwoli n wo to a pa‑o. Ko daare, woŋo kolo maama nmo na wó ta‑n lage amo tei ne to, amo wó ke-ko a pa‑m.”

39David jar-keira bam maama laam ma bɛ Jɔdan buga kam. Pɛ wom tete de ma bɛ. O ma kukwori Bazilayi o bane‑o o yage chwoŋa ne pa se o jwoori o vo sɔŋɔ. 40Judah nɔɔna bam maama, dedaane Isarele nɔɔna bam chichworo mo déem kwogili David ba bɛ buga kam ba maa kɛa. Chimam de ma tɔge Pɛ David, ye ba kɛ ba vo ba yi Giligal.

41Ko déem na ke fee to, Isarele tiina bam maama maa yeini ba vei pɛ wom tei ye ba poona ba we, “Bɛ mo tei se dé chorro Judah tiina bam boŋe we banto yerane mo jege chwoŋa se ba jeeri nmo de n diga tiina bam de n jar-keira bam ye ba kwogili abam se á bɛ Jɔdan buga kam?”

42Judah tiina bam de déem ma leiri ba we, “Pɛ wom nwoŋi debam Judah dwi tiina bam wone mo. Bɛ mo ye keim dento daane abam pa se á bane zaŋe? Dé wo di pɛ wodiu, dé nam wo jwoŋi o kolokolo dé totoŋe dem ŋwaane.”

43Isarele tiina bam daa ma leiri-ba ba we, “Abam na tage á we á dwi dem nɔɔno ye Pɛ to, nam lɔre-na we debam ye Isarele dwia fuga nɔɔna mo, pa se debam tei‑o kuni fuga. Bɛ mo ye á tiini á gwooni debam konto? Yé swei-na we debam mo lwoori abam yiga dé ja boboŋe se dé vo dé ja pɛ wom dé jwoori dé ba sɔŋɔ.”

De ko de, Judah tiina bam déem ta ŋɔɔne wo-zɔŋɔ taane mo se ko dwoni Isarele tiina bam taane dem na ye tei to.

Currently Selected:

2 Samuwel 19: KBG

Highlight

Copy

Compare