2 Pwa 21

Judah teo Pɛ Manasɛ taane

1Manasɛ déem jege bena fuga-yalei mo ye o di paare dem. O ma jeini Jerusalem ne o di paare o ke bena finnu-yanu. O nu yere mo Hefiziba. 2Manasɛ déem toŋe lwarem o chɔge Baŋa Wɛ yiga de o na lwoni totoŋ-zɔɔna yalo dwi-gɛ tiina na yeini ba ke ye Wɛ zeili-ba tega kam ne o daare o pa Isarele tiina bam jeini to. 3O jwoori o lɔ jwona kaanem jei selo o kwo Hezekia déem na chochoge o yage to mo o zege. O ma lɔ bimbina o zege Baal jwoni zula ŋwaane o daare o chwi Asera nyenyego daa nenɛɛne Isarele teo pɛ Ahab déem na ke tei to. O ma tiiri o zuli chalechwe sem de. 4O déem ta lɔge jwona kaanem bimbina mo o zege Baŋa Wɛ diga kam ne. Baŋa Wɛ ya tage jeiga kam konto taane mo we, “Jerusalem ye teo kolo wone nɔɔna na wó taa zuli a yere da to mo.” 5O ta lɔge bimbina mo Baŋa Wɛ diga kam konkwallo telei tem wone se nɔɔna taa mae ba zuli chalechwe sem. 6O ma ja o tete bu o zwɛ mini wone o ma o ke kaanem.#2 Pwa 23:10 O ma ke vora, de yi-nara totoŋa, o ta tɔge chichiri vora, de liri-mwa tiina kwaga. O déem tiini o toŋe lwarem o chɔge Baŋa Wɛ yiga pa se Baŋa Wɛ bane zaŋe ded‑o.

7Manasɛ déem pɛ ba sare Asera nyenyego daa mo ye o kwei-ka o zege Baŋa Wɛ wara-jei sem ne o jege o kaana.#Nia Gulim 16:21 Baŋa Wɛ déem taga jei sem konto taane de David, de o bu Solomon o we, “Diga kanto na zege Jerusalem ne to mo ye jeiga kalo amo na kuri Isarele dwia yam maama wone se nɔɔna taa zuli amo yere da se ko taa vei wuu. 8Isarele tiina bam ná yɔɔre ba tɔge bera yalo a na pɛ-ba to, ye ba sɛ nia yalo a na tɔge Moses baŋa a pa-ba to maama, amo bá pa chwoŋa se nɔɔna zeili-ba se ba nwoŋi da tega kalo amo na pɛ ba nabaara bam to.” 9Judah dwi tiina bam nam wo sɛ Baŋa Wɛ ni dem. Manasɛ ma ja-ba o vo o de tusim wone. Ba ma tiini ba toŋe lwarem se ko dwoni lwarem delo dwi-gɛ tiina na yeini ba ke ye Wɛ chɔge-ba o daare o kwei ba tega kam o pa Isarele tiina bam to.#Jeremia 15:4

10 Baŋa Wɛ ma tɔge o sampwori sem baŋa o ta o we, 11“Judah pɛ Manasɛ tiini o toŋe totoŋ-zɔɔna ko ja gaale. O ma toŋe lwarem se ko dwoni Amori tiina balo déem na maŋe ba wora ye Isarele tiina bam laam ba to na ke tei to.#1 Pwa 21:24 O ma pa se Judah tiina bam de tusi de ba na tɔge ba kaane o jwona yam to. 12Konto ŋwaane Baŋa Wɛ wom na ye Isarele tiina Wɛ to taga tento mo we, ‘Amo wó pa se lɛɛro yi Jerusalem teo nɔn-bia bam de Judah tiina bam maama se ko ke balo na wó ni ko ŋwa to yaau. 13Amo wó waare Jerusalem tiina bam se ko maŋe de a déem na ke tei de Samaria tiina bam de ba pɛ Ahab dwi dem to. Amo wó saare Jerusalem tiina bam a yage, ne ba na zare zoŋa ba guguni ka wo ye ba pipiri ka ni ba pu tega ne tei to mo.#2 Tigisim 33:11-13 14Amo nam ta wó ve a nɔɔna balo ta na daare to ye a kwei-ba a ke ba dona jeŋa ne se ba di-ba ba daare ba vere ba jejegero. 15Amo wó ke konto bɛŋwaane ba tiini ba toŋe lwarem ba chɔge a yiga ye ba chuchugi a bane. Ko zege maŋa kalo ba nabaara bam na nwoŋi Ejipti teo ne to ba maŋe ba ke konto mo se ko ba ko yi zem.’ ”

16Manasɛ déem ta pɛ se nɔn-laaro dedɛ ga ba ŋwea pa se ba jana taare Jerusalem teo kom ni maama. O ke lwarem dem konto mo o woli de o ya na maŋe o ke tei o pa Judah tiina bam tusi ba chɔge Baŋa Wɛ yiga to.

17Manasɛ déem na di paare ye o ke wonnu telo to, de o totoŋa yam maama, ko woli de o na ke wɛleera yalo to, ba popone-te ba tiŋi Judah Teo Pwa Seina tɔnɔ kom wone. 18Manasɛ ma te ye o vo o kwoa tei. Ba ma kwei‑o ba suli o sɔŋɔ kaduga kam ne. Ko déem ye Yuza kaduga mo. O bu Amon ma leiri o yuu ne o ji pɛ.

Judah teo Pɛ Amon taane

19Amon déem jege bena finlei-yalei mo ye o di paare. O ma jeini Jerusalem ne o di paare dem o ke bena yalei. O nu yere mo Mesulemef wolo na ye Haruzi bukɔ ye o nwoŋi Jotiba to. 20Amon déem toŋe lwarem o chɔge Baŋa Wɛ yiga mo ne o kwo Manasɛ na ke tei to. 21O kwo totoŋ-naga kam mo o yɔɔre o kwei. O déem kaane jwona yalo o kwo déem na kaane to ye o tiiri o zuli-ya mo. 22Amon mɛ o kwaga mo o ya Baŋa Wɛ wom o nabaara na zuli to. O ma ve se o tɔge Baŋa Wɛ chwoŋa kam.

23Amon tete tontoŋena bam ma lɔ o kwaga ne ba ke ni daane ye ba go‑o pɛ sɔŋɔ kom ne. 24Judah teo nɔn-bia bam de ma zaŋe ba go balo maama na lɔge Amon kwaga ne to. Ba ma tiŋi Amon bu Josia pa o leiri Amon yuu ne o di paare.

25Amon déem na di paare ye o ke wonnu telo to, ba popone-te ba tiŋi Judah Teo Pwa Seina tɔnɔ kom wone. 26Ba ma kwei Amon yera yam ba suli o yibeeli ne Yuza kaduga kam ne. O bu Josia ma leiri o yuu ne o di paare dem.

Currently Selected:

2 Pwa 21: KBG

Highlight

Copy

Compare