2 Pwa 24

1Maŋa kalo Jehoyakim déem na di paare to mo Babilon teo pɛ Nebukadeneza cheiŋi Judah teo maama o tei. Konto ma pa se Jehoyakim maŋe Nebukadeneza dam kuri ne o ke bena yatɔ. Jehoyakim déem ma leiri o boboŋa ye o ve Nebukadeneza ni.#Danyeli 1:1 2Baŋa Wɛ ma pa se jar-keira nwoŋi Babilon, de Siria, de Moaba, de Amon teene dem ba vo ba ke chichuŋu de Judah tiina bam. Baŋa Wɛ déem maŋe o tɔge o sampwori sem baŋa ne o kaane Judah tiina bam we, ba wó na chɔgem konto dwoŋi. 3Lɛɛro telo na seene te yi-ba to mo Baŋa Wɛ pɛ ni se te ke. O boboŋa ma ja se o zeili Judah tiina bam o yiga ne, Pɛ Manasɛ na toŋe wɛleera yalo to ŋwaane. 4Manasɛ déem na ke tei to, o go balo na ye nɔn-ŋona to mo pa se ba jana taare Jerusalem teo kom ni maama. Mo kokuri Baŋa Wɛ ve se o yage o wɛleera o ma chɛ‑o.

5Jehoyakim déem na di paare ye o ke wonnu telo to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone. 6Jehoyakim ma te ye o bu Jehoyachin leiri o yuu ne o di paare.

7Ejipti pɛ wom daa wo sɛ se o nwoŋi o ke jara, kokuri to Babilon teo pɛ mo maŋe o cheiŋi Ejipti teo maama o tei, ko zege Ejipti bu-nɔgɔ kom seeni se ko vo ko yi Yuferata buga kam jei sem maama.

Judah teo Pɛ Jehoyachin taane

8Jehoyachin déem jege bena fuga-nana mo ye o di paare. O ma jeini Jerusalem ne o di paare dem o ke chane setɔ. O nu yere mo Nehusita. O maa ye Elinatan bukɔ ye o nwoŋi Jerusalem to mo. 9Jehoyachin déem toŋe lwarem o chɔge Baŋa Wɛ yiga, ne o kwo wom de na ke tei to mo.

10Jehoyachin paare dim maŋa ne mo Babilon teo pɛ Nebukadeneza toŋe o jar-keira se ba vo ba li Jerusalem teo de jara. Ba ma vo ba kaare teo kom ba pu. 11Pɛ Nebukadeneza tete de ma tɔge o yi da ye o nɔɔna bam ta wora ba ke chichuŋu de teo kom. 12Judah teo pɛ Jehoyachin, de o nu, de o tontoŋena, de o dedɛɛra, de o nakwa bam maama ma sɛ ba pa Babilon pɛ wom. Babilon pɛ wom ma pa ba ja Jehoyachin ba pe.#Jeremia 13:18

Konto déem ke Pɛ Nebukadeneza paare dim bena nana bene dem ne mo. 13O ma vere lonne wonnu telo maama na wo Baŋa Wɛ diga kam ne, de pɛ sɔŋɔ kom ne to o ja o viiri, ne Baŋa Wɛ na wuuri o ta we, ko wó ke tei to.#2 Pwa 20:17; Ezera 1:7; Izaya 39:6 O ma daare o kore sabu-seŋa wonnu telo Isarele teo pɛ Solomon déem na ke o zege Baŋa Wɛ diga kam ne to maama o ja o viiri. 14O ma yɔɔre o kwei Jerusalem nɔn-bia na yi morro fuga to o ja o vo o tete teo. Ko déem ye ba jar-keira bam, de ba dedɛɛra bam, ko woli de balo na ye gwaro de lura to maama mo. Balo na tiini ba ye yiniga tiina to yerane mo o yage teo kom wone.

15Pɛ Nebukadeneza ma ja Jehoyachin, de o nu, de o kaana, de o dedɛɛra, ko woli de Jerusalem teo kom naduna bam maama o vo Babilon.#Ɛseta 2:6; Jeremia 22:24-27; Ezekeli 1:2 16O ta ma ja jar-keira morro terepɛ, de gwaro de lura moro dedoa. Banto maama yei jara keim lanyerane. 17O ma pa Jehoyachin kwo choro Matania leiri o yuu ne o ji pɛ. O ma leiri o yere dem pa se de ye Zedekia.#Ezekeli 17:13

Judah teo Pɛ Zedekia taane

Jeremia 52:1-3

18Zedekia déem jege bena finlei-dedwe mo ye o di paare. O ma jeini Jerusalem ne o di paare dem o ke bena fuga-dedwe. O nu yere mo Hamutali. Wonto maa ye Jeremia wolo na nwoŋi Libina to bukɔ. 19Zedekia déem toŋe lwarem mo o chɔge Baŋa Wɛ yiga, ne Pɛ Jehoyakim de ya na ke tei to.

20Lɛɛro telo maama na ke Jerusalem de Judah tiina bam yera ne to tɔge Baŋa Wɛ ban-zɔŋɔ kom ŋwaane mo. Ko na kweeli tei to, o le o yiga mo ba baŋa ne.

Jerusalem teo na to tei to

Jeremia 52:3-11

Pɛ Zedekia déem ma zaŋe o nwoŋi Babilon teo pɛ Nebukadeneza kwaga ne.

Currently Selected:

2 Pwa 24: KBG

Highlight

Copy

Compare