2 Pwa 18

Judah teo pɛ Hezekia taane

1Isarele teo pɛ Ela bu Hosea paare dim bena yatɔ bene dem wone mo Ahaz bu Hezekia déem di Judah teo paare. 2Hezekia déem jege bena finlei-yanu mo ye ba tiŋi‑o paare. O ma jeini Jerusalem ne o di paare dem o ke bena finlei-nogo. O nu wom déem ye Zekaria bukɔ Abija mo. 3O totoŋa ma su Baŋa Wɛ yi lanyerane, nenɛɛne o nabaaro David déem na ke tei to. 4O déem yɔɔre o chɔge wara-jei bimbina yam mo o dole o yage. O ta ma guri kandwa yalo ba ya na chugi ba jege ba kaane to o chochoge, o daare o gwoni Asera nyenyego dɛ sem o de tega ne.#Jeelim 21:9; Nia Gulim 12:3 Ko ta ná ye channa basankwea kalo Moses déem na mɔɔne o zege to, o ma chochoge-ka bɛŋwaane Isarele tiina bam yeini ba ke zwɛɛm pɛɛra mo ba ma kaane-ka. Ba déem pɛ ko yere we ‘Nehusitan’ mo.

5Hezekia déem pɛ Baŋa Wɛ wom na ye Isarele tiina Wɛ to chega. Judah teo pwa balo maama ya na dɛ yiga ba ba to, de balo na saŋe o kwaga ba ba to maama wone, pɛ tera o na nye de wonto.#2 Tigisim 31:21 6O ma yɔɔre o sale Baŋa Wɛ yera ne, ye o wo ywori o chwei sem ne. O déem tɔge Baŋa Wɛ nia yalo o na pɛ Moses to chekke. 7Baŋa Wɛ de maa wo Hezekia tei ne, pa se o na yiga-veiŋa o totoŋa maama wone.#1 Samuwel 18:14 O ma lɔ Asiria teo pɛ kwaga ne, ye o wo sɛ o pa‑o. 8O déem wane Filisi tiina bam o di. O wane ba teene dem, ko ná maŋe ko ye teo balaŋa de teo kamunu maama de, o kɛ o vo yiga yiga o yi Gaza de ko kateira yam.

9Hezekia paare dim bena yana bene dem wone mo Asiria teo pɛ Salemanesa de o jar-keira vei ba li Samaria teo kom ba ba pu de jara. Isarele teo pɛ Ela bu Hosea paare dim bena yarepɛ bene dem wone mo konto. 10Bena yatɔ na kɛ to, Asiria jar-keira bam ma lɛɛre ba jwoŋi teo kom ba tei. Hezekia paare dim bena yaredo bene dem wone mo konto, ye ko ta ye Isarele teo pɛ Hosea paare dim bena nogo bene dem wone. 11Asiria teo pɛ ma le Isarele tiina bam o ja o vo o yage Hala ne, de Gozan jei selo na wo Habora buga kam ni ne to, dedaane teene delo Media tiina na zoore da to. 12Tento maama déem ke Isarele tiina bam, ba na wo sɛ ba Tu Baŋa Wɛ kwora kam to ŋwaane mo. Ba ma chɔge ni delo o na gwoni de-ba to. Ba maa wo sɛ nia yalo Baŋa Wɛ tontoŋeno Moses déem na kwei o pa-ba to. Ba bere ba wo cheigi-ya. Ba maa wo sɛ se ba tɔge-ya de.

Asiria teo pɛ ke chichuŋu de Judah tiina

13Pɛ Hezekia paare dim bena fuga-yana bene dem wone mo Asiria teo pɛ Senakeribi tu o li Judah te-kamunnu telo na fɔge te pe to maama de jara. O ma wane-ba o di. 14Judah teo pɛ Hezekia ma toŋe kwora o pa Asiria pɛ wom Lakisi teo ne ye o we, “Amo toŋe a tusi nmo yiga ne. Konto ŋwaane amo wó ŋwe lampwoo kolo maama nmo na boŋe we ko maŋe to a pa‑m. Nam yage jara yam n daare n viiri.” Asiria pɛ wom ma ta se Hezekia ŋwe lu-nyenno dunni na yi kilo morro fuga (10,000) to, de sabu-seŋa kilo moro dedoa (1,000) o pa‑o. 15Hezekia ma la lu-nyenno wonnu telo maama na wo Baŋa Wɛ diga kam ne to, ko woli de telo ba ya na tiŋi pɛ sɔŋɔ kom wone to o kwei o pa Asiria pɛ wom.

16Kanto maŋa kam ne, Hezekia ta ma le sabu-seŋa kalo o ya na mɛ o taare Baŋa Wɛ diga kam bworru tem de ka ywoa yam to o kwei ka maama o pa Asiria pɛ wom. 17Asiria pɛ wom ma toŋe o jar-keira yuu tu de o dedɛɛra balei se ba zege Lakisi ne ba nwoŋi de jar-keira kɔgɔ dedɛ ba vo Jerusalem ba gware Hezekia. Ba na yi da to, ba ma vo ba zege na-fera kalo na zoore baŋa seeni chɔgɔ kom to ni ne. Jeiga kam konto bwola de chwoŋa kalo ba na zare gwaaro ka ni ne to mo. 18Dedɛɛra bam ma toŋe ba bwoŋi Pɛ Hezekia. Pɛ wom de ma toŋe Hilikia bu Eliakim na nii pɛ sɔŋɔ kom totoŋa baŋa ne to, dedaane Sebena na ye tɔn-poponno to, ko woli de Asaf bu Joa na nii pɛ sɔŋɔ kom yera seina twanno baŋa ne to, se ba nwoŋi teo kom wone ba vo ba jeeri-ba.#Izaya 22:15-24

19Ba na jeeri to mo Asiria teo pɛ dedɛɛra yiga tu wom taga de-ba se ba ja Asiria pɛ wom kwora ba vo ba ta de Pɛ Hezekia. O maa we:

“Asiria Pa-faro wom we: Bɛ mo bere ko pa se n jege n tete chega konto? 20Nmo boŋe we ni-wɛɛle wae jara de ke mo na? Wɔ baŋa ne mo n teege ye n lɔ amo kwaga ne? 21Nmo teena wo Ejipti teo ne mo na? Konto nam nye de nɔɔno na kwei kasogo o ji o nacheiga to mo. Kasogo kom wó seere mo ka zɔ wolo maama na zei-ka to jeŋa. Konto mo wó ke wolo maama na sale Ejipti Pa-faro wom yera ne to. 22Nmo nam ta ná we, ‘Dé wó sale debam Tu Baŋa Wɛ yera ne mo,’ ko dae Wɛ dem konto wara-jei de kaanem bimbina mo Hezekia guri o yage o daare o pa ni se Jerusalem de Judah nɔɔna maama taa tui bimbini dem na wo Jerusalem ne ywo-seeni to yerane ba zuli‑o na?

23Amo lage a ma a tu wom yere mo a ke ni dedaane nmo Hezekia. Amo wó pa‑m sisein-nɔɔna morro telei, ne nmo ná wó wane n na se dira bam n ke da. 24Nii amo wolo na ye a pɛ wom nabwom to na jege dam delo to. Nmo wó wane-ne n ve n daare n ke n teena de Ejipti tiina mo we ba wó woli‑m de ba jara-keim torokooro de ba sisein-dira na? 25Ko dae Baŋa Wɛ mo toŋe-ne se a ba ywo a wane n teo kom na? Ko seene ko ye Baŋa Wɛ tete mo pɛ-ne ni se a li teo kom de jara a daare chɔge-ko.”

26Eliakim, de Sebena, dedaane Joa maama ma ta de Asiria teo dedɛɛra yiga tu wom ba we, “Popo ŋɔɔne Aram tiina taane de debam, se dé wó ni. Nmo ná ŋɔɔne de Judah tiina taane dem, balo na dɔge kabira kam yuu ne ba cheigi to wó da ba ni n na tɛ kolo to mo.” 27Asiria teo yiga tu wom ma leiri-ba o we, “Á boŋe we amo tu kwora kam wora ka pa abam de á pɛ wom yerane mo na? Ko ye balo maama na dɔge kabira kam baŋa ne to de nyem mo. Banto de wó da ba di ba beinnu ba daare ba nyɔ ba fea ne abam na jege se á ke tei to mo.”

28Asiria yiga tu wom ma tɔɔle o yage de Judah tiina taane dem o we:

“Abam maama cheigi-na Asiria teo pa-faro wom kwora kam. 29Pɛ wom we: Yé sɛ-na se Hezekia taa jege abam o gana, se o bá wane abam o jwoŋi o yage amo jeŋa ne. 30Nam yé pa-na se á pɛ wom gane abam se á ke á wo-dedoa de Baŋa Wɛ. O ná tage de abam we, Baŋa Wɛ wó jwoŋi abam o yage ye o che se Asiria teo pɛ yé di á teo kom, nam yé sɛ-na. 31Yé cheigi-na Hezekia taane kɔtaa. Asiria pɛ wom nam na tage tei to mo tento: ‘Abam maama jege se á nwoŋi á teo kom wone se á daare á to á pa-ne. Á ná ke konto, á wó na chwoŋa se á ta‑á jei yɔlɔ-lɔ-lɔ ye á di á tete Vini teeni de á kaporro tem nyɔɔre. Á ta maa wó nyɔ á vola na bam á ni ywoni. 32Konto kwaga ne, amo ta wó ja abam a vo a yage tega kalo na nye de abam tete tega kam to baŋa ne. Dáane Vini teeni wora se á na sana á nyɔ, de mena se á ma á ke bworobworo. Olivi teeni nuga, dedaane tooro dedɛ de maa wo dáane. Kuri-na ŋwea á leiri toone yuu ne! Yé cheigi-na pɛ Hezekia taane dem, de o na gane abam ye o we, Baŋa Wɛ wó jwoŋi abam o yage to. 33Teo kɔ tete jwona mo dana pa se ya wane ya jwoŋi ya teene ya yage Asiria pa-faro wom jeŋa ne? 34Hamafa, de Arapade jwona yam bɛ? Sefavayim, de Hena, dedaane Ivaa jwona yam de nam wo yei ne mo? Ya wane ya vere Samaria tiina ya yage a dam kuri ne na? 35Teene dem maama jwona yam wone, jwoni dɔ mo wane de jwoŋi de teo de yage amo jeŋa ne? Baŋa Wɛ de nam bá wane o vere Jerusalem o yage amo jeŋa ne.’ ”

36Jerusalem teo nɔɔna bam ma maŋe da chemm, ba wo leiri o taane dem, kokuri to, Pɛ Hezekia ya pɛ-ba ni mo o we, “Yé leiri-o-na.” 37Hilikia bu Eliakim na nii pɛ sɔŋɔ kom totoŋa baŋa ne to, de Sebena na ye tɔn-poponno to, dedaane Asaf bu Joa na tiŋi pɛ sɔŋɔ kom yera seina twanno tem to maama ma ja ba gwaaro ba kaare wo-chechɔgɔ ŋwaane, ye ba ja kwora kalo Asiria teo dedɛɛra yiga tu wom na taga to ba vo ba ta de Pɛ Hezekia.

Currently Selected:

2 Pwa 18: KBG

Highlight

Copy

Compare