2 Pwa 17

Isarele teo pɛ Hosea taane

1Judah teo pɛ Ahaz paare dim bena fuga-yalei bene dem wone mo Ela bu Hosea déem di Isarele teo paare. O jeini Samaria ne mo o di paare dem bena nogo. 2Hosea déem toŋe lwarem o chɔge Baŋa Wɛ yiga. O totoŋ-lwanno tem nam daa wo yi Isarele pwa balo na dɛ yiga ba di paare dem to.

3Asiria teo pɛ Salemanesa déem ma vo o kwaare jara de Isarele teo pɛ Hosea. Konto ŋwaane mo Hosea déem wo o dam kuri ne ye Isarele tiina bam yeini ba ŋwe lampwoo ba pa‑o bene maama wone. 4Asiria pɛ wom déem nam maane we Hosea lɔge o kwaga ne mo de o na toŋe nɔɔna Ejipti teo pɛ Soo tei ne se ba sɔ ni daane to. Hosea ma daare o ve se o daa taa ŋwe lampwoo o pa Asiria pɛ wom, ne o ya na ke tei bene maama wone to. Konto ŋwaane Pɛ Salemanesa ma ja‑o o vo o pe peena diga ne.#Hosea 7:11 5O laam ma vo o li Isarele laŋa kam maama de jara. O ma vo o kaare Samaria teo kom o pu se ko yi bena yatɔ.

6Hosea paare dim bena nogo bene dem wone mo Salemanesa wane o di Samaria teo kom. O ma ja Isarele tiina bam o vo o yage Asiria ne. O jaane ba badwonna o vo o yage Hala ne, de Gozan jei selo na wo Habora buga kam ni ne to. O ta ma ja ba badaara o vo o yage teene delo Media tiina na zoore da to.#2 Pwa 15:29

Ko na ke tei ye Isarele tiina bam na chɔgem to

7Tento maama déem kea Isarele tiina bam na ke wɛleera ba chɔge ba Tu Baŋa Wɛ wom yiga to ŋwaane mo. Ko nam ye Baŋa Wɛ mo jaane-ba o nwoŋi Ejipti teo ne mɛ ba ya na wo ko Pa-faro dam kuri ne to. Ba ma yeini ba zuli wa-yɔɔro mo, 8ba daare ba lwoni chullu telo dwi-gɛ tiina na yeini ba ke ye Wɛ zeili-ba tega kam ne o daare o pa Isarele tiina bam jeini to. Ba daa ta ma tɔge keim-balwaaro telo Isarele pwa bam déem na jege ba ke to. 9Isarele tiina bam déem seigi mo ba toŋe lwarem ba chɔge ba Tu Baŋa Wɛ yiga. Ba lɔge wara-jei mo se ba taa maa ke kaanem ba teene maama wone, ko ná maŋe ko ye teo balaŋa de teo kamunu maama wone de. 10Ba déem ta chwi kandwa de Asera nyenyego dɛ ba zege zwonnu maama yuu ne de teeni maama kuri ne se ba taa zuli-te. 11Ba ta ma ke zwɛɛm pɛɛra ba zuli jwona yam, nenɛɛne dwi-gɛ tiina ya na ke tei ye Wɛ zeili-ba tega kam ne o daare o pa Isarele tiina bam jeini to. Konto to, ba déem ke wo-zɔɔna yalo na chuchugi Baŋa Wɛ bane to mo. 12Baŋa Wɛ nam ya pɛ-ba ni o we, ba yé taa zuli jwona. De ko de, ba ta ke konto mo. 13Kuni dedɛ mo Baŋa Wɛ déem tɔge o sampwori de o yi-nara baŋa ne o kaane Isarele tiina bam de Judah tiina bam o we, “Nam yage-na á keim-balwaaro tem, se á daare á sɛ amo ni-kaana yam de a bera yam. Yanto maama ye nia yalo amo déem na pɛ á nabaara bam se ba taa tɔge to mo. A ma daare a tɔge a tontoŋena bam baŋa ne a bere abam de.”#Kikia 7:51-52

14De ko de, Isarele tiina bam wo sɛ Baŋa Wɛ ni dem. Ba bochara digili mo, ne ba nabaara bam déem na ke tei ye ba ve ba Tu Baŋa Wɛ to. 15Ba déem ve se ba taa tɔge o nia yam, de ni-gwonim delo o na ke de ba nabaara bam to. Ba ma daare ba ve o ni-kaana yam de. Ba ma zuli jwo-yɔɔro pa se ba de ji nɔn-kayɛ. Ba ma lwoni dwi-gɛ tiina balo na gilimi-ba to kikia. Baŋa Wɛ ya maŋe o kaane-ba se ba yé lwoni banto kikia.

16Ba yiga déem tera de ba Tu Baŋa Wɛ nia yam. Ba ma kwei luu ba ma ba mɔ na-mɔre selei kamwaro, ba daare ba ke Asera nyenyego daa se ba zuli-te. Ba ta ma kuni dwoona ba zuli chalechwe sem de Baal jwoni dem. 17Ba déem kwei ba tete bia, bakeiri de bukwa, ba zwɛ ba ma ke kaanem. Ba ta maa yeini ba vei vora de yi-nara tei se ba nii ba yiga ba pa-ba. Ba ma yɔɔre ba yage ba tete se ba taa ke lwarem ba chɔge Baŋa Wɛ yiga pa se ba chuchugi o bane.

18 Baŋa Wɛ bane na tiini de zaŋe Isarele tiina bam baŋa ne konto to, o ma zeili-ba o yiga ne. Judah dwi tiina bam yerane mo daare. 19Judah tiina bam de déem wo sɛ ba Tu Baŋa Wɛ nia yam. Ba ma kwei Isarele tiina bam totoŋ-naga ye ba ke lwarem. 20Konto ŋwaane mo Baŋa Wɛ déem mɛ o kwaga o ya Isarele dwi dem maama, ye o daare o pa cham ba ba baŋa ne de ba dona na jege-ba ba bɛɛse tei to. Ko ke konto mo taa ye Baŋa Wɛ laam zeili-ba o yiga ne.

21 Baŋa Wɛ déem na pɔɔre Isarele dwi dem o ja nwoŋi Pɛ David dwi dem jeŋa ne to mo Isarele tiina bam kwei Nebat bu Jeroboam ba tiŋi‑o paare. Jeroboam ma soge Isarele tiina bam pa se ba ywori Baŋa Wɛ chwoŋa kam ne, ye ba fɔge ba zo wɛleera dedɛ wone. 22Ko kwaga ne Isarele tiina yɔɔre ba tɔge wɛleera dwi delo maama Jeroboam na ke to mo. Ba bere ba wo sɛ se ba yage-ya. 23Ba ke konto mo taa ye Baŋa Wɛ laam zeili-ba o yiga ne. O déem maŋe o tɔge o sampwori sem baŋa ne o kaane-ba we, o wó ke konto mo. Mo kokuri Isarele tiina dona bam jaane-ba ba nwoŋi ba tete tega kam ne ba vo Asiria. Dáane mo ba ta wora de zem maama.

Asiria tiina na nɛ jeiŋa jei Samaria ne

24Asiria teo pɛ déem ma ja nɔɔna badwonna ya na zoore Babilon ne, de Kufa ne, de Awa ne, de Hamafa ne, dedaane Sefavayim ne to o ba o yage Samaria ne se banto leiri Isarele tiina bam yuu ne ba taa zoore da. Nɔɔna bam konto ma lɛɛre ba tei Samaria laŋa kam ye ba zoore ka teene dem wone. 25Ba na bobo se ba taa zoore da to, ba wo kɔre Baŋa Wɛ. Baŋa Wɛ ma pa nywonnu zo ba wone pa se te go ba badwonna. 26Nɔɔna ma ta ba bere Asiria teo pɛ ba we, “Nɔɔna bam nmo na jaane n ba n jeini Samaria teene dem wone to yeiri tega kam konto wɛ dem chullu tem. Konto ŋwaane mo wɛ dem konto pɛ se nywonnu zo ba wone ye te go ba badwonna.”

27Asiria pɛ wom ma pa ni dento o we, “Le-na nɔɔno dedoa Samaria kaanem tiina balo dé na jaane dé ba ywo to wone á daare á pa se o jwoori o vo o taa zoore o tete tega kam ne. Kotu laam wó wane o bere nɔɔna bam se ba lɔre tega kam wɛ dem chullu tem na ye tei to.” 28Ba ma seene ba pa Samaria kaanem tiina dedoa jwoori o vo o zoore Bɛtel ne. O ma bere nɔɔna bam ba na wó taa zuli Baŋa Wɛ tei to.

29De ko de, nɔɔna balo na nwoŋi ba teene dwi dwi ba ba Samaria to daa ta mɔɔne ba tete wa kamwaro mo. Ba déem ma kwei-te ba zege wara-jei selo Samaria tiina bam ya na lɔge ba tete jwona yam ŋwaane to. Nɔɔna bam dwi dwi ke konto teo kolo maama ba na zoore da to mo. 30Babilon tiina bam na mɔɔne jwoni delo to yere mo Sukof-Benofi. Kufa tiina bam jwoni dem yere maa ye Nɛgale. Hamafa tiina bam de maa kaane Asima. 31Awa tiina bam maa kaane Nibaza de Tataka jwona yam. Sefavayim tiina bam maa yeini ba zwɛ ba bia ba ma kaane ba jwona Aderamɛlɛka de Anamɛlɛka. 32Nɔɔna bam konto déem kɔre Baŋa Wɛ mo ba woli da. De ko de, ba yeini ba le ba tete dwi wone nɔɔno de nɔɔno mo se ba taa yeini ba ke kaanem wara-jei sem maama ne. 33Konto to, ba déem zuli Baŋa Wɛ ye ba ta vei ba zuli ba tete teene dem jwona, ne ba tete dwi tiina na yeini ba tɔge chullu telo to mo.

34De zem maama, nɔɔna bam ta wo yage ba faŋa chullu tem. Ba ba yɔɔre ba kɔre Baŋa Wɛ. Ba maa ba sɛ Baŋa Wɛ bera yam, de o chullu tem, de o nia yam, ne o déem na kwei o pa Jakob dwi tiina bam se ba taa tɔge to. Jakob yere dem konto mo Baŋa Wɛ déem leiri pa de ji Isarele. 35Baŋa Wɛ déem gwoni ni de Isarele dwi tiina bam, ye o kaane-ba we, “Abam daa á yé zuli-na wa yadwonna á woli amo wone. Á ba jege se á tiiri jwona yiga ne, naa á zuli-ya, naa á kaane-ya.#Nia Gulim 5:32 36Abam nam jege se á ta‑á kɔre Baŋa Wɛ mo, o na tɔge o dam-fɔrɔ baŋa ne o toŋe wo-kamunnu o ma o ja abam o nwoŋi Ejipti wone to ŋwaane. Wonto yerane mo abam wó tiiri o yiga ne á zuli‑o, á daare á ke kaanem á pa‑o. 37Á ta‑á yei se á sɛ o bera yam, de o chullu tem, de o ni-kaana yam, ne o na popone nia yalo o tiŋi o pa abam to. Á ye zaŋe-na á zuli wa-yɔɔro. 38Á nam yé swei a na gwoni ni delo de abam to. Yé kɔre-na wa yadwonna á woli amo wone. 39Á nam jege se á kɔre á Tu Baŋa Wɛ wom yerane mo. Ko ye wonto mo wó vere abam á dona maama jea ne o yage.”

40Nɔɔna bam nam wo sɛ Wɛ ni dem konto, ye ba ta ke ne ba na maŋe ba ke tei faŋa to. 41Dwi-gɛ tiina bam konto déem yeini ba kɔre Baŋa Wɛ ye ba ta zuli ba jwona kamwaro tem de mo. De zem maama ba dwi dem ta ke konto mo, ne ba nabaara bam de ya na ke tei to.

Currently Selected:

2 Pwa 17: KBG

Highlight

Copy

Compare