2 Pwa 25

1Zedekia paare dim bena nogo bene dem chane fuga chana kam wone, ka da fuga dɛ dem ne mo Babilon teo Pɛ Nebukadeneza déem tu o li Jerusalem de o jar-keira bam maama. Ba ma kaare teo kom ba pu ye ba daare ba lɔ taare-kamuna ba yeiri ko kabiri sem yera ne.#Jeremia 39:1-12; Ezekeli 4:1-2; 17:12-15; 24:2 2Ko na yi Zedekia paare dim bena fuga-dedoa bene dem to mo Babilon tiina bam déem wane Jerusalem teo kom ba di.

3Ko na yi bene dem konto chane sena chana kam da nogo dɛ dem to, kana déem tiini ka chɛ mo pa se Jerusalem nɔn-bia bam daa ba jege wodiu se ba di. 4Babilon tiina bam ma yigi teo kom kabiri sem ba de tega ne, ye ba tɔge pwoli sem ne ba zo ko wo. Zedekia de o jar-keira bam maama déem duri se ba lu tete ne mo. Ba ma kwei pɛ gaare chwoŋa kam, ba vo ba tɔge ni dem na wo teo kabiri selei sem tetare ne to, ye ba laam duri ba tu Jɔdan bwolo kom seeni.#Ezekeli 12:12 5De ko de, Babilon tiina jar-keira bam déem pare-ba mo. Ba ma vo ba yi Zedekia se ko maŋe de Jeriko te-kampare sem seeni. O jar-keira bam ma pwɛ da yiga ne, ye ba jage ba daare‑o.

6Ba ma zi Zedekia ba ja ba vo Babilon teo pɛ Nebukadeneza tei. O déem wo Hamafa kateiri dem teo Ribila ne mo. Nebukadeneza ma di taane o vane Zedekia dáane. 7O ma pa ba go Zedekia bia bam, ye o zege da o nia. Ko kwaga ne o pɛ se ba chochɔrege Zedekia yia yam mo ba le, ye ba daare ba kwei channa chegero ba ma ba vɔ‑o ba vaŋe ba ja ba vo Babilon.#Jeremia 21:7

8Nebukadeneza déem na di Babilon teo paare o ke bena fuga-nogo bene delo ne to, chane senu chana kam da yarepɛ dɛ dem ne mo o kwaga-saŋeno Nebuzaradan zo Jerusalem teo kom wone. Wonto maa ye Babilon teo babɛ sem yiga tu. 9O déem ma pa ba zwɛ Baŋa Wɛ diga kam, de pɛ sɔŋɔ kom, de Jerusalem sam dem maama. Ba déem zwɛ sɔ-laao dwi maama mo Jerusalem teo wone. 10Nebuzaradan ma pa ni pa o jar-keira bam yɔɔre ba yigi Jerusalem teo kabiri sem ba de tega ne. 11O ma kale balo ta na daare teo kom wone to, ko ta woli de gwaro ta na daare to, de balo ya na duri ba zo Babilon tiina kɔgɔ kom wone to o ja o vo Babilon.#Jeremia 52:28-30; Obadia 1:11 12Ko nam ná ye teo kom yiniga tiina badaara, Nebuzaradan yage-ba Judah laŋa kam ne mo. O ma pa-ba tega se ba va, de Vini teeni kare, se ba taa nii se baŋa ne.

13Babilon tiina bam ma zo Baŋa Wɛ diga kam ba bwori channa zela yam maama. Yanto maa ye ywoa yalei yam, de ware-zon-zɔŋɔ kolo ba na bwoi we ‘Naneo kom’ to, de ware-zwe zegem torokooro tem. Ba ma daare ba kwei te channa kam ba zeŋe ba ja ba vo Babilon. 14Ba ta ma kwei zwe selo ba na wó taa mae ba pɛ tentwarem to, de sɛbullu, de wonnu telo na wó fɔge te kwɛ mini dem to, de zwe selo ba na zwɛ talwoŋ-ywoŋa se wone to, de channa wonnu telo maama na jege te fɔge Wɛ diga chullu tem to. 15Nebuzaradan ta ma pa ba kwei Wɛ diga zela yalo maama ba na mɛ sabu-seŋa, naa lu-nyenno ba ke-ya to. Tento maa ye min-chala zwe, de zwe selo ba na wó taa mae ba zezage na bimbini dem baŋa ne to mo. Ba ma kwei wonnu tem konto sabu-seŋa kam de te lu-nyenno tem ba ja ba viiri.

16Ko ná ye ywoa yalei yam, de ware-zon-zɔŋɔ kom, dedaane ware-zwe zegem torokooro tem, Pɛ Solomon déem ya pɛ ba mɔ wonnu tem konto maama Baŋa Wɛ diga chullu tem ŋwaane mo. Te yera channa kam déem tiini ka duna ka dwoi se ba maŋe. 17Ywoa yalei yam dedoa wɛ-baŋa seeni dedɔrem déem ye jatwogo de noa ni maŋem kuni fuga-nana mo. Ywei maama yuu ne ba meeli channa wo-sugili mo da se de wane de teili diga kam yuu kom seeni. Wo-sugila yam dedoa maama dedɔrem maa ye jatwogo de noa ni maŋem kuni betɔ. Ba mɛ channa mo ba sɔ ba lɛɛne daane ba ke da, ye ba gɔgere Pomegara tio-bia ba kaare wo-sugila yam. Ywoa yalei yam wo-sugila maama ye bedwe mo.

18Nebuzaradan déem ta jaane Wɛ kaanem nakwe tu Seraya, de o kwaga-saŋeno Zefania, de Wɛ diga kam ni-yerena batɔ bam mo o ja o viiri. 19Ko ná ye balo ya ta na daare Jerusalem teo kom wone to, o ma kale ba jar-keira yiga tu wom, de nɔɔna banu balo ya na bwola de pɛ wom to, de dedɛɛro wolo na le nɔɔna se o woli-ba jar-keira kɔgɔ kom wone to, de nɔɔna fuseredo balo ta na wora to o woli da o ja o viiri. 20Nebuzaradan déem jaane banto maama mo o vo Babilon teo pɛ wom tei. O déem wo Hamafa kateiri dem teo Ribila ne mo. 21Dáane mo Babilon teo pɛ déem pɛ se ba go nɔɔna bam konto maama. Ko déem ke konto mo ye ba kale Judah dwi tiina bam ba ja ba vo sa-teo yiga yiga.

Gedalia tei Judah o pa Babilon tiina

22Pɛ Nebukadeneza ma le Ahikam bu Gedalia se o taa nii balo ta na daare Judah laŋa kam ne to. Wonto déem maa ye Safan naa. 23Judah teo jar-keira bam de ba yiga tiina na nigi we pɛ wom le Gedalia mo se o taa ye ba teo kom yuu tu to, ba déem ma vo Gedalia tei Mizipa ne. Yiga tiina bam yera mo tento: Netania bu Isameli, de Karea bia Johanan, de Jonatan, de Netofa tu Tanhumefa bu Seraya, de Maaka tu Jazania. 24Gedalia ma ke baare ba kuri ne ye o du duuri o ta de-ba o we, “Yé ta‑á kɔre-na foone de Babilon dedɛɛra bam. Maŋe-na ywo dé teo kom ne, se á sɛ á pa Babilon teo pɛ, se á ŋwea ke lanyerane ka pa abam.”

25Bene dem konto chane serepɛ chana kam wone, mo Netania bu Isameli na ye Elisama naa to déem tɔge de nɔɔna fuga pa ba vo Mizipa. Wonto déem ye pa-diga kam wo nɔɔno mo. O de o nɔɔna bam ma vo ba go Gedalia, de nɔɔna balo na wo o tei ne to, ko ná maŋe ko ye Judah tiina de Babilon tiina de. 26Keim dem konto baŋa ne nɔɔna maama ma duri ba vo Ejipti teo, ko ná ye nabwona bam, de dedɛɛra bam, ko woli de jar-keira yiga tiina bam maama de, ba na kɔre Babilon tiina bam to ŋwaane.#Jeremia 43:5-7

Ba na yage Jehoyachin tei to

27Ba déem na kale Judah teo Pɛ Jehoyachin ba ja ba vo Babilon ye o ke bena fintɔ-yarepɛ Babilon ne to, bene dem konto chane fuga-selei chana kam da finlei-yarepɛ dɛ dem ne mo Babilon teo Pɛ Evil-Merodaki ke Pɛ Jehoyachin zaane, ye o pore‑o peena diga ne o yage. Ko maa ye bene delo Evil-Merodaki na bobo o di Babilon teo paare to mo konto. 28O ma ke Pɛ Jehoyachin lanyerane, ye o pa‑o jeiŋa jei na tiini ka jege zula ka dwoi jei selo pwa badwonna bam na wo Babilon ne na nɛ to. 29Jehoyachin ma lɔɔre o peena diga gwaaro tem o tiŋi. Dɛ maama wone o ma lɛɛre o di wodiu Babilon teo pɛ tei ne. 30Babilon teo pɛ ta ma kwei kolo maama Jehoyachin na wó ke o yera ne to o pa‑o dɛ maama, se ko vo ko yi o toone maŋa.

Currently Selected:

2 Pwa 25: KBG

Highlight

Copy

Compare