2 Pwa 4

Elisa na woli kadeim wodwoŋi tei to

1Kaane wodwoŋi déem mo wora, o na ye Wɛ sampwori sem dedoa kaane. Dɛ dedwe o ma zaŋe o vo Elisa tei o ŋwane o we, “Amo tu, a baro wom tega ye o ya tɔge nmo kwaga. Nmo maŋe n yei o na yeini o kɔre Baŋa Wɛ tei to. O ya na di jene nɔɔno wolo tei ne to nam mo tu se o jwoŋi a bakeiri sem selei o vo o ma o ji o kabɛ se o ma o yiri jene dem.” 2Elisa ma bwei‑o o we, “Woŋo wora amo na wó wane a ke a woli‑m na? Nam ta n bere-ne, bɛ mo n daare n yage sɔŋɔ ne?” Kadeim wom ma leiri o we, “Amo tu, kolokolo tera ko ná dae kabɔɔ de ka wo nuga fenfee yerane.”

3Elisa ma ta de kadeim wom o we, “Tole sane delo na bwola de nmo to se n jene kunkwollu ba tei ne. Pa se te taa daga dedɛ. 4Kwei kunkwollu telo n na nɛ to n zo diga n pe ka ni, se nmo de n bia balei bam taa wora. Nmo ma‑n wó pwori nuga kam n ke kunkwollu tem wone. Kunkwolo kolo ná sua, se n zege-ko dáane.”

5Kadeim wom ma jwoori sɔŋɔ o pe o ni diga wone, o de o bia bam. Ba maa jaane kunkwollu tem ba vei ba pa‑o ye o lɛɛre nuga kam te wone. 6Kunkwollu tem maama na su to, o ma ta bia bam se ba ja tedwonna ba ba ba pa‑o. Ba dedoa ma leiri o we, “Mo te maama.” O na tage konto to mo kabɔɔ kam wo nuga kam ti. 7Kadeim wom ma vo o ta ko na ke tei to o bere Wɛ tontoŋeno Elisa. Elisa ma ta ded‑o o we, “Véi n kwei nuga kam n yeigi n ma n ŋwe jene dem. Sabu ta ná daare, ko wó woli nmo de n bia bam se á na á ni-wodiu.”

Sunem tiina kaane wodwoŋi taane

8Dɛ dedwe mo Elisa déem vei Sunem. Kaane wodwoŋi maa zoore da ye o ye nadum. O ma bwoŋi Elisa o sɔŋɔ ne se o di wodiu. Ko na zege dɛ dem konto ne to, maŋa kalo maama Elisa ná vei Sunem, o yeini o di kaane wom konto sɔŋɔ ne mo. 9Kaane wom ma ta de o baro o we, “Nii mo. Amo maane we nɔɔno wonto na yeini o tui debam tei to ye Baŋa Wɛ tontoŋeno mo chekke. 10Nam pa se dé lɔ di-balaŋa nayuu kom ne se dé daare dé zege kadwogo, de tabolo, de yituŋu, de min-zwoŋo da. Konto wó woli Wɛ tontoŋeno wom se, o ná yeini o ba, se o na peiga jei.”

11Dɛ dedwe mo Elisa jwoori Sunem. O ma di o zo nayuu diga kam se o peini. 12O ma ta de o tontoŋeno Gehazi o we, “Véi n bwoŋi kaane wom n pa-ne.” Gehazi ma seene o bwoŋi kaane wom pa se o ba o zege Elisa yiga ne. 13Elisa ma ta de Gehazi se o lwoni o ta kaane wom we, “Nii nmo na pɛ n yera chɛ se n ma‑n woli debam tei! Debam nam wó ke bɛ mo dé ma dé zeini nmo? Dɛ delo amo wó wane a ta n lanyerane a bere pɛ wom naa jar-keira yiga tu wom.” Kaane wom ma leiri o we, “Yé daane n tete, amo na zoore de a sɔŋɔ tiina to ŋwaane.”

14Elisa laam ma bwei Gehazi o we, “Bɛ nam mo maŋe se a ke a pa kaane wom?” Gehazi ma leiri o we, “Kaane wom ta wo loge bu. O baro de ma tiini o kwe lanyerane.”

15Elisa ma ta de Gehazi o we, “Bwoŋi kaane wom se o jwoori o ba.” Kaane wom ma ba o zege diga kam ni ne. 16Elisa ma ta de kaane wom o we, “Bene tento wɛɛne nmo wó lo bakeira.” Kaane wom maa wo sɛ ye o we, “Amo tu, yé gane-ne, se n ye Wɛ tontoŋeno mo.”

17Bene na jwoori de yi to, kaane wom ma seene o ja puga o lo bakeira. Ko déem ke ne Elisa na wuuri o ta tei ded‑o to mo.

18Bu wom na ke nɔɔno fee to mo dɛ dedwe o zaŋe o vo o kwo tei kara ne maŋa kalo o kwo wom de tontoŋena badwonna na wora ba zage mena to. 19Bu wom ma pɔpɔ o laare bedwe baŋa ne de o kwo o we, “A yuu wɔe ywoo! A yuu wɔe ywoo!” O kwo ma ta de o tontoŋeno wodwoŋi o we, “Ja bu wom n vo o nu tei.” 20Tontoŋeno wom ma teili bu wom o ja o vo o ke o nu wom jeŋa ne. Bu wom ma maŋe o nu nɛ baŋa ne o jeini. Wea na yi yupare baŋa maŋa kalo to mo bu wom tega. 21Kaane wom ma ja o bu wom o di nayuu kom o zo Elisa diga o tiŋi‑o kadwogo kom baŋa ne. O ma nwoŋi o ja diga kam ni o pe o yage bu wom da. 22Kaane wom ma bwoŋi o baro o ta ded‑o o we, “Ja, pa se n tontoŋena bam dedoa ja bonaga o ba, se dé da daane dé vo Wɛ tontoŋeno wom tei, se dé jwoori lela.”

23O baro wom ma ta‑o o we, “Bɛ mo ke ye n lage se n vo zem? Chan-doŋa ta wo nwoŋi. Ko maa dae siu dɛ.” Kaane wom ma leiri‑o o we, “Ko ye yazura mo.” 24O ma ti bonaga kam yiga ye o daare o ta de tontoŋeno wom o we, “Pa dé kɛ. Ta‑n pae bonaga kam zaara. Nam yé pa se dé taa vei mɛmɛ ko ná dae we a tage‑m se n ke konto.” 25Kaane wom ma vo o yi Kamele peo kom mɛ Wɛ tontoŋeno Elisa na wora to. Elisa ma tole o na‑o yiga yiga ye o ta de o tontoŋeno Gehazi o we, “Nii Sunem tiina kaane wom na maa beene. 26Ke lela n duri n jeeri‑o n bwei‑o n nii, yazura mo o vei na? Bwei‑o n nii o baro de o bu yazura na ye tei to.” Kaane wom ma leiri Gehazi o we, ko ye yazura mo.

27Kaane wom na yi Elisa tei Kamele peo kom yuu ne to mo o to o yiga ne o ja o naga. Gehazi ma fɔɔre o yi se o vaŋe‑o o yage dáane. Elisa ma ta o we, “Yage o yera! O wo tiini ko chɔge mo ye o ba. Baŋa Wɛ nam wo tage kolo na daane‑o to o bere-ne.”

28Kaane wom ma ŋwane Elisa yiga ne o we, “Amo tu, a wo tage we n pa-ne bu. Konto mo a ya taga a we n yé gane-ne to.”

29Elisa ma ta de Gehazi o we, “Fɔge n vɔ n gare-kura kiri-kiri n daare n kwei a nacheiga kam n duri lela n kɛ. Nam yé ware nɔɔn-nɔɔno chwoŋa yuu ne. Nɔɔno ná ware‑m, se n yé leiri‑o. N ná yi da se n kwei a nacheiga kam n daŋe bu wom yibia ne.” 30Kaane wom ma ta de Elisa o we, “Ŋwea Tu Baŋa Wɛ na seene o wora to, amo dugi wonto yere ŋwaane, de nmo tete ŋwea ŋwaane we, amo bere a bá yage‑m.” Elisa ma zaŋe se ba tɔge daane ba kɛ.

31Gehazi ma lwoori yiga o vo o yi da ye o daare o kwei nacheiga kam o daŋe bu wom yibia ne ye bu wom wo gigiri o tete. O ma jwoori o vo Elisa tei o ta ded‑o o we, “Bu wom ta wo zaŋe.”

32Elisa na yi sɔŋɔ kom o zo o diga kam to mo o nɛ bu wom na tege o tigi o kadwogo baŋa ne. 33O ma pe diga kam ni ye o lwoori Baŋa Wɛ o yerane. 34Elisa ta ma zaŋe o yi kadwogo kom baŋa, o peini bu wom baŋa ne pa se o ni dem yɔɔre bu wom ni, ye o yia yɔɔre o yia. O ma daare o lware o jea pa ya yɔɔre o jea. O na lware o tete o peini bu wom baŋa ne konto to mo bu wom yera lone. 35Elisa ma zaŋe o kekare diga kam wone ye o daa jwoori o vo o lware o tete o peini bu wom baŋa ne. Bu wom ma te kuni berepɛ ye o daare o puri o yia. 36Elisa ma bwoŋi Gehazi ye o ta ded‑o se o bwoŋi Sunem tiina kaane wom o pa‑o. O na bwoŋi nu wom pa se o yi to, Elisa ma ta ded‑o o we, “Jwoŋi n bu.” 37Kaane wom ma zo o to Elisa nɛ baŋa ne ye o vwi o yibia tega ne. O ma seene o jwoŋi o bu o viiri.

Wo-kenkagela yalei taane

38Elisa ma jwoori o vo Giligal. Da-kore déem maa zege jei sem konto ne. Dɛ dedwe o de Wɛ sampwori kɔgɔ kom ma jeeri daane se ba zamese. O ma ta de o tontoŋeno wom o we, “Kwei kambi-zaŋa n teini mini ne n saŋe dwoa n pa nɔɔna bam.”

39Ba kɔgɔ kom wo nɔɔno dedoa ma zo gaao se o gwoni dwo-vɔɔro. O ma na kunkwol-chɛɛra o pɛ o su o gɔrɔ ni o jwoori. O ma gwoni te maama o woli dwoa balo na wo kambia kam wone to, ye o wo lɔre te na ye wonnu telo. 40Ba laam ma kwei dwoa bam ba maŋe ba pa daane. Nɔɔna bam na yɔɔre ba laŋe wodiu kom to, ba ma laare ba we, “Keitaa! Dé tu, Baŋa Wɛ tontoŋeno, chɔŋɔ mo ba ke wodiu kom wone!” Ba maa wo ware-ko ba di.

41Elisa ma ta o we, ba ja muni ba ba ba pa‑o. O ma kwei-de o ke kambia kam wone ye o we, “Jwoori n ke wodiu kom n pa nɔɔna bam se ba di.” Ba ma seene ba di ye ko daa wo bwei-ba.

42Dɛ dedwe mo nɔɔno wodwoŋi zege Baal-Salisa ne o ja o wodiiru telo na lwoori yiga te ke to o ba o pa Wɛ tontoŋeno Elisa. Bworobwooru finlei, de men-zwaro telo o na ke ywolo wone to mo konto. Elisa ma ta de o tontoŋeno wom o we, “Kwei n pa nɔɔna bam se ba di.” 43Tontoŋeno wom ma leiri o we, “Ba ye nɔɔna bi mo. Wodiu konto wó wane ko yi-ba na?” Elisa ma jwoori o ta o we, “Kwei n pa-ba se ba di. Kokuri to Baŋa Wɛ mo taga o we, ba wó di ba su ba daare.” 44Tontoŋeno wom déem ma seene o kwei wodiu kom o pa-ba pa ba di ba daare, ne Baŋa Wɛ na maŋe o ta tei to.#Matiyu 14:16-20

Currently Selected:

2 Pwa 4: KBG

Highlight

Copy

Compare