2 Samuwel 15

Abisalom lɔge o kwo kwaga ne

1Keim dem konto kwaga ne, mo Abisalom déem beeri toroko de sisei se se taa vaŋe-ko. O ta ma kuri nɔɔna finnu se ba taa duri ko yiga ne ba kwɛ chwoŋa ba pa‑o.#1 Pwa 1:5 2O ma yeini o gwoni tega o vo teo kom manchwoŋo ni chwoŋa kam o zega. O ná yeini o na nɔɔno na jege taane o maa vei pɛ tei se o di-de o pa kotu, Abisalom wó fɔɔre o yi kotu tei mo o bwei‑o o we, “Nmo nwoŋi yei ne mo?” Nɔɔno wom laam maa wó ta o na nwoŋi Isarele teo kolo ne to. 3Abisalom wó yeini o ta‑o mo o we, “Ɛhɛɛ. Nmo taane dem wora, n nam jege bora de. Nɔɔn-nɔɔno nam mo tere pɛ nakwa bam wone se o nii de baŋa ne o pa‑m. 4Amo de ya ná jege chwoŋa se a tɔge a nii taana baŋa ne mo tento, nɔɔna ya wó wane ba ba amo tei, se a bore chega bora a pa-ba.”

5Ko ta woli da to, nɔɔna ná yeini ba yi Abisalom tei se ba tiiri ba jɔɔne‑o, o wó tei o jeŋa mo o vaŋe-ba o yi o yera, o kukwori-ba. 6Abisalom déem yeini o jeeri balo maama na jege taane ba tui pɛ tei to o ke konto mo. O ma tɔge chwoŋa kam konto o soge Isarele tiina bam dedɛ o ke o kwaga ne.

7Konto kwaga ne, bena yana ma kɛ. Abisalom ma zaŋe dɛ dedwe o vo o ta de pɛ wom o we, “Jan ja! Pa-ne chwoŋa se a vo Heboron a kwei ni-gwonim delo a déem na tiŋi dedaane Baŋa Wɛ to. 8Amo déem na wo Gesura ne ye a zoore de Aram tiina bam to, mo a gwoni ni a we, ‘Baŋa Wɛ ná jwoori o ja-ne o ba Jerusalem, amo wó vo Heboron a ke kaanem a zuli‑o.’ ”

9Pɛ wom ma pa‑o chwoŋa. Abisalom ma seene o zaŋe o vo Heboron. 10O déem nam seigi o toŋe nɔɔna Isarele dwi tiina bam maama wone se ba vo ba ta we, “Abam ná tu á ba á ni nabwanno kwori, se á tɔɔle se ko taa vei we: Abisalom mo laam jigi pɛ Heboron ne.”#2 Samuwel 5:3 11Nɔɔna bia yalei ya tɔge de Abisalom ba nwoŋi Jerusalem ba kwogili‑o se ba vo Heboron. Ko ye o na bwoŋi-ba to ŋwaane mo ba déem dɛ‑o ba vo, ye ba yeiri boboŋe delo na wo o yuu ne to. 12Abisalom na tu o wora o ke kaanem dem konto to, mo o toŋe o bwoŋi Ahitofeli. Wonto déem ye David nakwa bam wone dedoa mo ye o nwoŋi Giloo. Balo na nwoŋi David kwaga ne to déem daga mo. Abisalom kwaga kɔgɔ kom ma fɔge ko puli dɛ maama ko ke dam.

David duri se o lu

13Nɔɔno déem ma duri o vo David tei o tole kolo na ke to o we, “Isarele tiina bam maama gɔge ba zo Abisalom kwaga kɔgɔ wone mo!”

14David ma ta de o nakwa balo na wo o tei ne Jerusalem wone to o we, “Pa-na se dé zaŋe dé duri dé nwoŋi da teo kom wone. Dé ná wo ke lela dé lu Abisalom jeŋa ne, o bá dáane o ba o yi debam, ye o go debam de dé teo kom nɔɔna maama.”#Lei 3:0 15O nakwa bam ma leiri‑o ba we, “Pɛ, dé ye nmo tontoŋena. Dé wó ke kolo maama nmo boboŋa na jaane se n ke to mo.”

16David ma ja o sɔŋɔ tiina de o nakwa bam maama o nwoŋi se o duri. O ma daare o ka-bi sem fuga teo kom wone se banto taa nii pɛ sɔŋɔ kom baŋa ne. 17Pɛ David na nwoŋi konto to, mo nɔɔna bam maama tɔge o kwaga ba via. Ba ma vo ba yi teo kom ni. Ba ma maŋe da ba zege fee. 18David jar-keira bam maama ma tɔge da ba kɛ yiga ba maa via. Banto maa ye Cherete tiina bam, de Peleti tiina bam#15:18 Nɔɔna bam konto déem yere pɛ wom mo., ko woli de Giti tiina bia yaredo (600) balo na nwoŋi Gafa ba ba ba tɔge David kwaga to.

19David ma ta de Giti tu Itayi o we, “Nmo tɔge debam kwaga se bɛ mo? N nwoŋi sa-teo mo n ba n ji veiru dé tetare ne. Nam jwoori Jerusalem se n ta‑n wo pa-dooro wom tei ne. 20Nmo na tu n me de amo to jege da yalei yerane mo. Kɔ nam mo wó pa se n ta‑n tɔge debam? Amo ta kare a beeri mo, a yeiri a na maa vei mɛ. Konto to, ja n jar-keira bam se á jwoori teo kom wo. Baŋa Wɛ wó taa ke‑m lanyerane de chega.”

21Itayi ma leiri‑o o we, “Pɛ, nmo na ŋwe to, amo dugi de Ŋwea Tu Baŋa Wɛ yere we, a lage a taa tɔge n kwaga mo se a vo mɛ maama n na wó vo to, ko ná maŋe ko ye toone de ŋwea wone mo de.” 22David ma ta‑o we, “Ko nam lana, kɛ yiga se dé taa via.” Itayi de o diga tiina dedaane o jar-keira bam maama ma tɔge de David kɔgɔ kom ba via.

23David dedaane o kwaga kam na maa nwoŋi Jerusalem teo wone to, balo na zoore jei sem maama ne to maa keeri ye ba chwoosa. O ma tɔge de-ba o vo o yi Kidoron nabara kam. Ba maama ma bɛ, ba vo ba kwei kagoa chwoŋa kam ba ma kɛa. 24Wɛ kaanem tiina Zadoki de Abiatara déem tɔge ba wora. Levi dwi tiina badwonna ma zeŋe Wɛ ni-gwonim dakaa kam ba tɔge-ba. Ba laam ma zoore-ka ba zege tega ne ye ba daa wo kwei-ka se ko taa nii maŋa kam nɔɔna bam maama na nwoŋi teo kom wone ba kɛ ba ti to.

25David ma ta de Zadoki o we, “Nam ja Wɛ ni-gwonim dakaa kam n jwoori Jerusalem wone. Baŋa Wɛ yi ná su amo totoŋa, o wó jwoori o ja-ne o ba se a ma a yi a na-ka, se a ta na Wɛ wara-vwei dem. 26O wo nam daa ná wo pwoli de amo, se o ke-ne o boboŋa yam na lage tei to.”

27O ta ma ta de Zadoki o woli da o we, “N wo nɛ na? Ja n bu Ahimaazi se á jwoori teo kom wone de yazura. Abiatara dedaane o bu Jonatan de wó tɔge‑m ba vo. 28Amo wó vo kagoa kam wo a vo a yi jei selo chwoŋa kam na tɔge bu-tola ka bɛ to a maŋe da, se a cheigi kwora na wó nwoŋi abam tei ne ka ba ka pa-ne to.” 29Zadoki dedaane Abiatara ma ja Wɛ ni-gwonim dakaa kam ba jwoori Jerusalem wone. Ba ma maŋe da ba zoora.

30David déem ma diini Olivi peo kom yuu ye o chwoosa o via. O déem wo zo natera, ye o kwei gɔrɔ o ma kwoli o yibia o wo-chechɔgɔ kom ŋwaane. O nɔɔna bam de ma kwoli ba yibia, ye ba chwoosa ba via. 31Ba ma ta de David ba we, “Ahitofeli de nwoŋi nmo kwaga ne, ye o vo o woli kɔgɔ kolo na tɔge Abisalom kwaga to wone mo.” David na nigi konto to, o ma lwoori Wɛ o we, “Baŋa Wɛ! Nam pipiri Ahitofeli bera maama se ya ji jworim ya pa Abisalom.”

32David ma yɔɔre o di peo kom yuu o vo o yi mɛ nɔɔna na yeini ba zuli Wɛ to. Dáane mo o maŋe de Husayi. Wonto déem ye Ariki tu mo. O gwaaro tem ma kaare kaare, ye kasolo de taare o yuu kom. 33David déem ma ta‑o o we, “Nmo ná lage n ta‑n tɔge de debam, ko bá jwoŋi-ne. 34Nam sɛ se n jwoori teo kom wone. N ná yi da, se n ta de Abisalom we, ‘A beene se a ji n tontoŋeno mo. A nam wó taa toŋe a woli‑m, nenɛɛne a ya n na woli nmo kwo David tei to.’ Konto ná kea, nmo wó na chwoŋa se n vugimi Ahitofeli bera yam se ya yé zege. 35Wɛ kaanem tiina Zadoki dedaane Abiatara de wó taa wora. Soswea kalo maama nmo na wó ni pɛ sɔŋɔ ne to, se n lwoni n bere-ba. 36Ba bia Ahimaazi dedaane Jonatan de tɔge ba wora. Á ná tu á lɔre woŋo kolo maama, se á pa banto ba ba ta ba bere-ne kolo na wora to.”

37David badwoŋi Husayi ma jwoori o vo Jerusalem teo kom wo. O na yi da to, dedaane Abisalom de o kɔgɔ kom de yɔɔre ba maa zoore teo kom ne mo.

Currently Selected:

2 Samuwel 15: KBG

Highlight

Copy

Compare