2 Pwa 23

Pɛ Josia tu o kwɛ ni-sɛɛm dem

1Pɛ Josia déem ma pa ni se Jerusalem de Judah teene maama nakwa bam la daane o yiga ne. 2O ma ja Judah tiina bam maama de Jerusalem nɔn-bia bam maama, ko woli de Wɛ sampwori sem de Wɛ kaanem tiina bam o vo o zo Wɛ diga kam wone. Ko maa ye nɔɔna bam maama, nabwona de naduna de mo. Pɛ wom ma zege ba yiga ne o ga Wɛ nia tɔnɔ kolo ba déem na nɛ Baŋa Wɛ diga kam ne to o bere-ba.#Nia Gulim 17:18; Nehemia 8:1 3Pɛ wom ma zege Wɛ diga kam ywei dem teiŋa ne o fɔge o gwoni ni de Baŋa Wɛ we, o wó kwei o wo maama o jwoori o tɔge Baŋa Wɛ, ye o sɛ o nia yam, de o bera yam, de o chullu tem maama, ne ko na popone Wɛ nia tɔnɔ kom wone tei to. Nɔn-kɔgɔ kom maama de ma tɔge ba sɛ Josia ni-gwonim dem.#2 Pwa 11:14

4Pɛ Josia ma ta de Wɛ kaanem nakwe tu Hilikia, de balo na saŋe o kwaga to, de Wɛ diga kam ni-yerena bam se ba zo Baŋa Wɛ diga kam wone ba kwei zela yalo ba na mae ba zuli Baal de Asera jwona yam to, de yalo ba na mae ba zuli chalechwe sem to ba ja ba nwoŋi. Josia ma ja wonnu tento maama o nwoŋi Jerusalem teo kom wone o vo o zwɛ-te Kidoron bwolo kom jei sem ne. Ba ma daare ba ja te tentwarem ba ja ba vo Bɛtel.

5Josia ma le kaanem tiina balo Judah pwa bam déem na kuri se ba taa kaane jwona Judah teene dem de Jerusalem nawuura yam wara-jei sem ne to o yage. Kaanem tiina bam konto déem mo yeini ba ke zwɛɛm kaanem ba pa Baal jwoni dem, de wea kam, de chana kam, de chalechwe sem maama. 6Josia ta ma kwei Asera nyenyego daa kam Wɛ diga kam wone o ja o vo Kidoron bwolo kom o zwɛ ka maama. O ma pɛ ka tentwarem dem o cho ywale-ywale o daare o dole-de o yage teo kom nɔn-bia yibeela jei sem ne. 7O ta ma chɔge di selo na wo Baŋa Wɛ wara-jei sem ne ye baara balo na toŋe kabwoŋa totoŋa zoore da to. Ko maa ye dáane mo kaana badwonna sɔ gwaaro telo ba na mae ba zuli Asera jwoni dem to. 8O déem ma ja kaanem tiina balo maama na zoore Judah teene dem ne ye ba kaane jwona yam to o jwoori Jerusalem. Ba wara-jei bimbina yalo maama na zege Geba ne, se ko vo ko yi Beeriseba to, o pɛ se ya ji kafɛ mo. Ko ta ná ye bimbina yalo na wo teo kom manchwo-peena ni ne ye ba ke kaanem ba pa chichiri da to, Josia chɔge ya maama mo o yage. Bimbina yam konto déem wo teo kom ni dem jagwia seeni mo. Ba mɛ teo dedɛɛro Josua yere mo ba bwoi ni dem konto. 9De ko maama de, ba déem wo pɛ kaanem tiina bam konto chwoŋa se ba da ba toŋe Baŋa Wɛ bimbini dem totoŋa Jerusalem ne. Ba nam pɛ-ba chwoŋa se ba da de ba dwonna kaanem tiina bam mo ba di bworobworo kolo ba na wo ke sabɔle ko wone to. 10Josia ta ma chɔge Tofete bimbini dem na wo Ben-Hinom bwolo kom ne to, se nɔɔn-nɔɔno daa yé wane o ja o bakeira naa o bukɔ o ma o ke zwɛɛm kaanem o pa Moleka jwoni dem.#2 Pwa 21:6 11O ma ja sisei nyenyero telo Judah pwa badwonna ya na tɔge te baŋa ba zuli wea kam to o chɔge o yage. O ta ma zwɛ sisei torokooro tem de. Tento maama déem zege Baŋa Wɛ diga kam ni seeni, konkɔlɔ kodwoŋi ne mɛ teo kom dedɛɛro Natan-Mɛlɛka na zoore to mo.

12Ko ta ná ye jwona kaanem bimbina yalo Judah pwa badwonna na lɔge ba zege Ahaz nayuu kom ne to, ko woli de yalo Pɛ Manasɛ na lɔge Baŋa Wɛ diga kam konkwallo telei tem ne to, Josia ma chɔge-ya o yage. O déem vaare ya maama o de tega ne mo, o daare o chochoge-ya o pɛ o lwo o yage Kidoron nabara kam ne. 13Josia ta ma chɔge jwona kaanem bimbina yalo na wo Jerusalem wɛ-puli seeni ye ya maŋe de ‘Chɔgem Peo’#23:13 ‘Wonnu Chɔgem Peo’ zege ko pae Olivi Peo kom. tega-kuri seeni to o yage. Isarele teo pɛ Solomon déem mo lɔge bimbina yanto o zege. O déem lɔge-ya o pa Asetare wo-zɔɔne delo Sidon tiina na zuli to, de Chemosi wo-zɔɔne delo Moaba tiina na zuli to, ko woli de Moleka wo-zɔɔne delo Amon tiina na zuli to mo. 14Josia déem bwori kandwa yalo ba na chwi ba jwona yam ŋwaane to mo muga-muga, o daare o gwoni Asera nyenyego dɛ sem o de tega ne. O laam ma kwei nabiina kwi o lwo o faare jeiga kam.

15Josia déem ta ma bwori jwoni bimbini delo na wo Bɛtel ne to o yage. Ko ye Nebat bu Jeroboam déem mo lɔge-de o zege pa Isarele tiina de tɔge ded‑o ba toŋe lwarem. Josia yɔɔre o chɔge bimbini dem de wara-jei sem konto maama mo. O ma zwɛ-te o daare o cho te tentwarem ywale-ywale. O ta ma zwɛ Asera nyenyego daa kam de o woli da.#Amosi 3:14 16Josia ma kaare o nii o na yibeela yadwonna na wo zwoŋo kom baŋa ne to. O ma pa ba le twa bam kwi ba zwɛ-se bimbini dem baŋa ne ba ma ba chɔge-de. O keim dem konto mo pɛ se Wɛ tontoŋeno wom ya na wuuri o ta Baŋa Wɛ kwora tei to seene ko ji chega. Ba déem na di kuri ye Pɛ Jeroboam zege bimbini dem teiŋa ne to mo Wɛ tontoŋeno wom tage konto.#1 Pwa 13:2

Josia laam ma pipiri o tole o na faŋa faŋa Wɛ tontoŋeno wom yibeeli. 17O ma bwei o we, “Wɔ yibeeli mo tento?” Bɛtel nɔɔna bam ma leiri ba we, “Ko ye mɛ ba na suli Wɛ tontoŋeno wolo déem na nwoŋi Judah ye o ta faŋa faŋa we kolo wó ke bimbini dento Bɛtel ne, ne nmo zem na yɔɔre n ke-de tei to mo.” 18Josia ma leiri o we, “Nam yage-na yibeeli dento se de taa wora. Nɔɔn-nɔɔno yé guri o kwi sem.” Ba ma seene ba yage wonto de Wɛ sampwora kalo ya na nwoŋi Samaria to kwi sem.#1 Pwa 13:11-32

19Ko daare, ko ná ye wara-jei selo Isarele tiina pwa badwonna ya na lɔge Samaria teene dem ne pa ba chuchugi Baŋa Wɛ bane to, Josia déem chɔge se bimbina yam maama o yage mo, ne o na maŋe o ke tei Bɛtel ne to. 20Josia ta ma go kaanem tiina balo maama ya na kaane jwona jei sem konto ne to bimbina yam baŋa ne. O ma daare o zwɛ nabiina kwi ya baŋa ne. Konto na ti to, o ma jwoori Jerusalem.

Atɔgebabaŋa kuri dem

2 Tigisim 35:1-19

21Pɛ Josia déem ma pa Judah tiina bam maama ni se ba di Atɔgebabaŋa kuri dem ba ma zuli ba Tu Baŋa Wɛ, ne ko na popone Wɛ nia tɔnɔ kom wone tei to. 22Ba wo fɔge ba di kuri dento dwoŋi ko zege maŋa kalo ne yiga tiina na tei Isarele de Judah tiina bam ye ba ta wo tiŋi pɛ to. 23Josia paare dim bena fuga-nana bene dem ne mo ba laam jwoori ba di Atɔgebabaŋa kuri dem Jerusalem ne se ba ma ba zuli Baŋa Wɛ.

Pɛ Josia totoŋa yadwonna

24Josia déem kwaane o kwɛ teo kom se ko tɔge nia yalo maama na popone tɔnɔ kolo wone Wɛ kaanem tu Hilikia na nɛ Baŋa Wɛ diga kam ne to mo. O ma le chichiri vora, de yi-nara, de wa-yɔɔro, de jwona, de wo-zɔɔna maama pa se ya daa tere Jerusalem de Judah teene dem maama ne. 25Pwa balo maama déem na lwoori Josia yiga ba di paare to, de balo maama na saŋe o kwaga to wone, pɛ tera o na kwaane ne wonto tei. Josia déem zuli Baŋa Wɛ de o bochare maama, de o boboŋa maama, ko woli de o dam maama, ye o yɔɔre o tɔge Moses nia yam na bere tei to.

26De konto maama de, Baŋa Wɛ bane déem ta zaŋe mo de Judah tiina bam, Pɛ Manasɛ na tiini o toŋe o chaare ye o chuchugi Wɛ bane to ŋwaane. 27Baŋa Wɛ ma ta o we, “Amo lage a zeili Judah tiina bam a yiga ne mo, ne a na maŋe a ke Isarele tiina bam tei to. Ko ta ná ye Jerusalem teo kolo a na kuri a pa a tete to, amo wó ve-ko, ye a daare a ve amo diga kalo a na tage ka taane we, ka zege a yere dem zula ŋwaane to.”

Josia na tege jara wone tei to

2 Tigisim 35:20-27

28Josia déem na di paare ye o ke wonnu telo to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone.

29Maŋa kalo Josia déem na ye pɛ to, mo Ejipti teo Pa-faro Neko zaŋe de o jar-keira bam o vo Yuferata buga kam seeni se o woli Asiria pɛ wom. Josia de ma nwoŋi se o jeeri Pa-faro Neko de jara se o che o yiga. Pɛ Neko ma jeeri‑o Megido ne o go‑o.#2 Tigisim 35:20-24 30Josia tontoŋena bam ma kwei o yera yam ba ke toroko ne ba ja ba jwoori Jerusalem. Ba ma suli‑o o tete yibeeli dem ne. Judah tiina bam ma kuri Josia bu Jehohaza ba tiŋi‑o paare se o leiri o kwo wom yuu ne.

Judah teo Pɛ Jehohaza taane

31Jehohaza déem jege bena finlei-yatɔ mo ye o di paare dem. O ma jeini Jerusalem ne o di paare dem o ke chane setɔ. O nu yere mo Hamutal. Wonto maa ye Jeremia wolo na nwoŋi Libina to bukɔ.#Jeremia 22:10-12 32Jehohaza déem toŋe lwarem o chɔge Baŋa Wɛ yiga, ne o nabaara de na ke tei to mo. 33Pa-faro Neko déem ma ja Jehohaza o vo Ribila o ke o peena diga ne, se o daa yé na chwoŋa o di paare Jerusalem ne. Teo kom konto wo Hamafa kateiri dem ne mo. O ma daare o fe Judah tiina se ba ŋwe lampwoo na ye lu-nyenno kilo morro tetɔ de bia yana (3,400), ko woli de sabu-seŋa kilo fintɔ-tena (34) to. 34Pɛ Neko ma kwei Josia bu Eliakim o tiŋi‑o paare se o leiri o kwo yuu ne. O ma leiri Eliakim yere dem pa de ye Jehoyakim. O ma daare o ja Jehohaza o vo o yage Ejipti ne. Ko ye dáane mo Jehohaza tega. 35Jehoyakim déem ma pa Judah tiina bam ŋwe lampwoo ba pa‑o se ko maŋe de ba dedoa dedoa tega kam na mae tei to. O ma jwoŋi lampwoo kom konto o ŋwe Pɛ Neko na bwei‑o sabu kolo to.

Judah teo Pɛ Jehoyakim taane

36Jehoyakim déem jege bena finlei-yanu mo ye o di paare. O ma jeini Jerusalem ne o di paare dem o ke bena fuga-dedwe. O nu yere mo Zebida na ye Pedaya wolo na nwoŋi Ruma to bukɔ. 37O de déem toŋe lwarem o chɔge Baŋa Wɛ yiga, ne o nabaara bam ya na ke tei to mo.

Currently Selected:

2 Pwa 23: KBG

Highlight

Copy

Compare