2 Pwa 8

Da-kore zege Isarele teo ne

1Elisa déem ya maŋe o ta de kaane wolo bu o na bi to o we, “Zaŋe n viiri, nmo de n diga tiina, se á wane á na jeiga kadwoŋi á ta‑á zoore da. Kokuri to, Baŋa Wɛ boboŋa jaane se o pa da-kore mo zege tega kanto baŋa ne bena yarepɛ.” 2Kaane wom ma seene o ke kolo maama Wɛ tontoŋeno wom na taga to. O de o diga tiina maama ma vo ba zoore Filisi tiina teo ne bena yarepɛ.

3Bena yarepɛ yam ni na ti to o ma zege Filisi teo kom ne o jwoori o tete teo. O ma vo o lwoori pɛ wom se o jwoori o jwoŋi o sɔŋɔ de o tega se o taa zoora. 4O na yi pɛ wom tei to, de pɛ wom ya jege lara de Gehazi wolo na ye Elisa tontoŋeno to. Pɛ wom ma ta de Gehazi o we, “Ta n bere-ne wo-kenkagela yalo maama Elisa na ke to.” 5Gehazi ma lwoni Elisa déem na pɛ se bu wodwoŋi bi tei to. O ta na wora o ŋɔɔne konto to mo kaane wom tete de o bu wolo Elisa na bi to yia. Kaane wom ya tu se se o lwoori pɛ wom o sɔŋɔ kom de o tega kam ŋwaane mo. Gehazi ma na ye o we, “Amo tu, kaane wolo a na tɛ o taane to mo tento. Bu wom Elisa na bi to de tete mo tento o yia.” 6Pɛ wom ma bwei kaane wom se o lɔre kolo na ke to. Kaane wom ma tole ko na ke tei maama to nywa o de o jea ne. Pɛ wom na nigi ko maama to, o ma bwoŋi o dedɛɛro se o nii kaane wom taane dem baŋa ne. O ma ta ded‑o o we, “Kolo maama ya na ye kaane wom nyem to se n kwei n jwoori n pa‑o, ko ta woli de o na gɛ nyɔɔre delo o tega kam ŋwaane, ko zege maŋa kalo o na viiri to se ko ba ko yi zem to de maama.”

Hazayeli go Ben-Hadadi

7Wɛ tontoŋeno Elisa déem ma vo Damasika. Siria tiina pɛ Ben-Hadadi maa ba jege yazura. Pɛ wom na maane we Elisa tu to, 8o ma ta de Hazayeli o we, “Ja pɛɛra n vo n ware Wɛ tontoŋeno wom se n daare n pa se o bwei Baŋa Wɛ o nii, amo wó wori na?” 9Hazayeli ma la zela yalo na wo Damasika ne ye te lana to dedɛ o daŋe kona finna baŋa ne o ja o vo se o pa Elisa. O ma zo o zege Elisa yiga ne ye o we, “Nmo bu Ben-Hadadi na ye Siria teo pɛ to mo toŋe-ne se a bwei a nii, o wó wori na?” 10Elisa ma leiri‑o o we, “Véi n ta ded‑o we, ‘Chega to, n wó wori.’ Baŋa Wɛ nam maŋe o veere o bere-ne we, o wó te mo.” 11Elisa ma yɔɔre o nii Hazayeli yibia ne zii pa se chaveera ja‑o. Elisa laam ma to keira ne. 12Hazayeli ma bwei‑o o we, “Amo tu, bɛŋwaane mo nmo keera?” Elisa ma leiri o we, “Amo yei lɛɛro telo na wó yi Isarele tiina bam nmo ŋwaane to.#2 Pwa 13:4 Nmo wó pa se mini di ba dam jei sem, n daare n go ba nɔn-donno jara wone. Nmo ta wó yigi ba bu-sese n de tega ne n go, ye n daare n lɔ ba kapwi sem ba pwi seeni n go. Konto ŋwaane mo a keera.” 13Hazayeli ma leiri o we, “A ye nabwom mo. Amo nyeene dento wó ke tɛ mo a toŋe totoŋ-kamunnu tento dwoŋi?” Elisa ma leiri o we, “Baŋa Wɛ nam veere o bere-ne we, n lage n di Siria teo paare mo.”#1 Pwa 19:15

14Hazayeli ma zege Elisa tei ne o jwoori o vo pɛ wom tei. Ben-Hadadi ma bwei‑o o we, “Elisa tage bɛ mo dede‑m?” Hazayeli ma leiri o we, “O we, n wó wori.” 15Tega na yɔɔre ka poore to mo Hazayeli kwei gare-jale o de na wone o ma o peene pɛ Ben-Hadadi momwɛ o go. O na ke konto to, o ma lɛɛre o ji pɛ.

Judah teo pɛ Jehoram taane

16Isarele teo pɛ Ahab bu Joram bena yanu paare dim bene dem wone ye Jehosafate ta ye Judah teo pɛ to mo Jehosafate bu Jehoram bobo se o di paare Judah ne. 17O déem jege bena fintɔ-yalei mo ye o laam ji pɛ. O ma jeini Jerusalem ne o di paare dem o ke bena nana. 18Jehoram déem kwei Isarele pwa bam totoŋ-naga mo, nenɛɛne pɛ Ahab de o dwi dem na ke tei to, kokuri to o di Ahab bukɔ mo. Konto to, o déem toŋe lwarem o chɔge Baŋa Wɛ yiga. 19Baŋa Wɛ nam wo sɛ se o chɔge Judah dwi dem, bɛŋwaane o maŋe o gwoni ni de o tontoŋeno David we, o diga kam wó taa tei paare dem taa wuu.

20Jehoram paare dim maŋa ne mo Edom dwi dem ve se ba taa wo Judah pɛ wom dam kuri ne. Ba ma lɛɛre ba tiŋi ba tete pɛ. 21Jehoram ma ja o jar-keira de ba torokooro tem maama o vo se o li Zayiri teo. Edom tiina bam ma ba ba gilimi o de o nɔɔna bam ba ke tetare ne. Tete ne mo Jehoram de o dedɛɛra bam wane ba lu ba jeŋa ne. O jar-keira bam de ma pipiri ba duri ba jwoori sɔŋɔ. 22De zem maama Edom tiina ta ve mo se ba taa wo Judah tiina dam kuri ne. Libina teo tiina de déem ke konto dwoŋi mo.

23Jehoram déem na di paare ye o ke wonnu telo maama to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone. 24O ma te ye o vo o kwoa tei. Ba ma kwei‑o ba suli o kwoa bam yibeeli ne David teo Jerusalem ne. O toone dem kwaga ne o bu Ahazia ma leiri o yuu ne o ji pɛ.

Judah teo pɛ Ahazia taane

25Isarele teo pɛ Ahab bu Joram bena fuga-yalei paare dim bene dem ne mo Jehoram bu Ahazia bobo se o di Judah teo paare. 26O déem jege bena finlei-yalei mo ye o laam ji pɛ. O ma jeini Jerusalem ne o di paare dem o ke bene dedwe. O nu déem mo ye Atalia wolo na ye Isarele teo pɛ Omiri naa to.#2 Pwa 11:1 27Ahazia déem kwei pɛ Ahab de o dwi dem totoŋ-naga kam mo. O tiini o toŋe lwarem mo o ma o chɔge Baŋa Wɛ yiga, nenɛɛne Ahab de o dwi dem na ke tei to, Ahab na ye o tembaaro to ŋwaane.

28Ahazia déem dɛ de pɛ Ahab bu Joram mo pa se ba vo Ramofa-Gilead ba kwaare jara de Siria teo pɛ Hazayeli. Siria tiina bam ma ke Joram zonne jara yam wone. 29Mo kokuri o jwoori o vo Jezerele teo se o teibi o fufwollu tem. O na wo Jezerele ne to, Judah teo pɛ Ahazia ma vo o tei se o ware‑o de o zonne dem.

Currently Selected:

2 Pwa 8: KBG

Highlight

Copy

Compare