2 Pwa 19

Hezekia lwoori wolim Baŋa Wɛ tei ne

Izaya 37:1-7

1Pɛ Hezekia déem na nigi kwora kam to, o wo ma tiini ko chɔge ye o kaare o gwaaro. O ma daare o kwei gare-nyenyaaro o zo ye o vo o zo Baŋa Wɛ diga kam. 2O ma toŋe Eliakim na nii pɛ sɔŋɔ kom totoŋa baŋa ne to, de Sebena na ye tɔn-poponno to, dedaane Wɛ kaanem yiga tiina bam se ba zo gare-nyenyaaro ba vo Amozi bu Izaya na ye Wɛ sampwora to tei.#Izaya 22:15-24 3Ba ma vo ba ta ded‑o ba we, “Hezekia na tage tei to mo tento: Dé zem jege lɛɛro de chaveera mo dé di. Ko tiini ko ye kuri-nɔrɔ mo de yera ne. Dé nye de kaane na virigi puga se o lo ye dam tere o yera ne se o lo bu wom to mo. 4Asiria teo pɛ wom mo toŋe o dedɛɛra yiga tu se o ba o twe Ŋwea Tu Baŋa Wɛ. Dɛ delo tento nmo Tu Baŋa Wɛ nigi toro tem konto maama, ye o nam wó bwɛ dedɛɛro wom de o ta-balɔrɔ kom. Nam lwoori Wɛ n pa debam balo fee na daare de maŋe teo kom ne to.”

5Hezekia tontoŋena bam na pɛ Izaya kwora kam ba ti to, 6mo Izaya de kwei kwora o pa-ba o we, “Jwoori-na á vo á ta de Pɛ Hezekia we, ‘Baŋa Wɛ na tage tei to mo tento: Yé ta‑n kɔre foone de taane delo Asiria pɛ na tɔge o tontoŋena bam baŋa ne o ma o twe-ne to. 7Nii mo. Amo Baŋa Wɛ wó pa se Asiria pɛ wom boboŋa vugimi pa se o ni sawea ye o da ka ŋwaane o jwoori o tete teo. Dáane mo ba wó zɔ‑o de se-zɔɔ ba go.’ ”

Asiria pɛ Senakeribi chichuŋu belei tu

8Asiria teo dedɛɛra yiga tu wom déem nigi we ba pɛ wom yage Lakisi teo ye o vo se o kwaare jara de Libina teo tiina. O de ma kɛ o vo dáane. 9Maŋa kam konto ne de, Asiria teo Pɛ Senakeribi ta nigi kwora we Tirahaka na ye Kusi teo pɛ to mo beene se o jeeri‑o de jara. O ma toŋe nɔɔna Hezekia tei ne de kwora kanto o we:

10“Ta-na de Judah teo pɛ Hezekia we, ‘Yé pa wɛ delo n na pɛ-de chega to taa jege‑m de gane we, Jerusalem teo bá fɔge ko zo Asiria teo pɛ jeŋa ne. 11Nmo maŋe n ni Asiria teo pwa bam na toŋe tei de logo baŋa teene maama to. Ba yɔɔre ba chɔge de maama mo. Nmo nam boŋe tetɛ mo ye n teene se n lu? 12Teene dedwonna dem jwona wane-de ya jwoŋi ya yage amo nabaara bam jeŋa ne na? A nabaara bam nam chɔge Gozan, de Haran, de Rezefe, de Eden tiina balo déem na zoore Telasara ne to ba ti. 13Ko ta ná ye Hamafa, de Arapade, de Sefavayim, de Hena, de Ivaa, teene dento pwa bam de wora na?’ ”

Hezekia wɛ-lworo kom

14Hezekia ma jwoŋi tɔnɔ kom Asiria teo pɛ tontoŋena bam tei ne, ye o ga-ko. O ma ja-ko o zo Baŋa Wɛ diga kam wone o kwei o jare Baŋa Wɛ yiga ne. 15Hezekia ma lwoori Baŋa Wɛ ye o we, “Baŋa Wɛ wom na ye Isarele tiina Wɛ to, nmo paare di cherubi sem tetare laŋa ne mo.#Nwoŋim 25:22 Nmo yerane mo ye Wɛ, ye n tei tega baŋa paare dim jei maama. Nmo nam mo naane wɛyuu de tega baŋa. 16Baŋa Wɛ, nam pore n zwa se n cheigi! Ta puri n yia se n nii n na kolo na ke debam to. Cheigi ta-kwogila yalo Senakeribi na toŋe o ma o twe nmo Ŋwea Tu Baŋa Wɛ to. 17Baŋa Wɛ, ko ye chega mo we Asiria teo pwa déem seene ba chɔge teene de de nɔn-bia dedɛ, pa se de ji di-dwonnu yerane. 18Ba ma dole teene dem konto jwona ba de mini wone ba zwɛ-ya. Kokuri to, ba wa yam dae wa chekke. Nabiina mo boŋe ba ja ye ba kwei dɛ de kandwa ba ke-ya.#Izaya 44:9-20 Konto ŋwaane mo ya nɛ chɔgem. 19Konto to, dé Tu Baŋa Wɛ, yɔɔre n jwoŋi debam n yage Asiria teo pɛ jeŋa ne se logo baŋa teene dem maama lɔre we nmo Baŋa Wɛ yerane mo ye Wɛ.”

Izaya na leiri pɛ wom tei to

Izaya 37:21-28

20Amozi bu Izaya ma toŋe kwora Pɛ Hezekia tei ne ye o we, “Baŋa Wɛ wom na ye Isarele tiina Wɛ to na tage kolo to mo tento: Nmo na lwoori amo tei se ko vo Asiria teo pɛ Senakeribi seeni to, a sɛ n wɛ-lworo kom. 21Kwora kanto mo Baŋa Wɛ jege se o pa‑o:

Zion tiina bam yɔɔre ba neese nmo mo.

Jerusalem teo tiina bam jege‑m mo ba mɔna.

22Wɔ mo nmo twe

ye n daare n lwɛ konto?

Wɔ yiga ne mo n zege n nye baare

ye n daare n bere n tete konto dwoŋi?

Ko ye Isarele dwi dem Wo-pwoŋo Tu wom mo.

23Nmo tɔge n tontoŋena baŋa ne mo n twe amo.

Nmo ta ma‑n bere n tete n we,

‘Amo pɛ se a sisei-torokooro dedɛ

mo di peero tem yuu

te yi Lebanon peero tem yuu chekke.

A ta ma gwoni ba tei-dedwaaro tem a de tega ne,

de ba tei-ŋonno tem maama.

A ma vo a yi yiga yiga

a zo ba goa mɛ na lini to wone.

24Amo ta ma vo a ko vola

sa-teene ne yiga yiga,

ye a nyɔ na ya wone.

A jar-keira bam ma nɔne

Ejipti bwi sem de ba napera pa se we.’

25Nmo wo nigi we amo maŋe

a boŋe boboŋe dem faŋa faŋa mo na?,

A na boŋe tei faŋa faŋa konto to

mo amo laam pɛ se ko seene ko ke.

A boboŋa déem jaane

se nmo zaŋe n chɔge teene

delo ya na lɔge de pe to

se de ji kandwa na dogele da-baŋa ne ya tigi to mo.

26A ta pɛ se teene dem konto

nɔn-bia bam dam ti,

ye ba di ba chaveera nmo ŋwaane.

Banto jigi ne ga-punnu

de ga-lɛɛro nmo yiga ne.

Ba maa nye de gaao na wora

ko tae ko nwoŋi to mo,

ye wea laam mage-ko

pa se ko te lela.

27Amo nam yei nmo kuri maama.

A ta yei n na-veili maama ni ne,

de ni-wɛɛle delo n na jege n ke de amo to ni ne.

28Amo laam lage a waare‑m mo

n na jege ni-wɛɛle delo

n ke de amo to ŋwaane.

N yi-dɛɛre kikia yam to amo zwa ne.

Mo kokuri amo wó lei gwola

n momwɛ ne,

ye a daare a ke gara n ni ne.

A laam maa wó vaŋe‑m se n tɔge

chwoŋa kalo n na tɔge da n ba to

n jwoori n tete teo.”

29Izaya laam ma ta de Hezekia o we:

“Keim dento mo wó ke de pa‑m: Dɔɔm bene dem ne, á wó di wodiiru telo na ke te tete ne to. Bene delo na saŋe-de to ne, á wó di kolo na tage ko nwoŋi boboa nyem kom yera ne to. Ko daare bena yatɔ bene dem ne, abam wó du wodiiru ye á pe-te. Á ta wó jeiri Vini teeni ye á daare á di de wo-bia bam. 30Judah dwi tiina balo ta na daare to laam wó taa ye ne tio bonno na jaane tega ye ko nɛ sem leiri bia to mo. 31Kokuri to, Jerusalem teo tiina ta wó daare. Chega to, balo na zoore Zion peo kom baŋa ne to badaara wó lu toone wone. Baŋa Wɛ tete nam wó pa se wonnu tento maama ke, o na seene yia o nii o nɔɔna baŋa ne to ŋwaane.”

32Izaya ta ma ta o we, “Baŋa Wɛ nam na tage Asiria teo pɛ yera taane tei to mo tento:

O bá na chwoŋa se o zo teo konto wone. O jar-keira bam bá ta che-tɛɛre ywo-seeni, de dedoa de! Ba bá kwei ba jara nantana ba nwoŋi se ba ke chichuŋu de teo kom, naa ba lɔ taara ba yeiri teo kom kabiri sem teiŋa ne. 33Asiria pɛ na tɔge chwoŋa kalo o ba to mo o wó tɔge da o jwoori, se o bá zo teo konto wone. 34Amo tete yere dem zula ŋwaane, de a tontoŋeno David ŋwaane, a wó taa kwoli teo konto se kolokolo yé wane-ko ko chɔge. Amo Baŋa Wɛ na tage tei to mo konto.”

Pɛ Senakeribi toone

35Tete dem konto ne Baŋa Wɛ maleka déem ma zaŋe ka vo Asiria jar-keira bam na tigisi mɛ to. Ka ma go Asiria tiina morro bi de funɔnɔ-banu (185,000). Tega na poore to, ba ma na we ba jei sem su de twa yerane mo. 36Konto baŋa ne mo Senakeribi pɛ o jar-keira bam yage jara yam keim, ye o jwoori o kɛ o vo o tete teo. O laam ma vo o zoore Ninevɛ teo ne.#Jonah 1:2

37Dɛ dedwe, o déem ma zo o jwoni Nisiroka diga kam se o zuli-de. O bia balei Aderamɛlɛka, de Sarezera ma zo ba zage‑o ba go de se-zɔɔro. Ba ma duri ba vo Ararati laŋa kam ba zoore da. Senakeribi bu Esara-hadon déem ma leiri o yuu ne o ji pɛ.

Currently Selected:

2 Pwa 19: KBG

Highlight

Copy

Compare