2 Pwa 22

Judah teo Pɛ Josia taane

1Josia déem jege bena nana mo ye o di paare dem. O ma jeini Jerusalem ne o di paare dem o ke bena fintɔ-dedwe. O nu yere mo Jedida wolo na ye Adaya bukɔ ye o nwoŋi Bozekafa to. 2Josia totoŋa déem su Baŋa Wɛ yi lanyerane. O yɔɔre o kwei chwei selo o nabaaro David déem na tɔge to mo, ye o wo ywori se wone.#2 Tigisim 34:3-7

3Pɛ Josia paare dim bena fuga-nana bene dem ne mo o toŋe Azalia bu Safan na ye Mesulam naa to se o vo Baŋa Wɛ wara-jei sem ne. Safan déem ye pɛ sɔŋɔ tɔn-poponno mo. Josia ma ta de Safan o we, 4“Zaŋe n vo kaanem nakwe tu Hilikia tei n ta ded‑o se o jeeli sabu kolo Wɛ diga ni-yerena bam na jwoŋi nɔɔna bam tei ne ba tiŋi to ni.#2 Pwa 12:4 5O laam wó kwei-ko o pa balo na nii Baŋa Wɛ diga kam kwɛɛm totoŋa baŋa ne to se banto jwoŋi ba ma ŋwe tontoŋena balo na wora ba fɔge ba kwɛ diga kam to. 6Tontoŋena bam konto maa ye gwaro, de lɔra, de kandwa-cherena mo. Ba jege se ba ma sabu kom ba yeigi dɛ, de kandwa yalo ba na yare peo yera ne to se ba ma ba fɔge ba kwɛ Wɛ diga kam. 7Ko ná ye balo ba na wó pa-ba sabu kom to, ko dae se ba jeeli sabu kom ba bere jaja, banto na yɔɔre ba toŋe de chega to ŋwaane.”

Hilikia nɛ Wɛ nia tɔnɔ kom

8Safan na pɛ Hilikia pɛ kwora kam to, mo Hilikia tage ded‑o o we, “Wɛ nia tɔnɔ kom mo tento a na nɛa Baŋa Wɛ diga kam wone.” O ma kwei-ko o pa‑o. Safan ma jwoŋi o ga. 9O ma jwoori o vo ta de pɛ Josia o we, “Pɛ, nmo dedɛɛra bam kwei sabu kolo ya na tigi Wɛ diga kam ne to ba pa balo na nii Baŋa Wɛ diga kam kwɛɛm totoŋa baŋa ne to.” 10Safan ta ma ta de pɛ wom o we, “Kaanem tu Hilikia mo kwei tɔnɔ konto o pa-ne.” O ma ga tɔnɔ kom o bere pɛ wom.

11Pɛ Josia na nigi Wɛ nia tɔnɔ kom seina to mo o wo chɔge dedɛ.#Nehemia 8:9 O ma ja o gwaaro o kaare. 12O ma daare o ta de kaanem tu Hilikia, de Safan bu Ahikam, de Mikaya bu Akebora, de o tɔn-poponno Safan, ko woli de Asaya na ye pɛ wom yera tontoŋeno to o we, 13“Véi-na Wɛ diga kam á lwoori Baŋa Wɛ kolo na popone tɔnɔ konto wone to ŋwaane, se dé wane dé lɔre o boboŋa. Ke-na konto á pa amo, de Judah tiina bam maama. Baŋa Wɛ bane mo yɔɔre de wiira debam baŋa ne, bɛŋwaane dé nabaara bam wo toŋe ba tɔge nia yalo na popone debam ŋwaane tɔnɔ konto wone to.”

14Hilikia, de Ahikam, de Akebora, de Safan, ko woli de Asaya maama ma zaŋe ba vo Jerusalem jei-doŋa laŋa kam ne se ba na de Wɛ sampwori-kana kalo yere na ye Hulida to. O maa ye Tikiva bu Salum kaane mo. Tikiva de déem ye Hahase wolo na nii pɛ wom gwaaro baŋa ne to bu mo. Nɔɔna bam ma ŋɔɔne de Hulida. 15O de ma leiri-ba o we, “Baŋa Wɛ wom na ye Isarele tiina Wɛ to kwora mo tento: Véi-na a ta de nɔɔno wolo na toŋe abam amo tei ne to we, 16‘Baŋa Wɛ kwora mo tento: Amo wó pa se lɛɛro yi n teo kom de ko nɔn-bia bam maama, se ko maŋe de kolo maama na popone tɔnɔ konto wone ye Judah teo pɛ wom ga to. 17Kokuri to, Judah tiina bam ve amo mo ye ba daare ba kaane wa-yɔɔro. Ba ma chuchugi a bane de ba jea na ke jwona yalo to. Konto ŋwaane a ban-lom dem wó to teo konto baŋa ne. De nam bá fɔge de zuri maŋa de maŋa 18Ko nam ná ye Judah pɛ wom tete na toŋe abam amo tei ne se á lɔre Baŋa Wɛ boboŋa to, Baŋa Wɛ wom na ye Isarele tiina Wɛ to na tage kolo ded‑o to mo tento: Ko ná ye taane delo na wo tɔnɔ kom wone ye n ni-de to, 19amo nɛ nmo wo na chɔge ye n gwooni n tete amo yiga ne de n na nigi we a bane zaŋe teo konto de ko nɔɔna bam baŋa ne to. N ta ma maane we, sɔla mo wo teo kom baŋa ne ye ko wó to ko saare. Nmo nam na kaare n gwaaro ye n keeri amo yiga ne to ŋwaane, amo nigi nmo lworo kom. 20Mo kokuri amo wó pa‑m chwoŋa se n te n tete toone, se n yé na lɛɛro telo a na wó pa te yi teo konto to.’ ”

Tontoŋena bam ma ja Wɛ sampwori-kana kam kwora ba jwoori ba vo ba pa Pɛ Josia.

Currently Selected:

2 Pwa 22: KBG

Highlight

Copy

Compare