2 Samuwel 16

David dedaane Ziba taane

1Pɛ David na yɔɔre o gaale peo kom yuu se o kɛ to, mo Mefibosɛfi tontoŋeno Ziba pi o nwoŋi o zege da se o jeeri‑o. Wonto ya kwei bonɛ mo o vɔ wodiiru dedɛ o zeŋe o ja o ba. Wodiiru tem maa ye bworobwooru bia yalei, dedaane kekan-wogila bwɛ bi, de teeni bia badwonna bwɛ bi, dedaane sana lɔɔ kamunu.

2David ma bwei Ziba o we, “Nmo jege tento maama se n ma n ke bɛ mo?” Ziba ma leiri‑o o we, “Nmo diga tiina wó wane ba di bonɛ sem ba taa via. Ko ná ye wodiiru tem dedaane teeni bia bam, te ye n nɔɔna bam nyem mo se ba di. Sana bam maa ye se balo na wó ba ba bugi kagoa chwoŋa kam ne to nyɔ se ba yera jwoori ya na dam.”

3David daa ma bwei‑o o we, “Se Mefibosɛfi na ye n tu Sɔɔl naa to, o wo yei ne mo?”#2 Samuwel 19:24-30 Ziba ma leiri‑o o we, “O maŋe Jerusalem ne mo ye o boŋe o we, ‘Isarele tiina bam laam wó kwei a kwo-nakwe paare dem ba jwoori ba pa-ne.’ ”

4David ma ta‑o o we, “Ko na ye konto to, wonnu telo maama Mefibosɛfi ya na tei to mo, amo laam kwei-te a pa nmo se te ji nmo nyem.” Ziba ma leiri‑o o we, “Amo tu, a ke nmo lei. Amo ye nmo tontoŋeno mo. Wɛ wó pa se a kikia taa sui nmo yi maŋa maama.”

Simeyi sɔɔle lwarem o yage David yuu ne

5Pɛ David déem ma o vo o twɛ Bahurim teo kom. Nɔɔno wodwoŋi ma nwoŋi o jeeri‑o ye o sɔɔle lwarem o daŋe o yuu ne. O yere mo Simeyi. O kwo yere maa ye Gera, ye o nwoŋi Sɔɔl dwi dem wone. 6Simeyi maa jege kandwa o dole David dedaane o dedɛɛra bam, de David babɛ sem maŋe ba gilimi‑o mo ba ke tetare ne. 7Simeyi maa jege David o twea ye o we, “Vei daa, vei daa! Nmo ye nɔn-goro! Nmo tiini n ye nɔn-wo-koro mo de! 8Nmo vere Sɔɔl paare dem n jwoŋi, ye n daare n go o diga tiina bam dedɛ. Konto nam mo pɛ se Baŋa Wɛ wora o ŋwe jene dem konto n yuu ne. O jwoŋi paare dem mo o pa n bu Abisalom. Ko wó ni‑m, nɔn-goro!”#2 Samuwel 19:18-23

9Zeruya bu Abisayi ma ta de David o we, “Pɛ, kukuri-teka kanto wo maŋe se o taa jege‑m o yaala. Pa-ne chwoŋa se a yi a gwoni o yuu kom a de tega ne.” 10David ma leiri o we, “Abam Zeruya bia bam, á yiga mo ka kɔ? Baŋa Wɛ mo ná tage de Simeyi se o sɔɔle lwarem o yage amo yuu ne, nɔɔn-nɔɔno ba jege chwoŋa se o che‑o.”

11David laam ma ta de Abisayi de o dedɛɛra bam maama o we, “Amo tete bu-lora mo beeri-ne se o go. Benjamin tu wonto laam mo wó yage-ne na? Yage-o-na se o sɔɔle lwarem dwi delo maama o na lage to. Baŋa Wɛ ga mo we o ke konto. 12Baŋa Wɛ nam daa ná nɛ a cham dem, o wó wane o pipiri sɔɔlem dento zem se de ji swolim de pa-ne.”

13David de o kwaga kam maa lɛɛre ba vei chwoŋa kam yuu ne. Ba na maa vei to, Simeyi maa dale zwoŋo kom teiŋa o tɔge-ba, ye o sɔɔle o yage ba yuu ne, o daare o dole-ba de kandwa. O ta maa tae fwogo o ke ba yera ne.

14Pɛ David dedaane o nɔɔna bam déem ma vo ba yi Jɔdan buga kam. Ba maama ma tiini ba bugi. Ba ma maŋe da ye ba yera zuri.

Husayi dedaane Ahitofeli bera yam

15Abisalom dedaane Isarele tiina bam maama ma vo ba zo Jerusalem teo kom wo, ye Ahitofeli tɔge o wo ba wone. 16Ariki tu Husayi na ye David badwoŋi to de ma vo o zo teo kom. O ma vo o yi Abisalom tei o ta‑o o we, “Pɛ, Wɛ wó pa se n paare dem taa wora taa wuu!”

17Abisalom ma bwei‑o o we, “Nmo de David badwoŋo kom chɔge lela mo na? Bɛ mo ke ye n wo dɛ ded‑o n viiri?” 18Husayi ma leiri‑o o we, “Amo jege se a tɔge pɛ wolo Baŋa Wɛ na kuri to mo, wolo kɔgɔ konto dedaane Isarele tiina bam maama na kuri se o taa ye pɛ to. A nam wó kwei a chega maama mo a pa‑m. 19Ko na woli da to, a laam lage a taa toŋe a pae a tu wom bu mo. Amo nam wó toŋe a woli nmo de, nenɛɛne a déem na toŋe a woli n kwo tei to.”

20Abisalom laam ma bwei Ahitofeli o we, “Dé na tu dé wora to, bɛ mo dé laam wó ke? Nmo boboŋa yam ye tɛ mo?” 21Ahitofeli ma leiri‑o o we, “Zaŋe n vo n peini de n kwo ka-bi selo o na duri o daare se ba leeni ba taa nii o sɔŋɔ kom to. Nmo ná ke konto, Isarele tiina bam maama wó lɔre we n kikia maama lwoi n kwo momwa ne mo, de n na chɔge o yiga tei to ŋwaane. Ko maa wó pa se balo maama na tɔge‑m to fɔge ba na baare.” 22Ba ma di pɛ sɔŋɔ kom nayuu ba chwi vwei ba pa Abisalom. Abisalom ma zo de wone o lage o kwo ka-bi sem maama ye Isarele tiina bam maama zege ba nia.#2 Samuwel 12:11

23Da yam konto ne Abisalom déem sɛ o tɔge kwea yalo maama Ahitofeli na pɛ‑o to, nenɛɛne o kwo David de ya na sɛ o tɔge-ya tei to. Ahitofeli taane maama déem nye de o bwei o jwoŋi-de Wɛ tete tei ne mo ye o ta.

Currently Selected:

2 Samuwel 16: KBG

Highlight

Copy

Compare