2 Samuwel 14

Abisalom nɛ chwoŋa se o jwoori Jerusalem

1Zeruya bu Joaba déem ma maane we David boboŋa tigi Abisalom wone mo dɛ maama. 2O ma toŋe nɔɔno Tekoa teo ne se o bwoŋi kaane wodwoŋi o na tiini o jege swa to. O na tu to, Joaba ma ta ded‑o o we, “Ke nenɛɛne n keeri nɔɔno lua mo tei. Kwei lua gwaaro n zo, se n daare n yage n yuu yɔɔ yerane, n yé kwɛ n tete de terale nuga. Pa se ko taa nye nenɛɛne n keeri lua mo n dáane. 3Nmo laam ma‑n wó vo pɛ wom tei n ta kolo amo na wó bere‑m to.” Joaba laam ma bere kaane wom kolo maama o na wó ta de pɛ to.

4Tekoa tiina kaane wom ma vo o yi pɛ wom yiga o vwi o yibia tega ne o zuli‑o, ye o ta o we, “Pɛ, jan ja! Woli-ne!”

5Pɛ wom ma bwei‑o o we, “Bɛ mo n laga?” O de ma leiri o we, “Dé kwo, amo baro tega o daare-ne kadeim mo. 6A nam ya jege bakeiri selei mo. Dɛ dedwe mo ba vei kara ye jara to ba tetare ne dáane. Nɔɔn-nɔɔno na tera se o lwɛ-ba to, mo ba dedoa mage wodwoŋi wom o go. 7Dé sɔ-yuu kom maama laam nam zege amo baŋa ne se a ja a bu wom a ja a ba a pa-ba se ba go, o na go o choro kom to ŋwaane. Ba maa lage se ba pa a dwi dem ti mo. Wonto yerane laam mo ye a yi na daare. Ba ná go‑o, amo gɛ mo konto, a baro de daa maa ba taa jege bu se ko jwa bwoŋi o yere.”

8Pɛ wom ma ta de kaane wom o we, “Jwoori n vo sɔŋɔ, se a wó nii n taane dem baŋa ne se de kwɛ.” 9Tekoa tiina kaane wom ta maa we, “Pɛ, keim dem konto wo amo de a dwi dem yuu ne mo. Se ko ná ye nmo dedaane paare dem n na jege n di to, daanem dae se de yi‑m.”

10Pɛ wom laam ma ta o we, “Wolo maama ná ŋɔɔne taane dedaane‑m, se n ja kotu n ba amo yiga ne, se o daa bá na chwoŋa o daane‑m.” 11Kaane wom ta ma ta o we, “Konto to, nam kwei n Tu Baŋa Wɛ yere dem n du we, wolo na lage se o jwoori o jwoŋi a bu wolo na tege to jene dem to daa yé na chwoŋa se o go a bu wonto de o woli da.” Pɛ David maa we, “Amo dugi dedaane Ŋwea Tu Baŋa Wɛ yere we, n bu wom yu-yua dedoa tete bá gɔ ka to tega ne.”

12Kaane wom laam maa we, “Jan ja! Pɛ, pa-ne chwoŋa se a ta taane dedoa yerane a woli da.” Pɛ David ma leiri o we, “Ta‑n tɛa.” 13O laam ma ta Pɛ wom o we:

“Dé kwo, lɔre we n wo tɔge chwoŋa de n na jege Wɛ nɔɔna bam n ke keim delo to. Nmo tete bu wo sa-teo ne mo ye n wo pɛ‑o chwoŋa se o jwoori sɔŋɔ. Nmo nam na ŋɔɔne tei de amo to, n de n tete mo konto. 14Nɔɔno maama jege se o te mo. Toone nye de na balo na lwogi tega ne to mo, ba daa ware-ba se ba jwoori ba pɛ ba ke jeiga dedoa ne. Wɛ nam ba beeri nɔɔna toone, se ko ná ye balo na ba ŋwae to, o yeini o pore chwoŋa se ba wane ba jwoori o tei.

15Pɛ, amo na jaane taane dem a ba nmo tei to, ko ye nɔɔna bam na pɛ foone di amo to ŋwaane mo. A ye nmo tontoŋ-kana mo. A ma boŋe a tete ne we, a ná tu a ta de nmo, n wó wane-ne n woli. 16Pɛ, a nam jege chega we nmo wó seene n jwoŋi amo de a bu wom se wolo na kwaane se o chɔge debam to yé yi dé yuu. Wonto lage se dé ga dé tega kam popɔra Wɛ na pɛ debam to mo.

17Amo laam nam tɛ a tete ne mo we, ‘Amo wo laam tiga mo de kolo pɛ na gwoni ni se o ke to. Kokuri to, dé kwo, nmo nye nenɛɛne Wɛ maleka mo, n wae n kuri lanyerane dedaane balɔrɔ n pɔɔre daane. N Tu Baŋa Wɛ wó taa wora dede‑m.’ ”

18Pɛ wom ma ta de kaane wom o we, “Amo de lage a bwei‑m woŋo mo, nam yé seigi kolokolo de amo.” Kaane wom ma leiri o we, “A kwo, bwei n bwia yam.”

19Pɛ David ma bwei‑o o we, “Joaba yiga tɔge ka wo keim dento wone na?” Kaane wom ma leiri‑o o we, “Pɛ, amo dugi nmo ŋwea kam ŋwaane we nɔɔn-nɔɔno bá wane se o fo chega kam nmo yiga ne. Nmo dedɛɛro Joaba mo seene o bere-ne kolo maama a na wó ke to, dedaane kolo maama a na jege se a ta to. 20O nam ke konto maama se ko pa keim dem mo pipiri de kwɛ. Dé kwo, nmo nam maŋe n jege swa mo, ne Wɛ maleka tei, n ma‑n yei kolo maama na ke dé tega kam baŋa ne to.”

21David laam ma bwoŋi Joaba ye o ta ded‑o o we, “Tɔ. A lage a ke n boboŋa yam mo. Zaŋe n vo n ja a bu Abisalom n jwoori n ba ywo-seeni.” 22Joaba ma vwi o yibia tega ne David yiga ne o zuli‑o. O ma daare o ta‑o o we, “Pɛ, a ke nmo lei. Amo laam nam lɔre we n yiga wo amo wone, dedaane n na sɛ n ke a na lage tei to.”

23Joaba déem ma zaŋe o vo Gesura o ja Abisalom o jwoori o ba Jerusalem. 24David nam ya maŋe o pa ni mo o we, “Abisalom maŋe se o vo o tete sɔŋɔ kom mo o taa wora. A bá sɛ se o ba amo tei.” Abisalom ma seene o vo o zoore o tete sɔŋɔ kom ne ye o wo nɛ pɛ wom yibia.

25Nɔɔn-nɔɔno déem tere Isarele tega kam maama ne ye ba tɛ o lam taane se ko maŋe dedaane Abisalom. Ko na zege o yuu ne se ko tu ko kwaare o napera seeni to, o mɛ mɛ ba jege gɛɛ. 26O déem yeini o pa se ba fa o yuu bedwe mo bene maama wone, o yu-ywei sem na tiini se dɔra ye se duna to ŋwaane. Ba ná yeini ba gwoni-se, se dunni wó taa maŋe de kilo telei mo. 27O déem jege bakeiri setɔ de busankana dedoa mo. Busankana kam yere maa ye Tamara. O na tu o ke nɔɔno to, o tiini o lana dedɛ.

28Abisalom déem zo Jerusalem ne bena yalei mo, ye o wo wane pɛ wom yibia o na. 29O ma toŋe o ta se Joaba ba o tei se o daare o ja taane dem o vo Pɛ David tei o pa‑o. Joaba ma ve se o vo Abisalom tei. Abisalom ta ma toŋe Joaba kwaga ne kuni balei maama ye o daa ta wo sɛ se o ba. 30Abisalom laam ma ta de o tontoŋena bam o we, “Nii-na, Joaba kara mo yeiri de amo kara kam. Ka wo mena#14:30 mena = barley nam wora ya ke lanyerane. Véi-na á de mini ka wone á zwɛ-ka.” Ba ma seene ba vo ba de mini Joaba kara kam ne.

31Joaba laam ma zaŋe o vo Abisalom sɔŋɔ o bwei‑o o we, “Bɛ mo ke ye n pa n tontoŋena vo ba zwɛ a kara kam?” 32Abisalom ma leiri o we, “Amo toŋe n kwaga ne se n ba amo tei ye n wo sɛ. A ya lage se n vo pɛ wom tei n bwei‑o mo we, ‘Bɛŋwaane mo amo bere a zege Gesura ne a ba ywo-seeni? Ko nye de a ya ná maŋe dáane mo a zoora, ko ya wó taa gara ko pa-ne.’ Tɔ. Amo nam ta lage se a na pɛ wom mo. O nam ná yei we a keim wo maŋe, se o go-ne.”

33Joaba ma vo Pɛ David tei o tole kolo maama Abisalom na tage to o bere‑o. David ma pa ba bwoŋi Abisalom se o ba. O na yi da to, mo o vwi o yibia tega ne o ware‑o. Pɛ wom ma sɛ o peiga ye o ja‑o o kukwori.

Currently Selected:

2 Samuwel 14: KBG

Highlight

Copy

Compare