2 Samuwel 12

Natan na bwɛ David tei to

1 Baŋa Wɛ déem ma toŋe Natan David tei ne.#Lei 51:0 Natan ma ta o we:

“Nɔɔna balei mo zoore teo dedoa wone. Ba dedoa ye nadum, wodwoŋi wom maa ye yiniga tu. 2Nadum wom vara bam gaale dedɛ, naane de pei de bone. 3Yiniga tu wom nam ba jege kolokolo, ko ná dae pi-chwɛ dedoa yerane mo o na yeigi. O ma kɔne-ka, ye ka be de o bia. O maa yeini o pae-ka o tete wodiu pa ka di, ye ka nyɔ o tete na. Pia kam maŋe ka tigi o nɛ baŋa ne mo. Chega to, o pia kam yɔɔre ka nye de o tete bukɔ mo. 4Dɛ dedwe mo veiru tu nadum wom sɔŋɔ. Nadum wom maa wo sɛ se o le o vara bam wone se ba ma ba ke na ba pa o veiru wom. O ma vo o vere yiniga tu wom pia kam se ba ma ba ke o veiru wom na bam.”

5David na nigi sensɔla kam to, o bane ma tiini de zaŋe dedaane nadum wom ye o ta de Natan o we, “Amo dugi de Ŋwea Tu Baŋa Wɛ we nɔɔno wom konto jege se o te mo! 6O ta wó ŋwe kolo o na vere yiniga tu wom tei ne to kuni bena mo o pa‑o, o na ba jege o ŋwaŋa to ŋwaane.”

7Natan laam ma ta de David o we, “Nmo mo ye nɔɔno wom konto! Isarele tiina Baŋa Wɛ wom kwora mo tento:

Amo mo kuri‑m se n ta‑n ye Isarele tiina pɛ, ye a jwoŋi‑m a yage Sɔɔl jeŋa ne. 8A ma kwei Sɔɔl paare dem a pa‑m, ye a ta pa se o kaana bam ji nmo nyem. A ma pa se n di paare Isarele de Judah tiina bam maama baŋa ne. Konto ya ná ba daga mo de, a ya ta wó wane a woli ko wone kuni belei a pa‑m. 9Bɛŋwaane mo nmo nam tiini n gwooni amo Baŋa Wɛ taane dem, ye n daare n ke wo-balɔrɔ konto? Nmo pɛ se Amon tiina go Hiti tu Yuria jara ne. Nmo na go‑o to, n laam ma‑n daare n di o kaane! 10Nam lɔre we n diga tiina laam wó taa tɔge jara baŋa ne mo ba toa. Kokuri to, n ve amo mo ye n vere Yuria kaane se o ji nmo nyem.

11Chega ŋwaane to, a lage a pa se n tete yera nɔɔno mo ke‑m se ko yi. Nmo wó ta‑n nia se a kwei n kaana a pa nɔn-gaa se kotu peini de-ba pwooni yiga ne.#2 Samuwel 16:22 12Nmo na ke wɛleere to, n seigi mo n ke. Amo nam wó pa se keim dento ke pwooni yiga ne se Isarele tiina bam maama na.”

13David ma leiri Natan o we, “Amo tiini a ke wɛleere a chɔge Baŋa Wɛ yiga.”#Memaŋa 28:13 Natan ma leiri‑o o we, “Baŋa Wɛ kwei n wɛleere dem o ma o chɛ‑m. N daa‑n bá‑n te. 14Ko nam na ye tei to, n na tiini n nii Baŋa Wɛ n gwooni de n keim dem to ŋwaane, n bu wom mo wó te.”#Rom 2:23

15Konto kwaga ne, Natan laam ma viiri.

David bu wom toone

Baŋa Wɛ déem ma pa se bu wolo Yuria kaane Bafeseba de David na loge daane to weele ye ko tiini ko chɛ. 16David ma lwoori Wɛ o pa bu wom se o na yazura, ye o vɔ ni. Tete maama ne, o ná yeini o zo diga se o peini, o ta tigi tega ne mo. 17O sɔŋɔ kom nakwa bam ma vo o tei ba kwaane ba lwoori‑o se o zaŋe tega kam ne ye ba ga. O ma ve se o da de-ba o di wodiu.

18Bu wom weele da yarepɛ mo ye o te. David dedɛɛra bam ma kɔre se ba pa o lɔre ko ni ne. Ba déem bwɛ ba tete ne mo ba we, “Bu wom ya ta na ŋwe ye dé ŋɔɔne taane de David to, o ve se o leiri dé taane dem. Bu wom laam nam na tege tento to, de wó ke tɛ mo dé ta dé bere‑o? Dé ná wo lɔre, o wó wane o ke zonne o tete yera ne!”

19David na tole o na we o tontoŋena bam jege woŋo mo ba waase ba bere daane to, o ma maane we bu wom mo tega. O ma bwei-ba o we, “Bu wom tege mo na?” Ba ma leiri‑o ba we, “Ɛɛ, Wɛ jwoŋi‑o mo o daare debam.”

20David na nigi konto to, o ma pɛ o zaŋe tega kam ne. O ma vo o swɛ o yera, o daare o turi nuga. O ma leiri o gwaaro o zo, ye o laam vo o zo Wɛ wara-jei sem ne o zuli Baŋa Wɛ. O na zuli Wɛ o ti to, mo o jwoori o tete sɔŋɔ ye o we, ba ke wodiu ba pa‑o. O ma jwoŋi wodiu kom o di. 21O dedɛɛra bam ma bwei‑o ba we, “Nmo keim dem ke debam yaau dedɛ. Bu wom ta na ŋwe to, nmo keeri mo o ŋwaane, ye n vɔ ni. O laam nam na tege to, n zaŋe mo n wora n di wodiu. Bɛ mo konto?”

22David ma leiri-ba o we, “Bu wom ya ta na ŋwe to, amo ya vɔ ni mo ye a keera. A ya boŋe we Baŋa Wɛ wó wane o duri amo yibwona mo ye o pa bu wom wori. 23Amo nam gɛ‑o. Bɛŋwaane mo a daa wó taa vɔ ni? Amo wó wane a pa bu wom jwoori o taa ŋwe na? Dɛ wora amo na wó vo bu wom tei, se wonto daa ba lage o jwoori o ba amo tei.”

24David déem ma gane o kaane Bafeseba se o pa o bochare peini tega ne. Ba daa ma peini daane ye o ja puga o lo bakeira. Ba ma pa bu wom konto yere we ‘Solomon’. Baŋa Wɛ ma swoi bu wom. 25Ko ma pa se o toŋe o ni-jwoŋinu Natan se o vo o pa bu wom yere we ‘Jedidia’#12:25 Jedidia kuri mo ye Baŋa Wɛ na swoi wolo to., Baŋa Wɛ na swoi‑o to ŋwaane.

David di Raba teo kom

26Ko daare Joaba déem daa ta jeeri Amon tiina balo na zoore Raba teo wone to de jara. O ma di teo kom paare jei sem. 27O laam ma toŋe kwora o pa David ye o we, “Amo ke jara de Raba teo kom ye a wane mɛ ba teo kom na bam na zege da ba tui to a ja. 28Nam kwaane n la dé jar-keira balo na daare to n ke daane, se n ba n jeeri teo kom de jara n daare n di-ba. Nmo ná wo ke konto, ye amo tete ná di teo kom, amo laam wó jwoŋi yere nmo yiga ne.”

29David ma seene o la o jar-keira bam o ke daane o vo o jeeri Raba tiina bam de jara. O ma wane teo kom o jwoŋi o tei. 30David ma dɔne sabu-seŋa paare yipuga kam ba pɛ wom#12:30 ba pɛ wom naa ba jwoni Moleka yuu ne. Ka dunni daga dedɛ, nenɛɛne kilo fintɔ-tenu (35), ye kandwɛ-nyeno mo meeli ka yera ne. Ba ma kwei kandwɛ dem ba ke David yipuga kam ne. O de o nɔɔna bam déem ta ma pɛ teo kom jejegero dedɛ ba ja ba viiri. 31Ko nam ná ye teo kom nɔn-bia bam, o déem kwei-ba mo o de totoŋ-dɛɛra wone. O ma pa se ba yeini ba taa mae pengasa, de dwoora, de seene ba toŋa, se ba badaara de taa mage wara. David déem ke Amon tiina teene dem maama konto dwoŋi mo.

Konto kwaga ne, David dedaane o jar-keira bam maama ma jwoori ba vo Jerusalem.

Currently Selected:

2 Samuwel 12: KBG

Highlight

Copy

Compare