2 Pwa 16

Judah teo pɛ Ahaz taane

1Remalia bu Peka paare dim bena fuga-yarepɛ bene dem wone mo Jotam bu Ahaz déem di Judah teo paare. 2Ahaz déem jege bena finlei mo ye ba tiŋi‑o paare. O ma jeini Jerusalem ne o di paare dem o ke bena fuga-yaredo. O nam wo toŋe o pwoli o Tu Baŋa Wɛ wo nenɛɛne o nabaaro David na ke tei to. 3O déem tusi de o na kwei Isarele teo pwa bam totoŋ-naga tei to. O ma ja o tete bu o zwɛ o ma o ke kaanem. O keim dem konto bere we o lwoni totoŋ-zɔɔna yalo dwi-gɛ tiina na ke ye Wɛ zeili-ba tega kam ne o daare o pa Isarele tiina bam jeini to mo. 4Ko ná ye wara-jei bimbina yam baŋa ne, de zwonnu tem baŋa ne, de teeni maama kuri ne, o déem yeini o ke kaanem de zwɛɛm pɛɛra mo jei sem konto maama ne.

5Siria teo pɛ Rezin de Isarele teo pɛ Peka déem ma zaŋe ba vo Jerusalem se ba kwaare jara de Judah tiina bam. Ba ma gilimi teo kom ba pu, ye ba wo wane Ahaz ba di. 6Kanto maŋa kam ne mo Siria teo pɛ Rezin déem zeili Judah tiina balo na zoore Elafa ne to o jwoori o ke teo kom o tete nɔɔna jeŋa ne. Edom tiina laam ma vo ba zoore Elafa ne ye ba ta wora de zem maama.

7Pɛ Ahaz ma toŋe o tontoŋena se ba vo ba ta de Asiria teo pɛ Tigilaf-Pilesa we, “Amo ye nmo tontoŋeno mo ye a yɔɔre a sɛ a pa‑m. A nam lwoori‑m se n ba n jwoŋi-ne n yage Siria tiina de Isarele tiina bam jeŋa ne, ba na tu ba li amo de jara to ŋwaane.” 8Ahaz ta ma kwei lu-nyenno de sabu-seŋa wonnu telo na wo Baŋa Wɛ diga kam ne to dedaane telo na wo pɛ sɔŋɔ kom wone to o toŋe o pa Asiria pɛ wom. 9Asiria teo pɛ ma sɛ. O ma vo o kwaare jara de Damasika#16:9 Damasika déem ye Siria tiina te-fɔrɔ kom. o wane-ko. O ma ja ko nɔn-bia bam o vo o yage Kiri teo ne o daare o go Pɛ Rezin.

10Pɛ Ahaz déem ma vo Damasika se o ware Asiria teo pɛ Tigilaf-Pilesa. O na wo teo kom wone konto to mo o nɛ kaanem bimbini ba na lɔge ba zege da. O ma kwei bimbini dem nyenyego o toŋe o pa Wɛ kaanem nakwe tu Yuria se o wane o lɔre ko na ye tei to chekke. 11Yuria de ma lɔ bimbini dem dwoŋi se de yɔɔre de maŋe de nyenyego kom. O ma lɔ-de o ti ye Ahaz laam zege Damasika ne o jwoori. 12Ahaz na jwoori o ba ye o na bimbini dem to, o ma yi de yera o ke kaanem de baŋa ne. 13O déem ke zwɛɛm pɛɛra, de wodiu pɛɛra kaanem mo. O ma lwo wo-nyɔɔro pɛɛra o ke da ye o daare o kwei yazura kaanem jana bam o miisi bimbini dem yera ne. 14Ahaz ma le channa kaanem bimbini dem na zege Baŋa Wɛ yiga ne to o ja o nwoŋi Wɛ diga kam ni dem ne. De déem ya zege diga kam ni dem de bimbin-doore dem tetare ne mo. O ma kwei-de o zege bimbin-doore dem baŋa kam seeni. 15O ma ta de Wɛ kaanem tu Yuria o we, “Ko ná ye bimbin-kamunu kolo dé laam na lɔge to, ta‑n ke zezeŋa maama zwɛɛm kaanem, de dedaan-ni maŋa maama wodiu pɛɛra yam de baŋa ne. Ta ke pɛ wom tete zwɛɛm kaanem dem, de o wodiu pɛɛra yam, ko woli de nɔɔna bam maama zwɛɛm kaanem, de ba wodiu pɛɛra, de ba wo-nyɔɔro pɛɛra yam maama bimbin-doore dem baŋa ne. Ta daare n kwei kaanem dem maama jana bam n miisi bimbini dem yera ne. Ko nam ná ye channa bimbini dem, amo wó taa mae dento a fɔge a yiga.” 16Yuria ma seene o ke ne Pɛ Ahaz na tage tei to.

17Pɛ Ahaz déem ma le channa wonnu telo na meeli ware-zwe zegem torokooro tem sɛ sem ne to. O ta ma le ware-zwe sem tete. Ko ná ye channa ware-zon-zɔŋɔ kolo ba na bwoi we ‘Naneo kom’ to, o ta ma zoore-ka ka na zege channa nabɛ selo baŋa ne to.#1 Pwa 7:23-27; 2 Tigisim 28:24 O ma daare o kwei-ka o zege kandwɛ-polɔgɔ baŋa ne. 18Ahaz ta ma gɔ vwei delo ba ya na pugi wara-jei sem ne siu dɛ ŋwaane to. O ta ma daare o se manchwoŋo ni delo ba ya na pore se pɛ wom taa tɔge da o zoore Wɛ diga kam wone to. Ahaz déem ke konto maama se ko pwoli Asiria teo pɛ wom wo mo.

19Ahaz déem na di paare ye o ke wonnu telo to, de o totoŋa yam maama, ba popone-te ba tiŋi Judah Teo Pwa Seina tɔnɔ kom wone. 20Ahaz ma te ye o vo o kwoa tei. Ba ma kwei‑o ba suli o kwoa bam yibeeli ne David teo Jerusalem ne. O bu Hezekia ma leiri o yuu ne o ji pɛ.

Currently Selected:

2 Pwa 16: KBG

Highlight

Copy

Compare