2 Samuwel 13

Aminon dedaane Tamara taane

1David bu Abisalom déem jege nakɔ, o yere mo Tamara. O maa ye ka-laao. David bu wodwoŋi de maa wora, o yere na ye Aminon.#2 Samuwel 3:2-3 Wonto fera maa tiini ya wo o nakɔ Tamara wone.#13:1 Abisalom de Tamara déem ye kwo dedoa de nu dedoa. Ba nu wom ye Maaka. Aminon nu wom maa ye Ahinoam. 2Tamara ya ta yeiri baaro. Konto to, Aminon ma lɔre we ko wó taa chamma se o yi o nakɔ wom yuu. O ma da ko ŋwaane o weele, boboŋe dem na tiini de daane‑o to ŋwaane.

3Aminon déem jege yuudwoŋi, o yere mo Jonadabi. O maa ye David zembaaro Simea bu. Jonadabi déem jege swa-goa mo ko ja gaale. 4Dɛ dedwe o ma bwei Aminon o we, “Bɛ mo daane‑m? Nmo ye pa-bu mo ye ko dae se dɛ maama n ta‑n jei de wo-chechɔgɔ. Nam ta n bere-ne kolo na jege‑m to.”

Aminon ma ta o we, “A fera mo tiini ya zo a nyaane Abisalom nakɔ Tamara.” 5Jonadabi ma leiri‑o o we, “Zo n ta‑n tigi n sara baŋa ne, n paale n ke nenɛɛne n weele mo tei. Nmo kwo ná tu se o daane n jaweo kom, se n ta ded‑o we, ‘A kwo, pa a nakɔ Tamara ba amo tei ywo-seeni o ke wodiu o pa-ne. Amo lage se o saŋe wodiu kom a yiga ne se a taa nae, se a taa di-ko o jeŋa ne.’ ”

6Aminon ma seene o zo o tigi sara wone o ke nenɛɛne o weele mo tei. Pɛ David na tu se o daane o jaweo kom to, mo o tage‑o o we, “Popo, amo lage se a nakɔ Tamara mo ba ywo-seeni o fɔge maasa fenfee o pa-ne, se a di o jeŋa ne.” 7David ma sɛ. O ma toŋe kwora o sɔŋɔ kom ne o ta de Tamara o we, “Zaŋe n vo n nabɔ Aminon sɔŋɔ n ke wodiu n pa‑o se o di.” 8Tamara na yi da to, dedaane Aminon tigi sara baŋa ne mo. O ma zwɛ muni o viiri Aminon yibia ne. O ta ma fɔge maasa ye o tigi o nia. 9Bukɔ wom laam ma le wodiu kom o ke zoŋa ne o pa‑o se o di. Aminon ma ve ye o we, “Nɔɔno maama nwoŋi pwooni ne se á daare-ne na!” Nɔɔna bam maama ma seene ba nwoŋi.

10Aminon laam ma ta de Tamara o we, “Nam kwei wodiu kom n ja n zo diga kam wone amo na tigi mɛ to, se a jwoŋi wodiu kom n jeŋa ne a di.” Tamara ma seene o ja wodiu kom o zo o na tigi diga kalo wone to. 11O na jege wodiu kom o ma yi o yera to mo Aminon zi‑o ye o we, “Amo nakɔ, sɛ se dé peini daane!” 12O de ma leiri‑o o we, “A nabɔ, yé fe-ne se dé toŋe totoŋ-zɔɔne dento! Keim-balɔrɔ konto dae se ko ke Isarele tega baŋa ne. 13Nmo ná zi amo, a chaveera yam bá na kwolim jei. Ko ta wó pa se a kwei tetɔ-goro mo a kwoli a yuu! Ko nam ná ye nmo, nɔɔna maama Isarele ne wó ta we, n ye wo-koro mo. Nam ja n tete, se n ŋɔɔne dedaane pɛ wom, se o bá ve se o kwei-ne o pa‑m se n ma-ne n ke n kaane.” 14Aminon maa wo sɛ se o cheigi o taane dem. O na dana o dwoi bukɔ wom to o ma wane o zi‑o o lage.

15Aminon na ke konto o ti to, o daa maa ba lage se o yi na Tamara. O maa tiini o chuli‑o se ko dwoni o fera ya na zo o wone tei to. O ma ta ded‑o o we, “Zaŋe n nwoŋi daa a yiga ne!” 16Tamara ma leiri o we, “Chwoŋa tera se n zeili-ne! Nmo ná ke konto, ko maŋe ko wó taa ye lɛɛro ko dwoi n na chɔge-ne tento to.”

Aminon maa wo sɛ o taane dem. 17O ma bwoŋi o tontoŋeno ye o ta‑o o we, “Vaŋe kaane wonto n ja n nwoŋi n yage pwooni ne, se n daare n pe a bworo kom.” 18O tontoŋeno wom ma seene o vaŋe Tamara o ja o nwoŋi ye o daare o fɔge o pe bworo kom.

Tamara nam ya zo gare-dedɔrɔ na tiini ko jege nenɔŋa to mo. Tento mo ye gwaaro telo dwi pɛ bukɔ-pwoli na yeini ba zoora to. 19Tamara laam ma pɛ tentwarem o chaare o yage o yuu maama, ye o daare o ja o gare-dedɔrɔ kom o kaare kaare. O ta ma kwei o je o daŋe o yuu ne, ye o chwoosa o maa vei sɔŋɔ.

20O nabɔ Abisalom ma na‑o ye o bwei‑o o we, “N nabɔ Aminon mo ke lɛɛro tento nmo yera ne na? O nam na ye n nabɔ to, yé ke sɔɔ se nɔɔna maane ko ni ne. A nakɔ, nam ta yé pa se ko taa wɔe‑m.” Tamara ma vo Abisalom sɔŋɔ ne o zoore da. O maa yɔɔre o jei de wo-chechɔgɔ yerane.

21David déem ma ni kolo maama Aminon na ke to. O bane ma tiini de zaŋe. 22Se ko ná ye Abisalom, o wo sɛ se o ŋɔɔne de Aminon, ko ná maŋe ko ye ta-laao naa ta-balɔrɔ de. O déem nam tiini o chuli‑o mo, o na chɔge o nakɔ to ŋwaane.

Abisalom go Aminon

23Konto kwaga ne bena yalei maa kɛ. Abisalom tontoŋena maa wo Baal-Hazora ne se ba fane o pei sem koro. Jei sem konto wo Efrayim teo kom seeni mo. Abisalom ma bwoŋi pɛ bia bam maama se ba da ba jeeri da. 24O ma vo o ta de Pɛ David o we, “Pɛ, amo tontoŋena bam mo wora ba fane a pei sem koro. Nmo dedaane n nakwa ya ná sɛ se á ba da, ko wó taa lamma.” 25David ma leiri‑o o we, “A bu, ko bá wane ko ke konto. Dé maama ná lage dé ba, nmo wó chɔge n jeŋa mo.”

Abisalom ta ma kwaane se o nii David wó sɛ o vo na, ye o wo sɛ. David ma sɔɔle Wɛ swolim o pa Abisalom. 26Abisalom laam ma ta o we, “Nmo nam ná bá wane n vo, yage se a zembaaro Aminon tɔge de debam o vo.”

Pɛ David ma bwei‑o o we, “Bɛ mo ye n lage se wonto tɔge o vo?” 27Abisalom ma tiini o gigili David yia pa se o ga ga o yage o pa Aminon tɔge dedaane pa-bia badwonna bam se ba vo Abisalom pei sem koro fanem ne.

28Ba na ti kuri dem yiga to, Abisalom ma pa o tontoŋena bam ni o we, “Fɔge á ta‑á yere-na Aminon. O ná nyɔge sana o bugi, amo wó ke woŋo se ko bere we chwoŋa tiga se á go‑o. Konto ná kea, se á zaŋe o baŋa ne á go‑o. Yé ta‑á fona, se ko ye amo mo pɛ abam ni dem konto. Ke-na dam á tete kuri ne, se á daare á ta‑á jege baare.” 29Abisalom tontoŋena bam ma seene ba ke kolo o na bere-ba se ba ke to. Ba go Aminon mo. Pɛ wom bia badaara bam maama na nɛ konto to, ba ma di ba bona-sisei ba duri ba viiri.

30Ba ta na wo chwoŋa ne ba maa kɛ to, kwora ya maŋe ka yi David ka we, “Abisalom zaŋe o go n bia bam maama. Dedoa daa wo daare.” 31Pɛ David na nigi konto to, o ma kaare o gwaaro o wo-chechɔgɔ kom ŋwaane, ye o daare o dole o tete tega ne o tiga. O tontoŋena bam maama de maa zege o tei ne ye ba kaare ba gwaaro.

32David zembaaro Simea bu Jonadabi ma yi o tei o ta o we, “Pɛ, ko dae we ba go n bia bam maama. Aminon yerane mo tega. Abisalom nam maŋe o ja boboŋa se o go‑o ko zege maŋa kam Aminon na chɔge o nakɔ Tamara to mo. 33Nam yé sɛ we n bia bam maama tega, se Aminon yerane mo ba goa.”

34Ko daare Abisalom, wonto déem duri mo o jei.

Nɔn-doŋo wolo ba na le se o taa zege o yere teo kom to laam ma tole o na nɔn-kɔgɔ na wo Horon chwoŋa ne ba tɔge zwoŋo yuu ne ba siseiri ba beena. O ma vo o ta pɛ wom o we, “Amo nɛ nɔɔna na zege Horon seeni ba beena.” 35Jonadabi ma ta de David o we, “Nmo bia bam mo konto ba maa beene, nenɛɛne a na maŋe a ta tei to.”

36O ni dem maŋe de wo to tega ne, dedaane David bia bam na yi da. Ba maama ma to keira ne ye ba chwoosa baŋa baŋa. David dedaane o nakwa bam de ma tiini ba keeri dedɛ.

37-38Abisalom déem nam ya duri o vo o seigi o nu nakwe Talimayi tei ne mo o wora. Wonto maa ye Amihuda bu ye o ta ye Gesura teo pɛ. Abisalom déem maŋe Gesura ne o ke bena yatɔ mo.

Ko daare David ma keeri o bu Aminon lua kam o dáane. 39O wo laam ma ba ko to de Aminon toone dem. O boboŋa ma jwoori ya vo Abisalom wone se ba ke daane.

Currently Selected:

2 Samuwel 13: KBG

Highlight

Copy

Compare