2 Samuwel 17

Husayi bere Abisalom se o sa chwoŋa

1Konto kwaga ne Ahitofeli ma ta de Abisalom o we, “Pa-ne chwoŋa se a kuri nɔɔna morro fuga-telei (12,000), se dé nwoŋi tete dento dé vo dé beeri David jei dé ja. 2Ko na ye tei to, amo wó vo a zaŋe o baŋa ne de o tiini o bugi ye o vɔna de pare. Amo wó pa o bochare di, pa se o nɔɔna bam maama duri ba daare‑o. A laam wó go pɛ David yerane, 3se a daare a ja o nɔɔna bam maama a jwoori a ba a ke nmo kwaga ne. Nɔɔno wolo nmo na beeri to yerane ná tega, ba maama wó jwoori n tei ne de ba yazura.” 4Ahitofeli kwea yam konto déem maa lana ya pae Abisalom dedaane Isarele nakwa bam maama.

5Abisalom ma ta o we, “Dé nam daa wó cheigi Ariki tu Husayi de kwora mo se dé lɔre wonto boboŋa na ye tei to.” 6Husayi ma zo o tei ye Abisalom ta o we, “Ahitofeli bere we dé ke tento mo. Dé wó sɛ o ni dem naa, nmo de wó bere debam dé na wó ke tei? Nam ta se dé nii.”

7Husayi ma leiri Abisalom o we,

“Amo tei ne, Ahitofeli na pɛ kwea yalo tento to ba lana. 8Nmo maŋe n yei we n kwo de o nɔɔna bam ye babɛ mo chekke. Leile konto ba laam jei de ban-zɔŋɔ mo nenɛɛne ba na vere nywoŋ-kura#17:8 nywoŋ-kura = bear bia ba daare-ka tei to. Ko woli da, nmo kwo na ye jara-keim bembea to ŋwaane, tete dento o bá peini o nɔɔna bam na tigi mɛ to. 9Tento wɛɛne o beeri peo bɔɔne, naa gugworo kodwoŋi mo o seigi da. Wonto wae o lwoori yiga o nwoŋi o jeeri debam de jara. Nɔɔna laam ná niga, ba wó ta ba we, ‘Hei! Ba wane Abisalom kɔgɔ kom, ye ba dedɛ te.’ 10Konto wó pa se nmo jar-keira babɛ sem tete vɔna pare, ye foone zo-ba. Isarele tiina maama nam maŋe ba yei n kwo na tiini o yei jara laŋa tei, dedaane o jar-keira bam na ye bembɛ chekke tei to.

11Kwea yalo amo na jege to mo tento: la Isarele tiina bam maama n ke daane, ko na zege Dan laŋa kam seeni se ko yi Beeriseba to. Nmo jar-keira bam kɔgɔ laam maa wó taa daga ne naneo ni kasolo tei. Nmo tete laam wó da ba yiga se á vo á ke jara yam. 12David ze ná wo mɛ de mɛ maama, dé wó beeri o jei dé yi‑o. De wó to o baŋa ne dé li‑o mo nenɛɛne nyɔnɔ na toe tega ne tei to. Konto mo David de o jar-keira bam wolowolo daa bá daare, de dedoa de. 13O ta ná maŋe o duri se o zo teo kamunu kolo wone de, dé kɔgɔ kom maama wó beeri ŋone mo ba kwei ba vɔ teo kom konto kandwa yam ba tuuri ba ja ba tu bwolo tega. Teo kom konto kandwɛ dedwe tete daa bá daare de taa zege da.”

14Abisalom dedaane Isarele nakwa bam maama ma ta ba we, “Husayi bera yam jege kuri ya dwoi Ahitofeli nyena yam.” Kokuri to, Baŋa Wɛ na lage se lɛɛro ba Abisalom baŋa ne to ŋwaane, o déem tɔge chwoŋa kam konto mo se o pa Ahitofeli bera yam yé zege, de ya na maŋe ya lana to de.

15Husayi ma zaŋe o vo Wɛ kaanem tiina Zadoki de Abiatara tei o tole kolo na ke to o bere-ba ye o we, “Ahitofeli ya bere Abisalom dedaane Isarele nakwa bam se ba ke tento de tento mo, amo de ma bere-ba se ba ke tento de tento. 16Konto nam ke-na lela á toŋe kwora David tei ne we, zem tete ne o yé maŋe kagoa kam ne o peini buga kam ni ne. O nam jege se o bɛ Jɔdan buga kam lela o kɛ o vo yiga, se ba yé ba ba di o dedaane o nɔɔna bam maama.”

17Jonatan de Ahimaazi déem kɔre se ba zo Jerusalem teo kom wo, se nɔɔna wó na-ba mo. Konto ŋwaane ba ma yeini ba seigi En-Rogele ne se bukɔ bu ja kwora kalo maama na wora o ba o pa-ba se ba de laam vo ba ta de David. 18Dɛ dedwe nɔn-doŋo kodwoŋi ma na-ba ye o vo o ta o bere Abisalom. Jonatan de Ahimaazi ma ke lela ba duri ba vo Bahurim ba seigi nɔɔno wodwoŋi sɔŋɔ ne. Vole déem wo o konkɔlɔ wone. Nɔɔna balei bam ma tu de wone. 19Nɔɔno wom kaane ma kwei woŋo o ma o pu vole dem ni, ye o daare o jare mena de baŋa ne. Ko ma pa se nɔɔn-nɔɔno yeiri kolo na wora to.

20Abisalom dedɛɛra bam ma vo ba yi kaane wom tei ye ba bwei‑o ba we, “Ahimaazi dedaane Jonatan wo yei ne mo?” Kaane wom ma leiri-ba o we, “Ba bɛ buga kam mo ba kɛ.” Nɔɔna bam ma beeri-ba ba ga, ye ba jwoori Jerusalem wone.

21Abisalom dedɛɛra bam na kɛ ba daare to, mo Ahimaazi dedaane Jonatan nwoŋi vole dem wone ba duri ba vo ba yi David tei. Ba ma tole kolo maama Ahitofeli na ŋɔɔne ko vo David seeni to, ye ba daare ba ta ded‑o ba we, “Ke lela n zaŋe n bɛ buga kam!” 22Sento nɛ sem ni ne mo David dedaane o kwaga kam maama zaŋe se ba taa bɛ Jɔdan buga kam. Tega na jege ka poore to, dedaane ba maama déem bɛ buga kam mo, ba dedoa daa wo daare.

23Ahitofeli na maane we Abisalom de Isarele nakwa bam ve se ba sɛ o bera yam to, mo o diini o bonaga o jwoori o tete sɔŋɔ Giloo ne. O na yi da to, mo o bere o sɔŋɔ tiina ba na wó ke tei ne o ná tera. O laam ma kwei ŋona o vo o kuuni o tete o te. Ba ma kwei‑o ba suli o kwoa di-dwoŋo ne.

24Abisalom dedaane Isarele kɔgɔ kom maama déem ma vo ba bɛ Jɔdan buga kam, dedaane David duri o vo o yi Mahanayim teo kom. 25Abisalom nam ya pɛ se Amasa mo leiri Joaba yuu ne o ji o jar-keira bam yiga tu. Amasa kwo yere mo ye Jefere. O maa ye Isameli tu.#17:25 Isameli tu naa Isarele tu Amasa nu déem ye Nahasi bukɔ Abigali, Abigali maa ye Joaba nu Zeruya choro.

26Abisalom dedaane Isarele tiina bam ma vo ba chwi ba vwoa Gilead laŋa kam ne.

27David na yi Mahanayim to, mo nɔɔna batɔ déem jeeri‑o. Banto wo dedoa ye Nahasi bu Sobi na nwoŋi Amon tiina teo Raba to mo. Wodwoŋi maa ye Ameli bu Makira na nwoŋi Lo-Debara to. Batɔ tu wom maa ye Gilead tu Bazilayi na nwoŋi Rogelim to. 28Banto maama ma ja sare, de zwe, de kambi, ko ta woli de wodiiru dwi dwi ba ba ba pa-ba. Wodiiru tem maa ye mena, de muni, de men-wɔa, dedaane swoona, de sia, 29de tooro, de nayela, ko woli de pei, dedaane nayel-pepala. Ba ma kwei tento maama ba pa David dedaane o nɔɔna bam se ba di. Kokuri to, ba déem tage mo ba we, “Kana dedaane na-nyɔm mo tiini ko chɛ nɔɔna bam, ba na wo kagoa kam ne ba vei taa ye ba tiini ba bugi to ŋwaane.”

Currently Selected:

2 Samuwel 17: KBG

Highlight

Copy

Compare