2 Samuwel 11

David dedaane Bafeseba taane

1Ko déem ma yi teeni punnu keim maŋa. Ko maa ye maŋa kalo pwa na yeini ba nwoŋi se ba ke jara to mo. David ma toŋe Joaba de o dedɛɛra badwonna, dedaane Isarele jar-keira bam maama, se ba vo ba kwaare jara de Amon tiina bam. Ba ma chɔge-ba ye ba daare ba li Raba teo kom se ba ja. Ko daare David tete ma maŋe Jerusalem ne.

2Dɛ dedwe, David ma peini wea tetare ne o dɔ. O na pɛ o zaŋe dedaan-ni maŋa ne to, mo o kare o sɔŋɔ kom nayuu ne o kekara. O ma dole o yia o na kaane na wo o sɔŋɔ ne o swɛ yera. Kaane wom déem tiini o lamma dedɛ. 3David ma toŋe nɔɔno se o vo o bwei o lɔre kaane wom laŋa maama. Nɔɔno wom ma ta o we, “Ko wó taa ye Bafeseba mo. O ye Eliam bukɔ mo. O baro maa ye Hiti tu Yuria.”

4David ma toŋe nɔɔna pa se ba vo ba ja kaane wom ba ba. Kaane wom na tu to, o ma peini ded‑o. Yanto da yam ne kaane wom ya ke o wo zarem mo, ye o daare o kwɛ o tete se ko maŋe de chullu tem. O ma zaŋe o jwoori o sɔŋɔ. 5Bafeseba ma ja puga, ye o toŋe o ta de David o we, “Amo jege puga mo.”

6David na lɔre konto to, o ma toŋe kwora o pa Joaba o we, “Ta de Hiti tu Yuria se o ba amo tei ywo-seeni.” Joaba ma toŋe Yuria David tei ne. 7Yuria na yi David tei to, mo David bwei o kwaga se o lɔre Joaba, de jar-keira bam laŋa na ye tei to. O ta ma bwei se o lɔre jara yam na vei tei to. 8O laam ma ta de Yuria o we, “Nam véi sɔŋɔ n sii fee.”

Yuria na nwoŋi Pɛ sɔŋɔ ne to, mo David toŋe nɔɔna se ba ja pɛɛre ba saŋe o kwaga ba vo ba pa‑o sɔŋɔ ne. 9Yuria nam wo vei o tete sɔŋɔ. O ma maŋe de pɛ tontoŋena bam, o peini pɛ sɔŋɔ manchwoŋo kom ni ne. 10David ma maane we Yuria wo vei sɔŋɔ, ye o bwei‑o o we, “Nmo nwoŋi chwo-dɔrɔ n ba n yi ywo-seeni. Bɛ mo tei ye n wo vei sɔŋɔ?” 11Yuria ma leiri‑o o we, “Isarele tiina de Judah tiina bam maama nwoŋi mo se ba ke jara. Wɛ ni-gwonim dakaa kam de wo ba tei ne. Amo yiga tu Joaba de o dedɛɛra bam maama de tigi pwola ne. Ko laam nam wó ke tɛ mo se a vo sɔŋɔ a taa di ye a nyɔa, se a daare a peini de a kaane? Pɛ, a dugi n ŋwea kam ŋwaane de n tete yere dem ŋwaane we, a bá fɔge a ke konto!” 12David ma ta‑o o we, “Nam peini ywo zem, se jwa ne a laam wó yage‑m se n jwoori jara jei sem ne.”

Dɛ dem konto ne, Yuria ma maŋe Jerusalem ne o peini o poore tega. 13David ma bwoŋi‑o pa se ba di daane. O ma pa se ba nye Yuria dedaane sana, ye o tiini o bugi. De konto maama de, Yuria wo vei sɔŋɔ se o peini. O maŋe pɛ sɔŋɔ ni ne de pɛ tontoŋena bam mo o peini o sara kam ne.

14Tega na poore tetete to, David ma popone tɔnɔ o toŋe Yuria se o ja o vo o pa Joaba. 15Tɔnɔ kom popone ko we, “Kwei Yuria n zege jar-keira bam yiga ne, mɛ jara yam na tiini ya chana to, se á daare á tutwoni á jwoori kwaga á daare‑o o yerane se dé dona bam go‑o.”

16Joaba déem li Raba teo kom mo ye o nii ko maama. O ma kwei Yuria o zege jei selo ba dona bam babɛ sem na daga to. 17Teo kom nɔɔna ma nwoŋi ba jeeri Joaba jar-keira bam de jara. Ba ma go David nɔɔna bam badwonna ko woli de Yuria tete.

18Joaba ma toŋe kwora David tei ne se o bere‑o jara yam na ke tei to. 19O ma ta tontoŋeno wom o we, “Nmo ná tole jara yam na ke tei maama to n pa pɛ wom n ti, 20o bane wó wane de zaŋe ye o ta we, ‘Bɛ mo ye á tiini á yi teo kom se á ke jara de-ba? Abam ya yeiri we nɔɔna bam wó dale ba teo kabiri sem ne ba ta che-tɛɛra na? 21Á swei Gideon bu Abimeleka swia na? Ko déem ye kaane mo zege Tebeza teo kom kabira yuu ne o dole nɔŋɔ namim o de o yuu ne o go. Abam tiini á yi ba kabira kam teiŋa wo bɛ mo?’ Tɔ. Pɛ wom ná bwei‑m konto, se n ta ded‑o we, ‘Nmo tontoŋeno Yuria de tɔge o te mo.’ ”

22Tontoŋeno wom ma seene o vo o yi David tei, ye o tole kolo maama Joaba na bere‑o se o ta to. 23O ma woli da o we, “Dé dona bam ya tiini ba dana ba dwoi debam mo. Ba ma nwoŋi ba teo kom ba jeeri debam de jara pwola kam ne. Dé ma kwaane dé zeili-ba dé jwoori ba teo kom ni ne. 24Dáane mo ba che-tara bam zege ba teo kabiri sem yuu ne ba ta debam. Nmo nɔɔna bam badwonna tega, ye n tontoŋeno Yuria na ye Hiti tu to de tɔge o te mo.”

25David ma ta de tontoŋeno wom o we, “Nmo ná jwoori, se n ta de Joaba we, ‘Yé pa n wo chɔge de kolo na ke to. Wolo maama na lwoori o vo jara wone to wae o toa. Fɔge n ja baare. Tiini á kwaare-na jara yam de-ba se á di teo kom.’ ”

26Bafeseba na nigi we o baro wom tega jara yam ne to, o ma keeri dedɛ o ŋwaane. 27Lua kam ni na kɛ to, mo David toŋe o pa ba vo ba ja‑o ba ba pɛ sɔŋɔ pa se o ji o kaane. O déem ma lo bakeira o pa David.

Kolo David nam na ke to déem chɔge Baŋa Wɛ wo mo.

Currently Selected:

2 Samuwel 11: KBG

Highlight

Copy

Compare